خوێندن و زانست چۆن بۆ ڕۆڵەكانمان فەراهەم بكەین

36

شوان ئەحمەد
بەدرێژایی مێژوو ئەو میللەت و ، وڵاتانەی گرنگیان بە فێربوون و زانست و زانیاری داوە هەمیشە لەپێشەوەی وڵاتانی تر بوونە لە هەموو ڕوویەكەوە ، پڕۆسەی زانست و فێربوون پێشكەوتن بەچەند مەرجێك دێتەدی ئەویش دەبێت ووڵات بە بارێكی ئاسایشی جێگیر دا بڕوات و لەڕووی ئابوورییەوە جێگیربێ و شەڕ و ئاشوب لەناوچەكە نەبێت وەهەروەها سەقامگیری ئابوری وڵات رۆڵێكی گرنگ و كاریگەری هەیە لەسەر ئەم پڕۆسەیە و جیا لەمانە هۆشیاری كۆمەڵگە پەیوەندییەكی ڕاستەوخۆی هەیە بۆ بەرەو پێشچونی خوێندن، لەهەمان كاتیشدا ئەركی حكومەتیش ئەوەیە گرنكی لە پێشینە بدات بەم كەرتە واتا بەرەو پێشچونی كەرتی پەروەردە و فێربوون ئەركێكی دوو لایەنەیە لە نێوان كۆمەڵگە و حكومەتدا، هەروەكو ڕوون و ئاشكرایە حكومەت دەبێ بوودجەی پێویست فەراهەم بكات لە دابین كردنی پەرتوك و میلاك و هەموو خزمەتگوزاریەكانی پەیوەست بەم بوارە.

خۆش بەختانە سەرەڕای هەبوونی كەمو كوڕی و قەیرانەكان حكومەت لە ڕێگای وەزارەتی پەروەردەوە درێغی نەكردووە لە فەراهەم كردنی پێداویستیەكانی خوێندن ئەوەی دەیبینین ڕوولەباشترە و بەزەقی هەستی پێدەكەین، ئەوەی دەمێنێتەوە كۆمەڵَگەو خەڵكی دامەزراوی ناو ئەو دەزگایەیە كە دەبێ ئەركی سەرشانیان بەجدی و دڵسۆزییەوە جێ بەجێ بكەن هەرچەندە كەسانی دڵسۆز ڕێژەیان زۆرە بەڵام كەسانی كەمتەرخەم و نادڵسۆز پێم وایە ڕێژەكەیان كەم نییە، هەربۆیە ئەوەی ئێستا من مەبەستمە زیاتر بەڕوونی باسی لێوە بكەم ئەوەیە دڵسۆزی بۆ وڵات و خۆشەویستنی وڵات زۆر لەكەم و كوڕیەكان ناهێڵێت بۆنمونە ئەگەر پێویست بێت قوتاخانەكەمان پاكبكەینەوە ئەوا بەبێ ئەوەی كرێكار بگرین و تانكەری ئاو بكڕین ستافی مامۆستایان و فەرمانبەرانی بەهەماهەنگی دەتوانن بەم كارە هەڵسن بەبێ ئەوەی بڕە پارەیەك لەبەردەست بێ یان خەرجبكەن تەنها كەمێك ئەرك كێشانە، هەرچەندە لەدەیان قوتابخانە ئەو هەماهەنگییەم بەدی كردوە، لایەنێكی تری بەردەوام بونی پڕۆسەی فێركردن دەبێت لەلای بەرپرسانی پەروەردەش زۆر بەگرنگی و خەمخۆرانەوە تێیبڕوانن كە لەهەموو ئاستەكانی وەكو بەڕێوەبەرایەتی پەروەردەی پارێزگاكان و بەڕێوەبەری پەروەردەی قەزاكان.

هەمیشە دەبێت لە هەوڵی ئاسانكاری و دابین كردنی خوێندن بن بەهەرنرخێك بێت تەنانەت ئەگەر یەك تاكە قوتابیش لەشوێنە دوورەدەستەكان و گوندەكان بێت هاوكار و هەماهەنگبن، لەكۆتایی دا پێویستە لەكەرتی گشتی و بەتایبەت پەروەردە پێوەری دڵسۆزی و پێشینەی ئەو كەسانەی لەو بوارە كاردەكەن هەبێت بۆیە تكاكارم لە مامۆستایان و فەرمانبەرانی پەروەردە ئەم ئەركە پیرۆزە بە ئەمانەتەوە بپارێزن و دڵسۆزانە هەرلەوانە ووتنەوە وگەیاندنی بابەتەكان بەڕوونی بۆ قوتابیان و ئەمانەتی تاقیكردنەوە و دادپەروەری لە پێدانی نمرە و هەڵسەنگاندنی قوتابی درێغی نەكەن، وەهەروەها بەرپرسانی دەزگا و ناوەندە پەروەردەییەكان لە دابەشكردنی میلاك و خزمەتكردنی قوتابی ماندونەناسانە هەوڵی خۆیان بدەن.