خەبات: رشید سۆفی – زاخۆ:- بازارێ چێكرن وفروتنا جل وبەرگێن كەلتوری (( شەل وشەپك)) یێن دەڤەرا زاخۆ گەشەبونەكا بەرچاڤ بخوڤەدیتە وداخوازی ل هەمی دەڤەرێن هەرێما كوردستانێ ل سەر هەیە، وهەروەسا بو توركیا وئیران وسوریا ژی دئێتە هنارتن وڤێ یەكێ رەنگڤەدانەكا باش ل سەر بەرهەمئینانا شەل وشەپكان كریە.
بەختیار هەورامی یەك بازرگان وبەرگدرووێن شەل وشەپكا یە ل سلێمانێ دبێژیت:نها داخوازیەكا بەرچاڤ ل سەر ڤان جورێن جل وبەرگێن شەل وشەپكێن زاخویی ل دەڤەرا سلێمانیێ هەیە، وخەلك ببەردەوامی داخوازا جور و رەنگێن جودا یێن ڤان جل وبەرگان دكەن، وژبەركو شەل وشەپك ئێك ژوان جل وبەرگێن رەسەنە وبەرهەمەكی خۆمالی یە وكوالیتەكا گەلەك باش ژی هەیە.
ودیاركر، نێزیكی هەشت سالایە رۆژ بو رۆژێ پتر داخوازی ل سەر شەل وشەپكێن زاخۆ هەیە،هەر پارچەیەكا جل وبەرگێن شەل وشەپكان ببهایێ 700 ــ 1000 دولاران ئەم دفروشن و كریارێن وان ژی كەسێن گەنج وخەلكێ بتەمەن دناڤ دا هەیە وهەروەسا گەلەك ڤان جورێ جل وبەرگان وەك دیاری پێشكێش دكەن، شەل وشەپك ژجل وبەرگێن كوردی یێن رەسەن وژكەڤندا ل دەڤەرا زاخۆ ب شێوەیەكی بەرفرەهـ دئێنە سازكرن بتایبەت هوستایێن مەسیحی وئەرمەن ئەڤ پیشەیە ئەنجام ددان.
ئەلبەرت خوشابا هوستایێ چێكرنا جل وبەرگێن شەل وشەپكایە وەسا ددتە زانین، نها داخوازیەكا باش ل سەر بەرهەمێ مە هەیە وهەروەسا ئەم بو توركیا وئیران وسوریا رەوانە دكەین زێدەباری كو ل هەمی پارێزگەهێن هەرێما كوردستانێ دئێتە فروتن، وئەڤێ چەندێ ژی تارادەیەكی بەرچاڤ كارێ چێكرنا شەل وشەپكان گەشەكریە.
وهەروەسا دیاركر ل دوو سالێن بوری ئیدارا سەربخۆیا زاخۆ كارەكی باش ئەنجامدایە ژبو سازكرنا ڤیستەڤالا شەل وشەپكان وئەڤ چەندە بویە دەلیڤەیەكا مەزن ژبو بازاركرن وزێدەكرنا داخوازیێ ل سەربەرهەمێ مە ل حەفتا بوری ڤیستەڤالا دووێ یا شەل وشەپكان ل زاخۆ هاتە سازكرن دڤێ ڤیستەڤالێ دا چەندین چالاكێن تایبەت ب جل وبەرگێن كوردی بخوڤە گرتن وهەروەسا بازارەكێ تایبەت ژبو كرین وفروتنا جل وبەرگێن كوردی یێن خانم وزەلامان هاتیە ئامادەكرن، وهەروەسا چەند پەنەلێن تایبەت ب مێژوویا جل وبەرگێن كوردی ژلایێ هەژمارەكا ئەكادیمیان ڤە دێ ئێتە پێشكێشكرن، وزێدەباری چالاكێن نمایشكرنا جل وبەرگان،ودیسان پیشانگەهەكا تایبەت ب خوارنێن كوردەواری ڤە هاتیە ئامادەكرن ژبو پتر ناساندنا لێنانگەها كوردی.
ژهەژی ئاماژە پێكرنێ یە پیشەیا چێكرن ورستنا جل وبەرگێن شەل وشەپكان ل دەڤەرا زاخۆ یەك ژكارێن كەڤنارە ئەڤ دەڤەرە پێ دئێتە ناسكرن وهەتا نها ژی ئەڤ پیشەیە بەردەوام بویە و ناڤ ودەنگێ وێ ل هەمی دەڤەرێن كوردستانێ بەلاڤبویە.
