سلێمانی.. زۆرینەی خانووە كەلەپوورییەكان لە بەردەم مەترسی داڕماندان

17

خەبات: عەلی بانیشاری:- لە شاری سلێمانی زۆرینەی خانووە كەلەپوورییەكان كە ژمارەیان نزیكەی 2000 خانوو دەبێت لە بەردەم مەترسی خاپووربووندان و بەڕێوەبەری بەشی كەلەپوور لە بەڕێوەبەرایەتی شوێنەوار و كەلەپووری سلێمانیش دەڵێت: بەهۆی ئەو قەیرانە داراییەی كە لە ساڵانی رابردوودا رووی لە هەرێمی كوردستان كرد، نەتوانراوە خانووە كەلەپوورییەكانی سلێمانی نۆژەن بكرێنەوە. بەپێی ئاماری بەڕێوەبەرایەتییەكە، لە ئێستادا 17 خانووی كەلەپووری موڵكی شوێنەواری سلێمانین و 103 خانووی دیكەش دەستنیشانكراون بۆ ئەوەی حكوومەت بیانكڕێتەوە.

رەوا كەریم، بەڕێوەبەری بەشی كەلەپوور لە بەڕێوەبەرایەتی شوێنەوار و كەلەپووری سلێمانی بە (خەبات)ـی راگەیاند: لە شاری سلێمانی نزیكەی 2000 خانووی كەلەپوری لە حەوت گەڕەكی شارەكەدا ماونەتەوە كە گرنگی تەلاسازیی و مێژووییان هەیە. گوتیشی: لەو ژمارەیە 17 خانوویان بوونەتە موڵكی بەڕێوەبەرایەتی شوێنەوار و كەلەپووری سلێمانی و حەوت لە خانووەكان لەلایەن پارێزگای سلێمانی و لە ژێر چاودێری بەڕێوەبەرایەتی شوێنەواری سلێمانی نۆژەنكراونەتەوە و ئێستا وەكو مۆزەخانە و هۆتێل و قاوەخانە سوودیان لێ دەبینرێت.

ئەوەشی گوت: بێ لە نۆژەنكردنەوەی ئەو حەوت خانووە، چوار خانووی دیكەش دیاریكراون بۆ ئەوەی نۆژەن بكرێنەوە، بەڵام بەهۆی نەبوونی بودجەوە كاری نۆژەنكردنەوەكە دواكەوتووە، ئەوەش وایكردووە لە لێواری داڕووخان نزیك ببنەوە. ئاماژەی بەوەشدا، لە نێو خانووە كەلەپوورییەكانی سلێمانیدا 103 خانوو كە گرنگی مێژوویی و تەلارسازییان هەیە دەستنیشانكراون بۆ ئەوەی حكوومەت بیانكڕێتەوە و ببنە موڵكی بەڕێوەبەرایەتی شوێنەواری سلێمانی، بەڵام بەهۆی نەبوونی بودجەوە كڕینەوەی خانووەكان دواكەوتووە، بەو هۆیەوە مەترسی داڕمانیان لێ دەكرێت.

زیاتر گوتی: دۆخی خانووە كەلەپوورییەكان باش نییە و ئەگەر بەدەمەوەچوونی بەپەلە نەبێت بۆ نۆژەنكردنەوەیان بەشێكی زۆریان دادەڕمێنن. رەوا كەریم دەڵێت: پێویستە پارێزگاری لە خانووە كەلەپورییەكان بكرێت و چۆڵ نەكرێن، چونكە زۆرینەی ئەوانەی چۆڵ كراون تووشی زەرەوزیان بوون. ئەو دەشڵێت: ئەو هاووڵاتیانەی لە خانووەكانیان ماون بیر لەوە دەكەنەوە چۆڵی بكەن، روونیشە بە چۆڵكردنیان تووشی داڕمان دەبن، بۆیە دەبێت وا لە هاووڵاتیان بكەین بگەڕێنەوە بۆ خانووەكانیان و ئەو گەڕەكانە بپارێزرێن و ساڵانە نۆژەن بكرێنەوە، بێگومان ئەوەیش بە دەستگیرۆیی خاوەن خانووەكان دەبێت لەلایەن حكوومەتەوە.

بەڕێوەبەری بەشی كەلەپوور لە بەڕێوەبەرایەتی شوێنەوار و كەلەپووری سلێمانی هەروەها گوتیشی: پێشنیار دەكەین حكوومەتی هەرێمی كوردستان مانگانە یاخود ساڵانە شتێك پارە بدات بەو هاووڵاتیانە بدات كە خانوونیان لە حەوت گەڕەكە كەلەپوورییەی شاری سلێمانی هەیە، ئەوەش وەكو پاڵپشتییەك بۆ ئەوەی لەوێ بمێنێنەوە و خانووەكانیان چۆڵ نەكەن و بیپارێزن.

ناوبراو باسیلەوەشكرد، حكوومەت هاووڵاتیانی گەڕەكە كەلەپوورییەكانی پابەندكردووە بەوەی لە خانووەكانیان بمێننەوە و نەیفرۆشن و نەڕوخێنن و دروستی نەكەنەوە و خۆشی لێیان ناكڕێتەوە و هیچ هاوكارییەكی دارایشیان ناكات. وەكو ئەو دەڵێت: هاوكارینەكردنی خاوەنی ئەو خانووانە گرفتی زۆری بۆ ئێمە دروستكردووە و رۆژانە خەڵك سەردانمان دەكات، بۆ نمونە خانوومان هەیە 25 ساڵە خاوەنەكەیمان راگرتووە و ناهێڵین دەستكاری بكات و بیڕوخێنێت، چونكە خانووەكەمان داناوە بۆ كڕینەوە، ئێمەش وەكو بەڕێوەبەرایەتی شوێنەواری سلێمانی پابەندین بە یاسایەوە كە نابێت ئەو خانووانە لەلایەن خاوەنەكانیانەوە دەستكاری بكرێن.

سەبارەت بە چۆنییەتی نۆژەنكردنەوەی خانوو لە گەڕەكە كەلەپوورییەكانی شاری سلێمانی؟ رەوا كەریم گوتی: لیژنەیەكمان لە بەڕێوەبەرایەتی شوێنەوار و كەلەپوووری سلێمانی و قایمقامیەتی سلێمانی پێكهێناوە، ئەو هاووڵاتیانەی دێنە لامان و دەیانەوێت خانووەكانیان نۆژەن بكەمەوە یان بیڕوخێنن، وەكو لیژنەكە دەردەچین و هەڵسەنگاندن بۆ خانووەكە دەكەین ئەگەر رەگەزی تەلاسازی گرنگی هەبێت و لە رووی مێژووییەوە كەسایەتییەكی گرنگی تێدا ژیابێت و رووداوێكی مێژووی تێدا روویدابێت، ئەوە بەهیچ شێوەیەك رێگە بەو هاووڵاتییە نادەین دەستكاری خانووەكەی بكات و دەبێت وەكو خۆی بمێنێتەوە، لە حاڵەتێكدا ئەگەر خاوەن موڵك خۆی رازیبوو بە نۆژەنكردنەوەی خانووەكەی ئەوە دەبێت لە ژێر چاودێری بەڕێوەبەرایەتیمان دەست بكات بە كارەكەی، ئەوەیش بە بەكارهێنانی كەرەستە و نەخشەی رێگەپێدراو، خۆ ئەگەر خانووەكەش هی كەسێكی ئاسایی بوو ئەوا لیژنەكە بەهەمان شێوە هەڵسەنگاندن بۆ خانووەكە دەكات و ئەگەر بینی بە بلۆك دروستكراوە و كەوتووەتە چوارچێوەی حەوت گەڕەكە كەلەپوورییەكە، رێنماییەكانی ناوەندی شاری بەسەردا جێبەجێ دەكرێت، بەپێی رێنمایەكەش دەبێت هەمان كەرەستەی كۆن بۆ نۆژەنكردنەوە بەكاربهێنێتەوە كە ئەوەیش بریتییە لە (خشتی سووركراوە و بەردی مەڵكەنی).

دڵنیایی ئەوەشدا، هەر كەسێك سەردانی بەڕێوەبەرایەتی شوێنەوار و كەلەپووری سلێمانی بكات بۆ نۆژەنكردنەوەی خانووەكەی كارئاسانی بۆ دەكەن و بۆ ئەو مەبەستەش هانی هاووڵاتیان دەدەن خانووەكانیان نۆژەن بكەنەوە. بەڕێوەبەری بەشی كەلەپوور لە بەڕێوەبەرایەتی شوێنەوار و كەلەپووری سلێمانی دووپاتیكردەوە، كار بۆ ئەوە دەكەن پارێزگاری لە گەڕەكە كەلەپورییەكانی سلێمانی بكرێت و وەكو خۆیان بمێننەوە.