شەیما مستەفا
سالەك لسەر دەست بكاربوونا ئیدارەیا سەربخۆیا زاخۆ دەرباز دبیت، هەلبەت بڕیارا ئیدارەیا سەربخۆیا زاخۆ ئاكو ژلایێ مەسروور بارزانی بارزانی سەرۆكێ حوكمەتا هەرێما كوردستانێ ڤە هاتیە دەركرن، دەستكەفتەك مەزنە ژبۆی خەڵكێ دەڤەرا زاخۆ بگشتی، ژبەركو د دیرۆكا عێراقێ دا زاخۆ پێگەهەكێ سیاسی و كۆمەڵایەتی و ئابوریێ گرنگ هەیە و 150 سالن زاخۆ ب فەرمی بویە قەزا، گرنگی دانا حوكمەتا هەرێما كوردستانێ ب دەڤەرا زاخۆ بۆ دو ئەگەران ڤەدگەڕیت یا ئێكێ، بۆ ئەڤی پێگەهێ گرنگێ سیاسی و ئابوری و كۆمەلایەتی یا دویێ ژی، بجه ئینانا خواستێن خەلكێ زاخۆیە، چونكە د هەموو شۆرش و سەرهەلدانێن كوردی زاخۆ ل پێشیا وان دەڤەران بوویە یێن پشكداری د بزاڤا رزگاری خوازا كوردی كریە و دیرۆكا سەد سالێن بۆری یا زاخۆ شاهدە ژبۆی ڤێ قوربانی دان و خەباتا خەلكێ زاخۆ پێشكەشی كوردایەتیێ كریە، وەك بەرسیڤەك بۆ وان خواستێن خەلكێ زاخۆ هەنە، سالەكێ بەریا نوكە بڕیارا ئیدارەیا سەربخۆیا زاخۆ ژلایێ سەرۆكێ حوكمەتا هەرێما كوردستانێ هاتە دەركرن و بەردەوام زاخۆیی دبێژن مە زۆر كریە و كێم بەر زاخۆ كەفتیە، بەلێ دەركرنا بڕیارا ئیدارەیا سەربخۆیا زاخۆ ئەگەر هەمووژی نەبیت، لێ پشكەكا داخوازیێن خەلكێ دەڤەرێ دێ بهێنە بجه ئینان، كو سەركردایەتیا كوردی و سەرۆك بارزانی بازرانی ب خوە شاهدیێ بۆ قەهرەمانیا خەلكێ زاخۆ ددەن.

هەبوونا ئیدارەكا سەربخۆ تنێ بڕیارەك ئیداری نینە بۆ ڤەكرنا هژمارەك فەرمانگەهێن حوكمەتێ و دانانا چەند كەسەكا وەك فەرمانبەر بۆ رێڤەبرنا ئیدارەیا سەربخۆیا زاخۆ، بەرۆڤاژی چەندی ژلایێ مەعنەوی بڕیارا ئیدارەیا سەربخۆ گرنگی هەیە، ژلایێ خزمەت گوزاریانژی زێدەتر گرنگیا خوە هەیە، ئەز باوەرم بڕیارا ئیدارەیا سەر بخۆ دێ پێگەهێ زاخۆ بۆ قەبارەیەكێ زۆر زێدەتر بلند كەت، ژبەركو ئەگەر ئەم ژلایێ خزمەت گوزاری بەرێ خوە بدەینە زاخۆ پشتی دەست بكاربوونا ئیدارەیا سەرخۆیا زاخۆ 115 پڕۆژەیێن خزمەت گوزاری كەفتینە بیاڤێ بجه ئینانێ دا، ئەڤەژی هژمارەكا كێم نینە بۆ زاخۆ ددەمێ سالەكێ دا سەرەڕای ئەڤان هەموو قەیرانێن هەرێما كوردستانێ هەنە، هەروەسا ژلایێ سیاسی و كارگێڕی ڤە زاخۆ راستەوخۆ ب سەرۆكایەتیا جڤاتا وەزیران هاتیە گرێدان و وەك پارێزگەهەك سەرەدەری دگەل ئیدارەیا سەربخۆیا زاخۆ دهێتەكرن، ڤەكرنا هژمارەك رێڤەبەرایەتیێن گشتی دێ كاریگەری لسەر بیاڤێ كارگێڕی هەبیت و ئیدی وەلاتی هەر ل زاخۆ دێ شێن كارۆبارێن خوە بڕێڤەببەن.

دانانا ستافەكێ كارا بۆ ئیدارەدانا زاخۆ پێنگاڤەك هەژیە و جهێ رازیبوونا وەلاتیێن زاخۆیە، بتایبەتی دلسۆزی و وەستیانا گۆهدار شێخۆ وەك سەرپەرشتێ ئیدارا سەربخۆیا زاخۆ رەنگڤەدان هەبوویە لسەر رێڤەبرنا هەموو كەرت و بیاڤێن ئیداری رێكخستنەڤا زاخۆ د هەموو واراندا، سەرپەرشتێ ئیدارێ بخوە ئێكە ژوان كەسێن هەرە ماندی و دلسۆزێن زاخۆ، ئینانە پێشا كەسێن گەنج نموونا سەركەفتنێ یە بۆ حوكمەتا هەرێما كوردستانێ و زۆر جارا بەرپرسێ ئێكێ ب هاریكاری و بودجەیەكێ زۆر كێم خزمەتێن مەزن پێشكەش دكەت، پشتی سالەكێ دەست بكاربوونا سەرپەرشتێ ئیدارا زاخۆ خویابو هەبوونا كەسێن دلسۆز چەند یا گرنگە بۆ رێڤەبرن و ئیدارەدانا حوكمەتێ، چەند بودجە بۆ زاخۆ بهێتە مەزاختن و چەندی بڕیارێن گرینگ هەبن ئەگەر كەسێن دلسۆز نەبن ل ئیدارەدانا زاخۆ جهێ خوە ناگریت، زاخۆیا ئەڤرۆ زۆر جودایە ل زاخۆیا بەری ئیدارەیا سەربخۆ لسەر ئاستێن بلند هەموو داخوازیێن خەلكێ زاخۆ بەرچاف دهێنە وەرگرتن و سەرەڕای دەست خۆشیێ بۆ سەرۆكێ حوكمەتێ و ستافێ رێڤەبرنا ئیدارا زاخۆ بۆ ئەڤان بڕیاران بۆ گرنگیدان ب ئیدارەیا سەربخۆیا زاخۆ، خەلكێ زاخۆ هێشتا هەژی خزمەتێن زێدەترن، هیڤیێن زاخۆیان هێدی هێدی دبنە بەرهەم و ددەمێ ئێك سالدا بەرهەمێ ئیدارەیا سەربخۆ دەركەفت.