بارزانی لە روانگەی هەژاری زاناوە

16

زاهیر ئەحمەد سەوز- سلێمانی
دەگوترێ (ئەنجامی تاقیكردنەوەی سەختی نیشتمانپەروەری و سووربوون لەسەر مافی رەوای میللەت، لەكۆتایی ژیاندا جاڕی سەركەوتنی بۆ ئەدرێ)، ئەم گوتەیەش رەوایە و مێژوو و رۆژگار راستییەكەی سەلماندووە.

چەندین كەس لەدوا قۆناغی ژیاندا لەو تاقیكردنەوەیەدا سەرنەكەوتوون و هەشە لەدوا چركەی ژیاندا ئەو خەڵاتەی دەستگیر بووە و سەربەرزانە گیانی لەدەست داوە. ئەوەی جێگەی فەخر و شانازیی میللەتی كوردە و شوێن متمانە و دڵنیایی شاعیر و زانا و پسپۆڕ و زمانزان و سەرجەم میللەتی كوردە، (بارزانیی نەمر) هەر لەسەرەتای ژیانیەوە لەلای منداڵی نەتەوەی كورد و ساكارترین مرۆڤی ئەم میللەتە و زاناترین كەسی ئەم سەردەمە ئەوە بووە، كە بارزانی شۆڕشگێڕ و خەباتگێڕ و سەركردەیەكی بێ هاوتا و ماندوونەناس بووە.

مێژووی نوێ مرۆڤێكی وەك (بارزانی) بەخۆیەوە نەبینیوە. ئەم شۆرەتە سەلما و رووی گەشی شیعرەكانی (هەژار) لە ئاسمانی گەشی كوردستاندا، سەربەرزانە هاوار دەكا و دەڵێ: ”ئەوەی قەڵەمەكەمم بۆ تەرخان كرد و كردمە هەوێنی شیعرەكانم، ئەوەی گوتم هێشتا لەئاستی گەورەیی و نەمریی (بارزانی) كەم و زیاتری هەڵ ئەگرت“.

مێژوو و رۆژگار، مەیدانی خەبات، تاقیكردنەوە، كوردایەتی، قسەكانمی سەلماند و شیعرەكانمی لە بۆتەی داوێنپاكی و نەفسبەرزی و سەربڵندیی ئەم مرۆڤە شۆڕشگێڕەدا تاقی كردەوە و راستی و حەقیقەتی شیعرەكانمی سەلماند.

شاعیر و زانا و زمانزانێكی گەورەی وەك (هەژار موكریانی)، ئەگەر لە گەورەیی و نیشتمانپەروەری و كوردایەتی و خەباتی بێوچان و شۆڕشگێڕیی (بارزانی) دڵنیا نەبوایە، تا سەر لەم رێچكەیە بەردەوام نەدەبوو، بۆیە فەرموویەتی:
تۆ لە ئاسمانی پیاوەتی خۆری
هەموو ئازا كەمن ئەتۆ زۆری
تیشكی تۆ هەر بينا سەری داوە
ناوی تۆ هەتا هەتایە هەر ماوە

هەر زانا و دانا و پسپۆڕێك، كە دەست ئەداتە پێنووسەكەی و وەڕگێڕان و لێكۆڵینەوە و فەرهەنگ دانان و شیعر دەكاتە هەوێنی نووسینەكانی و لەسەر مورید و دەروێش و خەڵوەتەكێش و هەواداری ڕێبازێكی ئایینی و زانستی و كۆمەڵایەتی و ئابووری و سیاسی ئەنووسێ و ڕابەرێكی ئەم ڕێبازانە دەكاتە سەرقافڵە و سەردێڕی نووسینەكانی، ئەگەر سەد دەرسەد نەزانێ ئەو نووسینەی سەركەوتن بەدەست دێنێ و ڕابەریش بەرەو سەركەوتن دەڕوا، ئەوا دەكەوێتە دڵەڕاوكێ و لە ئەنجامیشدا بەر لێپرسینەوە و هێرشی ناڕەوا دەكەوێ، بەڵام (هەژار)ی زانا و دانا، ئەم لایەنەی لا گەش و ڕوون بوو. بارزانیی نەمریش لە ڕێبازی سیاسی و كوردایەتی ڕوونتر و گەشتر.

(هەژار)ی شاعیر، (بارزانی) كردبووە ڕابەر و شوێن قاچی هەڵدەگرت و خەلیفە و گوێ لە مشتی بوو.. سەركردە و ئاوات و خەونەكانی تێدا بەدی دەكرد، مامۆستا و پرسی پێ دەكرد، خاوەن قوتابخانە و لە قوتابخانەكەیدا قوتابییەكی زیرەك و چەلەنگ بوو. بێ گومان تا ئەو موریدە هۆشیارتر و زاناتر و بەهرەمەندتر بێت، ئەو ڕابەر و سەركردە و خەلیفە و مامۆستایە بەهادارترە. لەم ڕوانگەیەوە، زانا و مامۆستا و شاعیر و دانا (هەژاری موكریانی) و ڕوانینی لە (بارزانی) بێ مەڵامەت نەبووە و هەر لەخۆیەوە ئەو ڕێبازەی نەگرتووە و (بارزانی)ی بە پێشەوا و تەلا بوونی نەزانیوە و نەی فەرمووە:
تا مەردایەتی و جوامێری
لە دنیادا قەدری مابێ
ناوی (بارزانی) ون نابێ..
گەورەیی (بارزانی) و هۆشیاریی (هەژار) ئاوێتەی یەك بوون و دەستنیشانكردن و هەڵبژاردنی ئەم مرۆڤە، لە شوێنی خۆیدا بوو. (هەژار) باوەڕی لە خودی (بارزانی)دا نەدۆڕاندووە و ئەو دەستنیشانكردنەی ئافەرین و دەستخۆشی تیا بەدەست هێناوە، لەئەنجامدا، سەركەوتوانە پڕ بە دەم بانگەشەی كردووە و گوتوویەتی:
ئەم وت تاقە ئاوات بۆ (كورد)، (بارزانی)یە و هەر ئەو دەمانگەیەنێتە خواستەكانمان. (هەژار) لەمێژ بوو ئەم حەقیقەتەی لە خودی ((بارزانی)دا بەدی كردبوو و مێژوو ڕاستیی ئەم بۆچوونەشی سەلماند، ئەشێ مرۆڤێكی سادە و ساكار ببێتە هەواداری (كەس)ێك و پارچە هەڵبەستێكی بۆ بڵێ، بەڵام ناگونجێ زانا و زمانزان و مێژوونووس و شاعیر و بەهرەمەندێكی وەك هەژار، لەخۆڕا، بێ تێڕوانین و تاقیكردنەوە و قەناعەت و ڕۆچوون و وردبینی، ببێتە هەواداری (كەس)ێك، كە شایستەی ئەو ڕۆچوونە نەبێ. كەواتە (بارزانیی نەمر) شایستەی ئەو ڕۆچوونەی (هەژار) بووە و (هەژار)یش زیرەكانە ئەو كەسەی دەستنیشان كردووە..
پرسیارە و رەوایە:
تۆ بڵێی خاوەنی پێنج دیوانی شیعریی بەرز، هەروا لەخۆڕا بووبێتە هەواداری (بارزانیی نەمر)؟! تۆ بڵێی خاوەنی (هەنبانە بۆرینە)، بێ بەڵگە و سەلماندن و گەورەیی تێكۆشانی (بارزانی)، شعری (تۆمان هەبێ بەسمانی، بۆ پێشەوە پێشمانكەوە بارزانی) لەخۆڕا گوتبێ؟! تۆ بڵێی خاوەن تەفسیری كتێبی (گب)ی ئیبن سینای حەوت بەرگ، بەهەڵەدا چووبێ و شینی لەخۆڕا بۆ (بارزانی) كردبێ؟! تۆ بڵێی نزیكەی (حەفتا ساڵ) تەمەن و (پەنجا) ساڵ شیعر و سەلیقەی شیعری، نەگەیشتبێتە قەناعەتی تەواو؟ ئەوەی بۆی گوتووە زیاتر دێنێ و مافی ڕەوای خۆی نەداوەتێ؟! ڕووە دیار و ئاشكراكانی سەرجەم بەرهەم و ژیانی (هەژار)، زۆری لەسەر گوتراوە. بەرهەمە چاپكراوەكانی و دەستخەتە بە چاپ نەگەیشتووەكانی، زیاتری پێ ڕاگەیاندووین. مێژووی ژیان و ناو و شوێنی لەدایكبوون و ساڵی لەدایكبوون و ماڵئاوایی و چەرمەسەری و كەمدەرامەتی و هەژاری و ئازارەكانی ڕۆژانەی گوتراوە و نووسراوە، پێی ئاشناین، وەك هەموو شاعیر و زانایەكی كەی كوردی بێ وڵات و ئاڵای دانپێدانراو، لە یەكەم دێڕ و لاپەڕەی بەرهەمەكانی زۆری لەسەر گوتراوە.

(هەژار)ی شاعیر وەك شاعیرانی دیكەی كورد، كەوتووەتە بەر لێزمەی فشار و لێپرسینەوە و راوەدونان و قسە و قسەڵۆكی دوژمنانی (كورد و بارزانی) .
لە ڕۆژانی سەركەوتن و ئازادیی گفتوگۆشدا، مەدالیای فەخر و شانازیی كراوە بە سنگیدا و باوەشی بۆ كراوەتەوە. كەواتە جێگەی ستایشی دۆستان و قسە و قسەڵۆكی دوژمنان بووە.