*رەوشا ئوتێل وموتێلا چاوایە وژمارا وان ل پارێزگەهێ چەندە؟
ئیحسان شێخ عیسا: مە نێزیكی (200) ئوتێل وموتێلا لسنورێ پارێزگەهێ هەنە ورەوشا وان گەلەك یا لاوازە ژبەر كۆ ژێرخانا گەشتیاری گەلەك یا هەژارە چونكو پترە ژ (15) ساڵا چ پرۆژێن گەشتیاری یێن بەرچاڤ نەهاتینە ڤەكرن وچ پلانێن باش ژلایێ حكومەتێ ڤە نە هاتینە دانان بۆ پێشڤەبرنا كەرتێ گەشتیاری بدیتنا من ئاخفتن وپلان زۆر هەنە وكریار دكێمن.
* بزاڤا گەشتیاری ل سالا بوری هەروەسا ل هەر چار هەیڤێن ئێكێ ژساڵا 2024 وپێشبینیا هەوە بۆ هەیڤێن ماین ژ سالا نوو چنە؟
ئیحسان شێخ عیسا: بزاڤا گەشتیاری ل ساڵا 2023 گەلەك باشتر بۆ ژ یا ساڵا 2022 هەروەسا ل چار هەیڤێن ئێكێ یێن ئەڤ ساڵە 2024ێ وەرزێ زڤستانێ بوو وچ بزاڤێن بەرچاڤ نەبوون هەروەسا وەزرێ خاندنێ ل ناڤەراست وباشورێ عیراقێ ب دوماهی نەهاتیە لەورا رێژا گەشتیارا یا كێمبوو وئەم دگەشبینین پشتی 1/6/2024ول هەڤێن (6و7و8و9) گەلەك گەشتیار دێ قەستا مە كەن.
*ئاستێ وان ئاسانكاریا یێن حكومەتا هەرێمێ پێشكێشدكەت وهەوە چ پێشنیار هەنە ببنە هاندەر بزاەڤا گەشتیاری باشتر لێ بهێت؟
ئیحسان شێخ عیسا: وەكو مە ئاماژە پێدای ئاسانكاری ژلایێ حكومەتا هەرێمێ ڤە گەلەگ دلاوازن لێ ئەم گەشبینین كو پشتی پارێزگارێ دهۆكێ ب فەرمی را گەهاندنی دێ (14) پرۆژێن گەشتیاری هێنە بجهئینان ئەم ژی دێ هەولدەین كو حكومەت بزوترین دەم دەست بجهئینانا وان پرۆژا بكەت وئاستەنگێن كاركرنێ راكەت دا دەلیڤێن كاری پتر بۆ خەلكێ مە پەیداببن وبێ كاری بهێتە كێمكرن ولڤینەكا ئابوری یا مەزن ب كەڤیتە ڤی كەرتێ گرنگ و ئەز بفەر دبینم كارگێریا پارێزگەهێ هاریكار ورێكخوشكەربیت بۆ هاتنا گەشتیارا وڤان هەردوو خاڵا لبەر چاڤ بگریت یا ئێكێ ئەوە زالگەهێن مە پێشوازیەكا باش ل گەشتیارا بكەن ئەوێن ژناڤەراست وباشورێ عیراقێ دهێن وچارەسەركرنا ئاریشا وان ومانا بۆ دەمێ دوو سێ سەعەتا ل زالگەها هەروەسا خاڵا دووێ ئەوە دەزگەهێن پەیوەندیار داتایێن راست ودورست یێن هاتنا گەشتیارا دیاركەن نەخاسمە هاتنا گەشتیارا ل دەمێ جەژ وهەلكەفتا بلا هەردەم ئەڤ داتایە دراست ودورست بن دا بەرنامە وپلانێن گەشتیاری ل سەر وان داتایا بهێنە دانان.
*گەشتیارێن قەستا پارێزگەهێ كەن كینە؟
ئیحسان شێخ عیسا: زۆربەیا گەشتیارا ژباشور وناڤەراستا عیراقێ ب رێكا گروپێن گەشتیاری قەستا دهۆكێ دكەن ورێژەكا كێم ژگەشتیارێن بیانی ب رێكا كومەڵا مە ب رێكا گروپێن گەروك ژوەلاتێن ئورپی قەستا پارێزگەهێ دكەن پاش بەرەف ئەفریقیا دچن هەروەسا ل ساڵا 2023 رێژەكا باش یا گەشتیارێن كەنداڤێ عەرەبی قەستا پارێزگەهێ كربوو.
*ئاستێ وان خزمەتگوزاریێن ئوتێل وموتێل وخارنگەهێن ل پارێزگەهێ پێشكێشدكەن وچ گازندە ژلایێ گەشتیارا دگەهنە كومەلێ؟
ئیحسان شێخ عیسا: بدیتنا مە ئاستێ خزمەتكرنێ ل ئوتێل وموتێل وخارنگەهێن مە زۆر یێ باشە ومە ل سەر هەر جهەكی سەپاندیە كو دڤێت ل هەر جهەكی ژوان دەرچویەكێ پەیمانگەهەكا گەشتیار لێ هەبیت دا ب جوانی خزمەتكاری بهێنە پێشكێشكرن ولدوماهیێ ئەز داخازێ ژحكومەتا هەرێمێ دكەم پلانێن باش یێن گەشتیاری بۆ پارێزگەها دهۆكێ دانن چونكو پارێزگەها دهۆكێ جهەكێ سروشتی وگشتیاری یێ جوان وسەرنج راكێش هەیە پێدڤی یە كارەكێ باش بهێتە كرن دا پتر سەرنجا گەشتیارا بهێتە راكێشان وقەستا پارێزگەهێ بكەن هەروەسا داخازێ ژدەزگەهێن میدیایێ دكەم كو بەرنامێن خو ب زمانێن عەربی وئنگلیزی ل دور سروشت وجوانیا دهۆكێ وكلتورێ مە یێ جوان ئامادەكەن ونیشا خەلكی بدەن دا پتر گەشتیار قەستا مە بكەن.
ماموستا وشارەزایێ كاروبارێن گەشت وگوزاری (عیماد ئامێدی) خودانێ ئوتێلەكا چار ستێرە ل دهۆكێ ل دور وان ئاسانكاریا كو پێدڤی یە حكومەتا هەرێمێ وپارێزگەها دهۆكێ بكەت دا بزاڤا گەشتیاری پتر پێشبكەڤیت گوت: پێدڤی یە دەزگەهێن مە یێن ئەمنی ویێن پەیوەندیدار ل زاڵگەها پتر ئاسانكاریا بۆ گەشتیارا وكومپانیا ورێكخراوا بكەن ورێكێ خوشكەن دا خەلك پتر قەستا جهێن گەشتیاری ل دهۆكێ بكەن ونوكە حكومەت هەموو ئاسانكاریا بو رێكخراوا وسەرمایدار وخودانێن كومپانیا ل هەولێرێ دكەت بلا ڤان ئاسانكاریا بۆ وان لایەنان ل دهۆكێ ژی بكەن دا بزاڤا گەشتیاری پتر خورت ببیت.
هەروەسا گوت: یا فەرە حكومەت گرنگیێ ب ئامادەیی وپەیمانگەهێن گەشتیاری ودەرچویێن وان بدەت دا كاردرەكێ گەشتیاری یێ باش بهێتە ئامادەكرن وباشتر خزمەتا مێهڤانان بكەت.
ئیحسان شێخ عیسا”سەروكێ كومەلا ئوتێل وخارنگەها ل پارێزگەها دهۆكێ
