رەشید سۆفی
دەما ڤەكولەر و شارەزایێن دیرۆكا سیاسی هەڤچەرخ پێداچونێ دمێژوویا رۆژنامەڤانی یا كوردی دكەن دزانن سەرهلدانا بزاڤا رۆژنامەڤانی وبەردەوامی پێدانا ڤی كاروانی پڕی سەروەری چەند جهێ خوە كریە ژبو هوشیاركرنا خەلكێ كوردستانێ دسەردەمێن گەلەك ئالوز وزەحمەت ژلایێ سیاسی وئابوری وجڤاكی وهەتا جیوسیاسی دا ودهەمان دەم ژی دا رۆژنامەڤانێ یا كوردی تاكە مینبەرا راستەقینە بویە ژ گەهاندنا دەنگێ مللەتەكێ زۆلم لێكری یێ كو ب هەمی شێوەیان دهاتە بێ دەنگكرن ژبو داخوازكرنا مافێن خوە یێن رەوا.
هەر ژدامەزراندنا خوە رۆژناما خەبات كو سەرەرای ئورگانەكێ پارتی دیموكراتی كوردستان بویە،بەرەڤانیكرن وژمافێن خەلكێ كوردستانێ یێن زۆلم لێكری،بنەمایێن برایەتی وپێكڤە ژیانێ،ب ئەركێ خوە یێ سەرەكی دیتی یە زێدەباری هوشیار وپەروەردكرنا مروڤێ كوردستانێ وئاڤاكرنا جڤاكەكی ئارام وپێشكەفتی ب بەرپرسیارەتیا كارێ خوە زانی یە.
هەلبەت د وان قوناغ وكاودانێن سیاسی وئابوری وجڤاكی یێن دەرچونا رۆژنامەیا خەبات چ بنهێنی وئاشكەرایی تێدا دەرباز بوی نە ب ساناهی بویە رۆژنامەیەك بەرهنگاری وان ئاستەنگا ببیت وبەردەوامی بدتە كاروانێ خوە،لێ ژبەركو سەركردایەتیا پارتی دیموكراتی كوردستان باوەریەكا مەزن هەبویە ب خەباتا مەدەنی و رۆل و بەرپرسیارەتیا دیروكی وشارستانی یاكو بزاڤا رۆژنامەڤانی ئاڤادكەت.
لەورا ئەو ئەركێ رۆژناما خەبات دوان كاودانێن جودا جودا دا هەلگرتی دوارێن سیاسی وئابوری وجڤاكیێ خەلكێ كوردستانێ وعیراقێ دا بەرپرسیارەتیەكا مەزن بویە ژبو بەرەڤانیكرنێ نە ژمافێن هەمی خەلكێ عیراقی نەك یێ خەلكێ كوردستانێ بتەنێ لەورا ژی خەلكێ ودەستەلاتدارێن وی سەردەمی یێن عیراقێ گرنگی یە كا مەزن ددانە وان دیتن وبوچونێن لسەر رووپەلێن خەبات دهاتنە وەشاندن ژبەر كو وان باش دزانی خەبات دەربرینێ ژ دوزا رەوایا مللەتێ كورد دكەت وهەروەسا مینبەرەكا ئازا یە بو هەمی بیرو بوچونێن ئازادیخوازێن عیراقێ ژی.
دەما خویندەڤان پێداچونێ ب ئەرشێفێ خەبات دا دكەت دێ زانیت خەبات نەك ئورگانی پارتی دیموكراتی كوردستان بویە بەلكو خەبات درێژەپێدانا كاروانێ میر مقداد بەدرخان بویە ورێبەرێن دی یێن بزاڤا رۆژنامەڤانی كوردی بویە،ئارمانجا وێ ئاڤاكرنا شكۆیا مرۆڤێ كوردستانێ بویە، وهەردەم دەربرین ژئیش وئازار وخەونێن كوردستانیان كریە وبەرامبەر زولم وستەمێ راوەستایە، زێدەباری مەودایەكی بەرفرەهـبویە ژبو گەشەكرنا هزر و ئەدەبیات وهونەر وداهێنانێ وهەردەم بەشەك سەرەكێ بویە ژ كاروانێ پێشڤەبرنا جڤاكی دهەمی وارەكێ دا.
رۆژناما خەبات قوتابخانەیەكا رۆژنامەڤانی یا كوردستانی یا مەزنە وپێگربویە ب ئیتیكێن رۆژنامەڤانی،وخودان هەلویست بویە هەمبەر نشتمان ومرۆڤایەتێ وب سەدان كەسایەتێن سیاسی و زانا ورەوشەنبیر و رۆژنامەڤانێن خودان شیان دڤێ قوتابخانێ دا پەروەردە بوینە،بیرئینانا خەبات نەك ب تەنێ یادكرنا رۆژنامەیەكا حزبەكێ یە خەبات بەشەكێ گرنگێ دیرۆكێ و ئومێدەكا مەزنە وپاشەرۆژێ.
