سومەییە جەلال: ئەمەوێ‌ زیاتر كاربكەم لەسەر دنیای ناوەوە و بەرەو پێشچوونم لە بواری شیعردا

خەبات: حەمە ئەحمەد جاف:- سومەییە جەلال لە ساڵی 1999 لە شارۆچكەی چەمچەماڵ لەدایكبووەو لە ساڵی 2003 لە شاری كەركوك نیشتەجێیە، خوێندنی سەرەتای و ناوەندی هەر لەو شارە تەواوكردووە، دەرچووی كۆلێژی كشتوكاڵی زانكۆی كەركوكە. ئەو خاتونە بەرهەمی چاپكراوی نیە بەڵام بەرهەمە كانی لە رۆژنامەی (سیروان)ی كەركوك و گۆڤارو رۆژنامە بیانیەكان بڵاوكردۆتەوە هاوكات بەشداری لە چەندین كۆڕو ڤیستڤاڵی شیعریی كردووە ، لەوانە: كۆڕی پێشبڕكێی (كامەران موكری) بۆ شیعری لاوان كەلەلایەن لقی سلێمانی نووسەران ئەنجامدرا ، تیایدا خەڵاتی یەكەمی پێشبڕكێكەی بەدەستهێنا وەك خۆشی گوتەنی: لە تەمەنی دوانزە ساڵییەوە شیعر دەنووسێت و لە ماكدۆنیاش بانگێشتكراوە، بەڵام نەیتوانیوە ئامادە بێت بۆیە لەڕێگای ئۆنلاینەوە بەشداریكردووە.

*پێناسەت بۆ شیعرو شیعریش لای تۆ چی دەگەیەنێت؟
شیعر ڕۆحی زیندوومانەوەی ژیانەو هاوكات هەناسەیەكە پێی دەژیم.
*بۆ شیعرت هەڵبژارد و شیعر چی پێ بەخشیووی؟
هەر مرۆڤێك لەدایكدەبێت تۆوی خەونێكی تیادا چێندراوە، من شیعر، واتە شیعر دنیایەكی دی پێ بەخشیم.
*ئێستای شیعری كوردی چۆن دەبینی؟
ئەمڕۆ دەمترسێنێ شیعر لە داهاتوودا هی ئێمە نەبێت.
*شیعربۆ كێ دەنووسیت و ئامانجت چییە لە نووسیندا؟
لەپێناو زیندوومانەوەم دەنووسم، شیعر زۆر لەوە گەورەتر و پیرۆزترە تایبەت بكرێت بۆ كەسێك. ئامانجم بوون بە شاعیرێكی ڕاستەقینەیە.
*ئاشنایەتیت لەگەڵ كتێب و خوێندنەوە دا؟
كتێب لە خۆراك و جلوبەرگ گرینگترە بۆ من، خوێندنەوە و خوێندنەوە و خوێندنەوە ئینجا نووسین.
*كێ هاوكارو هاندەرت بووە لە نووسیندا؟
مرۆڤگەلێكی باش هاوكار و هاندەرمن. لێرە ناویان ناهێنم ڕەنگە ناهەقی بكەم بەڵام هەمیشە لە بیرەوەریمدا دەدرەوشێنەوە.
*پیرۆزیی خاكی نیشتیمان وگەورەیی شەهیدان لە كوێی شیعرەكانی تۆدان؟
نیشتیمانم لە دڵمدا هەڵگرتوە، دەستە تەزیوەكانی مناڵانی نیشتیمانم ناهێڵن بیبەمە ناو دەقەكانم.
*ڕەنگدانەوەوكاریگەریی مەرگی ئازیزان و كۆچ و جێهێشتنی نیشتیمان لەشیعرو نووسینەكانتدا؟
ڕەنگدانەوەی هەیە لە دەقەكانم و كاریگەرییەكی زۆری كردۆتە سەر دنیای شیعریم.
*ڕات چییە لەگەڵ ئەو زۆرو بۆریەی شیعر؟
هەوڵێكە بۆ لەناوبردنی شیعر.
*قەڵەمی ژن ، لە نووسین و شیعردا چۆن دەبینی و تاچەند ئەوقەڵەمە بۆتە چەكی داكۆكیكار لە مافەكانیان و چارەسەری كێشەكانیان؟
خۆشبەختانە خاوەن قەڵەمی باشین، دەتوانم بڵێم ژن ئەمڕۆ پانتاییەكی زیاتری داگیركردوە لەچاو ڕابردوو. بەڵام هێشتا نەمانتوانیوە باش دەربڕین لە برین و ئازاری ژنبوونمان بكەین، بۆیە هەوڵێك نەبووە بۆ چارەسەری پرسی ژن.
*كەخەڵاتی یەكەمی كۆڕی پێشبڕكێی (كامەران موكری) ت بۆ شیعری لاوان بەدەستهێنا، هەستت بە چ خۆشییەك كرد؟
هەستم بە خۆشییەكی زۆر كرد بۆیە لێرەوە ئەڵێم: سوپاس بۆ لقی سلێمانی یەكێتی نووسەران بۆ ئەنجامدانی ئەم چالاكییە جوانە، دڵخۆشبووم كە بەدیداری كۆمەڵێك مرۆڤی جوان گەیشتم و خەڵاتەكەش بە هی دەقەكەم دەزانم نەك خۆم، دەقیش مناڵی شاعیرە و كێ بێ بە سەركەوتنی ڕۆڵەكانی دڵخۆش نەبێت؟
*سومەییە بۆ؟ بۆ نازناوێك بۆ بڵاوكردنەوەی شیعر دانانێی؟
ناوەكەی خۆمم خۆشدەوێ، مانای “ئاسمان و بەرزییە” و هەڵبژاردەی دایكمە. وە هەروەها ناوی باوكیشم دەمەوێت لە ناوەكەم نەبێتەوە.
*پڕۆژە و بەرنامەی تازەتان چییە؟
پڕۆژەم كاركردنی زیاترە لەسەر دنیای ناوەوەم و بەرەوپێشچوونم لە بواری شیعر، دوای ئەوەش بەنیازم ئەمساڵ بەشداری خەڵاتی نووسیار بكەم كە بۆ چاپكردنی كتێبە،پاشان دەمەوێ هەڵسەنگاندنی باش بۆ بەرهەمەكانم بكرێ، ئینجا بڕیاری چاپكردنی كۆمەڵە شیعرێكم بدەم.