خەبات:سەید فاتیح بەرزنجی:- نزیكەی ساڵێكە كێشەی كەمی غاز هەیەو بەهەوڵ و كۆششی لایەنە پەیوەندیدارەكان كارگەی غازی هەولێر توانیوویەتی تا ڕادەیەك ئەو كێشەیە چارەسەر بكات.لەلایەن قایمقامیەتی قەزای ناوەندی هەولێرەوە هەموو بریكارەكانی غاز پۆلیسیان بۆ دابینكرا تا ئەو بریكرانە بەشێوەیەكی یەكسان بەشە غازەكە بەسەر هاووڵاتیان دابەش بكەن، لە ئێستایشدا دابەشكردنی غاز بەكۆبۆن بەپێی پسوولەی خۆراك بەردەوامە.

سەرپەرشتیاری دابەشكردنی غاز: بەكۆبۆن كەس لە بەشە غاز بێبەش نابێت
سەرپەرشتیاری دابەشكردنی غاز لە قایمقامیەتی قەزای ناوەندی هەولێر گوتی: لەبەر كەمی غازی شل كێشەی كەمی غاز پەیدا بووە، بۆیە بەهاوكاری قایمقامیەتی قەزای ناوەندی هەولێر توانرا دابەشكردنی غاز چاودێری بكرێ بۆئەوەی هاووڵاتیان گلەیی و گازاندەیان لە دابەشكردنی غاز نەبێت بۆ ئەو مەبەستە پۆلیسمان لەگەڵ ئوتومبیلەكانی غاز دانابوو، تا لەنزیكەوە بەهاوكاری موختاری گەڕەكەكانی شاری هەولێرو پۆلیسی قایمقامیەت ئەو بەشە غازەی كە دەدرێتە بریكارەكانی غاز بەیەكسانی بگاتە ماڵان و غازەكانیش بە دوكانداران بە گرانتر نەفرۆشرێ و ماوەی چەند ڕۆژێكیشە دابەشكردنی غاز بۆتە كۆبۆن و هەموو ماڵێكیش بێ‌ غاز نابێت و هەر بریكارێكیش سەرپێچی بكات ئەوا بەپێی یاسا مامەڵەی لەگەڵدا دەكرێت ئەگەر هاتوو سەرپێچیكەی دووبارە بكاتەوە ئەوا ئەو بریكارە پێ‌ بژاردنی بۆ دەكرێت بۆئەوەی كارەكان بەباشی بەڕێوەبچێت ئێمە لە قایمقامیەت بەدواداچوون بۆ داەبشكردنی غاز دەكەین و هەر هاووڵاتیەكیش ئەگەر هاتوو گلەیی و گازاندەی هەبوو ئەوا دەتوانێ‌ پەیوەندی بە قامیمقامیەتی هەولێرەوە بكات تا بەدواداچونی بۆ بكەین وهەر بریكارێكیش سەرپێچی كردبێت ئەوا ئیجرائاتی پێویستی لەگەڵدا دەكرێت لێرەوە سوپاسی كارگەی غازی هەولێر دەكەین كە هاوكارو پاڵپشتی ئێمە بووە.

بریكارانی غاز قسەی خۆیان هەیە
زریان عەبدولسەلام بریكاری دابەشكردنی غاز لەگەڕەكی شۆڕش گوتی: لە ئێستادا كێشەی دابەشكردنی غاز بەشێوەیەكی بەرچاو چارەسەر كراوەو كۆنتڕۆڵ كراوە لەبەر ئەوەی هاووڵاتیان هەر 15 ڕۆژ جارێك پسولەی خۆراكەكەی خۆی بۆ بریكاری گەڕەكەكەی دەهێنێت و لەلایەن بریكاری غازەكەی خۆی مۆری بۆ لێ‌ دەدرێت و لە15 ڕۆژی دواتر غازی دووەم دێنێت و غازی دواتر وەردەگرێت واتا هاووڵاتی بۆی هەیە لەیەك مانگدا دوو بوتڵ غاز وەربگرێت بەو شێوەیە هاووڵاتیان دەتوانن لە بەشە غاز بێبەش بن و غاز بە گرانتر لەبازاڕدا نەكڕن بۆ ئێستا ئەو دابەشكردنە زۆر باشە ئەگەر سەرما دابێت ئەوا غاز لە وەرزی زستانیشدا زۆر سەرف دەكرێت و سكاڵاكان تا ڕادەیەك ڕووی لە كەم بوونەوە كردووە هۆكارەكەی بۆ دابەشكردنی غاز بە كۆبۆن ئەوە چارەسەرێكی زۆرباشە و ئەوانەی كە گلەیی دەكەن گلەەییەكەیان زۆر كەم بۆتەوەو لەوەتەی بۆتە كۆبۆن بریكارەكانی غاز كێشەیان كەم بۆتەوە و ئەوانەی كە دوكانداریشن ناتوانن سوود لە غازی حكومی بكەن چونكە غازی ماڵان بە كۆبۆنەو بۆ هەر هەفتەیەك چوار جار غاز وەردەگرین هەرجارەی 70 بوتڵە غاز وەردەگرین و دابەشی سەر ماڵانی دەكەین.

دواتر هەژار فاتح كەریم گوتی: پێشتر گلەیی و گازاندە هەبوو لەسەر كەمی غاز بەڵام لە ئێستادا ئەو گلەیی و گازاندانە ڕووی لە كەم بوونەوە كردووەو دابەشكردنی غاز بۆتە كۆبۆن و بۆ هەر ماڵێك لە یەك مانگدا هەرهاووڵاتیەك بۆی هەیە دوو بوتڵە غازوەرگرێت و كێچەی كەمی غاز بەشێوەیەكی بەرچاو كەم بووە لەبەر ئەووی پێشتر هاووڵاتی 4-5 غازی پڕ دەكرد، ئێستا ئەوە نەما لە مانگێكدا بۆتە دوو بوتڵە غاز جاران كێشەمان هەبوو لەگەڵ ئەوەش كێشەی كەمی غاز هەبوو ئێستا سیستەمی دابەشكردنەكە بۆتە كۆبۆن و كارەكان بە ڕێكوپێكی بەڕێوە دەچێت.

سەید محەمەد بریكاری غاز لە مەنتكاوە گوتی: بەر لە هاتنی سیستمی كۆبۆن لەگەڵ موختاری ئەو گەڕەكە كاری دابەشكردنی غازمان دەكردو بەشێكی زۆری هاووڵاتیان گلەییان هەبوو ئێمە بەو چەن بوتڵە غازەی كە وەرمان دەگرت نەماندەتوانی غاز بە هەموو ماڵێك بدەین، بەڵام لەوەتەی بۆتە كۆبۆن كێشەكان زۆر كەمیان كردووەو بۆ یەك مانگ هاووڵاتیان بە كۆبۆن بۆیان هەیە دوو بوتڵە غاز وەرگرن وئێمەش ماندوو بوونەكەمان كەمتر بۆتەوە.