پرسەنامەی مـەکتەبی سیاسیی پارتی دیموکراتی کوردستان بۆ کۆچی دوایی خوالێخۆشبوو (کامەران خەفاف)

بەڕێز خانەوادەی خوالێخۆشبوو (کامەران خەفاف)

بە داخ و پەژارەیەکی زۆرەوە هەواڵی کۆچی دوایی کادیری تێکۆشەر و ڕاگەیاندنکار و بێژەری دیار و ناسراو پارتیمان، خوالێخۆشبوو(کامەران خەفاف)مان پێگەیشت، کە بە رووداوێکی دڵتەزێنی هاتووچۆ گیانی سپارد، بە خەمناکییەوە پرسە و سەرخۆشی لە بەڕێزتان و کەسوکار و بنەماڵە تێکۆشەرەکەتان و، سەرجەم هەڤاڵ و هاوکارانی خوالێخۆشبوو دەکەین و، خۆمان بە پرسەبار و هاوخەمتان دەزانین و هیوای چاکبوونەوە بۆ خێزانی کۆچکردوو دەخوازین، کە لەو رووداوە زامدار بووە.

خوالێخۆشبوو (کامەران خەفاف) ئەندامی هەیئەی گشتی مەکتەبی ڕێکخستنی پێشمەرگە و یەکێک بوو لە کادیر و میدیاکارە دیار و بوێر و ماندوونەناسەکانی بواری ڕاگەیاندن و، لەو ڕووەوە خزمەتێکی زۆری کردووە و بەتایبەتی وەک بێژەرێکی دەنگ زوڵاڵی ئێزگەی دەنگی کوردستان.

ئومێدەوارین دڵنەوایی و هاوخەمی هەڤاڵ و میدیاکاران و هاوکاران و دۆستانی ئەو کۆستە ببێتە مایەی سەبووری و ئارامگرتنتان و لە خەم و خەفەتتان کەم بکاتەوە، داواکارین لە خوای گەورە خوالێخۆشبوو بە بەهەشتی بەرین شاد بکات و ئێوەش لە خەم و خەفەت و کۆستی دیکە بەدوور بگرێ.

مـەکتەبی سیاسیی
پارتی دیموکراتی کوردستان
٢ی ئایاری ٢٠٢٤