رۆژناما خەبات وەرچەرخانەکا دیرۆکیە دهەمبێزا رۆژنامەڤانییا کوردستانێ دا

محمد گـڤـاری
رۆژناما خەبات وەک گوتن و کریار ژوان کارو خزمەتانە کو لدویف رێبازەکا پیرۆز بۆ دەستڤەئینانا ئارمانجێن نەتەوەکێ تێکوشیە، بۆ گەهاندنا پەیاما نەتەوەکا زولم لێکری ئەوژی نەتەوا کوردە ب درێژاهیا دیرۆکێ مافێت هاتینە بن پێکرن و ئاخا وان هاتیە داگیرکرن، وەشانا ئێکەم ژمارا رۆژناما خەبات ل 1959/4/4 دەستپێکا ئەرکەکێ نەتەوەیی بوو پێخەمەت پێشڤەبرنا چاند و زمان و کلتورو ڕەسەندارییا گەلێ کوردستانێ ، بەرەڤ ناساندنا کوردان بۆ جیهانا دەرڤە.

رۆژناما خەبات هەلگرێ وێ پەیاما زیندی یە کو جهێ وێ دبیاڤێ کاروانێ سەرفرازییا رۆژنامەڤانییا کوردی دا یا جهگیرە مینا گەنجینەیەکێ یا ب نرخ و بهادارە ، جهێ ڕێزو شانازیەکا مەزنە، بەردەوام بەرەف بنەماو راستگۆیێ کاروانێ رۆژنامەڤانیێ کریە ئەرکێ خۆ یێ ڕاستگۆیانە تایبەت دناڤ کاودانێن هەستییاردا پشتەڤانییا دۆزا ڕەوایا نەتەوەیی کریە وەک ئەرکەکێ فەر بۆ هشیارییا توخمێ کورد.

رۆژناما خەبات نمۆنەیا رۆژنامەگەریا پرۆفیشنالە ل پەیرەوکرنا بنەماو ئەتەکێتێن راستەقینە ، هەروەسا خوێندنگەهەکە بۆ پێگه هاندن و چێکرنا کادرێن رۆژنامەڤان، تا ئەڤرۆژی یابەردەوامە بۆ پێنگاڤێن بەرهەمدار لسەر بنەمایێن ئامرازێن رەوشەنبیری و کلتوری و سیاسی و جڤاکی، رۆژناما خەبات وەکو ئێکەمین رۆژناما رۆژانە یا زمان حالێ پارتی دیموکراتی کوردستان دەستکەفتەکێ گرنگێ بزاڤا ئادیخوازییا سیاسەتا پارتی یە ب سەرکردایەتییا بارزانیێ نەمر ، مینبەرەک بوویە بۆ داکوکیرن ل ڕەهەندێن دیموکراتی و ئازادی و ئاشتی و داڕێـشتنا پرنسیبێن لێبۆرینێ و برایەتی و پێکڤە ژیانێ ، هەمی دەما بێ جوداهی خۆ ل بیرۆ بۆچوونێن بلند و ڕاسـتگو دیسان راستەقینەیا رەوشەنبیری و رۆژنامەڤانان کریە خۆدان.

خەبات ژبلی خۆدان پێناسەکا دیرۆکییا تایبەتە دچارچۆفێ کارێن رۆژنامەڤانیێ دا رۆلەکێ کاریگەر دیتیە بۆ هشیارکرنا گیانێ نشتیمان پەروەریێ و شۆڕەشگێری و ئێکڕێزیا هەمی ڤوناغێن خەباتا سیاسی بۆ ئاڤاکرنا ئەزموونا ئاڤەدانییا دەستهەلاتەکا نوی خاز کو دگەل سەردەمێ ژیانا ئەڤرۆ یێ جیهانگیریێ بگونجیت، هیڤیدارم بڤێ هەلکەفتا پیرۆز گرنگییێ ب بنەماو ئەتەکێتێن رۆژنامەڤانیێ بدەن، ژئالیێ ڕاسـتگۆیی و بەرپرسیارەتیێ ، ب وێرەکانە سەرەدەریێ دگەل ڕەوش و پێشهاتان بکەن وەکو دەستهەلاتا چارێ تایبەت دناڤ کاودانێن هەنوکەیی یێن هەستییار کو گەلێ کورد ل هەرێما کوردستانێ تێدا دەرباز دبیت بۆ بەرجەستەکرنا ماف و داخازیێن تەڤایا پێکهاتەیێن جڤاکی ل کورووستانێ ، دیسان دلایەنێ ڕەخنەگرتنا ئاڤاکەر و بەرچاڤگرتنا ئاریشەو گیرو گرفتان ژبۆ سەرکەفتنا پرسێن سیاسی یێن نها بۆ چاکسازی و ڕاستەڕێکرنا هەمی بابەتان بشێوەکێ گشتی.

ب هەلکەفتا (74)سالیا وەشانا رۆژناما خەبات دەستخۆشیێ ل ڕێڤەبەرو کارمەندێن رۆژناما خەبات دکەم، دخازم هەردەم دپێشکەفتی بن ، هزاران سلاڤ بۆ بیرهاتنا رۆژنامەڤانێن پێشەنگ و خۆدان هەلویست و سەربووڕ، ئەوێن کاروانێ ڕێیا ئازادییا رۆژنامەڤانیێ ب ئەڤرۆ گەهاندی، هیڤیا بەردەوامیێ بۆ رۆژناما خەبات دخازم.