لە دیمانەیەكیدا بۆ پێگەی فەرمی حكوومەتی هەرێمی کوردستان، مەولود سابیر، بەڕێوەبەری گشتی بانکە بازرگانییەکان لە هەرێمی كوردستان چەندین زانیاریی دەخاتەڕوو و دەڵێت: “ئێمە ئەندام بین لە بانكی ناوەندی عێراقی و بە یاسا مۆڵەت وەربگرین، ئەو كاتە بانكی ناوەندی عێراقی ڕێژەیەك لەو دۆلارە دەداتەوە بە بانكی نیشتمان و ئێمەش لە هەرێمی كوردستان دەیخەینە بازاڕ، وه‌رگرتنی دۆلار له بانكی ناوه‌ندی عێراقی و خستنه بازاڕی هه‌رێمی كوردستان ده‌بێته هۆی دابه‌زینی نرخی دۆلار.”
کارەکانى بانكی نیشتمان بە کوێ گەیشتووە؟
مەولود سابیر:بانكی نیشتمان بانكێكی حكومییە، بە یاسای بانكی ناوەندی عێراقی دادەمەزرێت، ڕێكارەكانی دامەزراندنی دەست پێ كراوە و كارەكانی لە هەرێم بە سەرمایەى نزیک بە ٢٥٠ ملیار دینار كۆتایی هاتووە، و ٢٥ ملیار دیناریشمان بە کاش لە بانكی ناوەندی عێراقی لە هەولێر داناوە، تەنیا لەسەر بانكی ناوەندی عێراقی ماوەتەوە كە مۆڵەتمان پێ بدات بۆ ئەوەی كارەكانمان ئەنجام بدەین و دەست پێ بكەین.
سوودی بانكی نیشتمان بۆ هاووڵاتیان چییە؟
مەولود سابیر:كە مۆڵەت لە بانكی ناوەندی عێراقی وەردەگرین، واتە هەموو ئەو كارانەی بانكی ناوەندی عێراقی ئەنجامی دەدات لە رووی رێنمایی و یاساوە ئێمەش لە بانكی نیشتمان جێبەجێی دەكەین، سوودەکەشى ئەمانەن:
ـ گشت پێشینەكان بۆ هاوڵاتیانی هەرێم دەكاتەوە.
ـ دەرگا وڵا دەكات تا بانكەكانی هەرێم بكرێنە سیستەم.
ـ واڵاکردنە دەرگا بەڕووی دەرەوە و جیهان
ـ کارکردن لەگەڵ ئەو بانكە نێودەوڵەتیانەی ئێستا كارمان لەگەڵ ناكەن
ـ لە هەرێمى کوردستان ٩٤ بانك هەیە، بە کردنەوەى بانكی نیشتمان، ڕێژەی بەشێک لە فەرمانبەران كەم دەبێتەوە.
ـ بانكی نیشتمان ده‌بێته دەرگایەک بۆ وه‌به‌رهێنه‌ران و دروستبوونی متمانە بۆ وه‌به‌رهێنه‌رانی بیانی.
ـ مانگانە ٥٠٠ ملیۆن دۆلاری پاره‌ی نه‌وت لە ڕێگەى بانکە ئەهلییەکانەوە بۆ مووچه‌ی فه‌رمانبه‌ران خه‌رج ده‌كرێت، بانکى نیشتمان ئەمەش چارەسەر دەکات.
بوونە ئەندامى بانکى ناوەندى عێراق چ سوودێکى هەیە؟
مەولود سابیر: ئێستا بەهای دۆلار رۆژانە لە بەرزبوونەوەدایە، هەموومان دەپرسین ئایا هۆكار چییە، هۆكارەكەی ئەوەیە بانكی ناوەندی ڕێژەیەكی كەم دۆلار دەخاتە بازاڕ، ئەگەر ئێمە ئەندام بین لە بانكی ناوەندی عێراقی و بە یاسا مۆڵەت وەربگرین، ئەو كاتە بانكی ناوەندی عێراقی ڕێژەیەك لەو دۆلارە دەداتەوە بە بانكی نیشتمان و ئێمەش لە هەرێمی كوردستان دەیخەینە بازاڕ، وه‌رگرتنی دۆلار له بانكی ناوه‌ندی عێراقی و خستنه بازاڕی هه‌رێمی كوردستان ده‌بێته هۆی دابه‌زینی نرخی دۆلار.
