سەباح بەیتۆڵا
هەمی میللەت شانازیێ ب رێبەر و سەركردەیێن خۆ دكەن ئەوێن هەمی ژیانا خۆ بۆ رزگاریا گەلێ خۆ تەرخان كری.
ئەو سەركردە ژی دبنە هێما و ناسناما گەلێ خۆ و ل دیروكا مروڤایەتیێ گەلەك رێبەر و سەركردا د هەمبێزا خودا دگریت .
میللەتێ هندستانێ شانازیێ ب نەهروی و گاندی دكەن.
هوشمین و جیڤارا و چرچل ل ناڤ میللەتێن خۆدا جهێ رێز و حورمەتەكا گەلەكا مەزنن و خەباتا وان بخۆ كریە رێبازەك و ل سەر دچن ، یان گەلەك ئاخفتن و نڤیسینێت زانا و بلیمەتێت وان بۆ خۆ كرینە سەر مەشق و رێباز و ل سەر دچن ژ وانا ژی دوعایا فەیلەسوفێ هندستانێ تاغوری و گەلەكێن دیتر، ئەو میللەتێن بڤی رەنگی رێزێ ل رێبەر و سەركردە و زانایێت خۆ دگرن ، ئەو ژی جهێ رێز و حورمەتا میللەتێن دونیایێ نە.
ئەگەر بەرپەرێت دیروكا مروڤایەتیێ هەلدەینەڤە و بەرێ خۆ بدەینێ دێ بینین چ زولم و زورداری دەرهەقێ میللەتێ كورد هاتیە كرن و گەلێ كورد قوربانیەكا گەلەك مەزن دایە ، هەتا شیایە گەردەنا روژا ئازادیێ و رزگاریێ ماچی بكەت، دناڤ میللەتێ كورد دا چەندین رێبەر و سەركردە و شورەشگێر پەیدا بووینە و گیانێ خۆ ژ بوونا رزگاریا وێ كرینە قوربان و گوری مینا :- قازیێ پێشەوا ، شێخ سەعیدێ پیران ، شێخ عەبدۆڵسەلامێ بارزانی ، شێخ ئەحمەدێ بارزانی ، شێخ مەحمودێ حەفید ، مستەفا بارزانیێ نەمر.
یا مەبەست ئەوە دڤێ پەیڤێ دا بەحس بكەین بارزانیێ نەمرە وەكو رێبەرێ تەڤگەرا رزگاریخوازیا كوردستانێ ئەوێ پتر ژ (٦٠) ساڵان خەبات كری و روژەكێ ژ روژان رامانا پەیڤێت ماندیبوونێ و ترسێ و مرنێ نەزانییە و هەمی ئومێدا وی رزگاری و سەرفیرازیا كورد و كوردستانێ بوویە.
– پرسیارا دیروكێ بكەن و بێژنێ تە كی سەركردە دناڤ بەرپەرێت خۆدا ب سەربلندی تومار كریە.
– پرسیارا دەرگەهێت زیندانێ و شفشێن ئاسنی بكەن و بێژنێ كی سەركردە بوویە دژیێ (٣) ێ سالیێ دا دزیندانێ دا شیر ڤەخاری و هی بوویە پەیڤێت سەرهەلدانێ و بەرخۆدانێ.
– پرسیارا پەیڤێت فیداكاریێ و دلسوزیێ و خۆگوریكرنێ و خەبات و رزگاریێ و سەرفیرازیێ و سەربەستیێ بكەن و بێژنێ كی سەركردەی دگەل هەوە هەڤاڵ و هەڤ چەرخ بوویە.
– پرسیارا سەروكانیا كوردایەتیێ بكەن و بێژنێ كی سەركردەی پتر قەستا تە كریە و داخوازا ماچی كرنا رۆژا سەربەستیێ كریە .
– پرسیارا چیایێن كوردستانا مەزن بكەن و بێژنێ كی سەركردەی پتر چەپەرێت سەرهەڵدانێ و بەرخۆدانێ ل سەر سینگێ تە لێداینە .
– پرسیارا چەكێ شەرەف و كەرامەتێ بكەن و بێژنێ تۆ پتر ب ملێ كی رێبەر و سەركردەیی ڤەبووی.
– پرسیارا فەرهەنگا ئاوارەیی و دەربەدەریێ بكەن و بێژنێ تۆ ل دگەل كی سەركردەیی دوست و هەڤاڵ بویی .
– پرسیارا پێشەوا قازی بكەن و بێژنێ ئالایێ پیروزێ كوردستانێ تە دایە دەستێ كی سەركردەیی هەتا كو بلند و بلند رابگریت .
– پرسیارا بارزان و مهاباد و هەولێر و دێرسمێ و قامشلو و ئامەد و سلێمانیێ و دهوكێ و كەركوكێ و هەمی باژێر و باژێركێن كوردستانێ بكەن و بێژنێ كی سەركردەیە پتر سلاڤ ل هەوە كریە و ئاخا پیروزا هەوە ژ دل پەرستیە .
– پرسیارا هەژار و بەلەنگازا بكەن و بێژنێ ئەرێ كی بۆ هەڤاڵ و خەمخور و دلسوزێ هەوە .
– پرسیارا هوزان و ئاوازێت شورەشگێری و فیداكاریێ و دلسوزیێ بكەن و بێژنێ بەرپەرێت هەوە پتر بۆ كی سەركردە و رێبەری هاتبوونە تەرخانكرن .
– پرسیارا ئازادیێ و ئاشتیێ و دیموكراسیێ بكەن و بێژنێ ئەرێ هوین پتر دگەل كی سەركردەیی دا بوینە و ژ دل ڤیاینە.
– پرسیارا پێلێت رویبارێ (ئاراس) ی بكەن و بێژنێ كی سەركردەیی دناڤ پێلێن تەدا مەلەڤانی كریە و دەرباز بویە و گوتیە دونیایێ (یان كوردستان یان نەمان).
– پرسیارا دیروكا مروڤایەتیێ بكەن و بێژنێ ئەرێ كی سەركردە بوویە چ جارا تەسلیمی ئیرادا دوژمن و داگیركەران نەبوویە.
– پرسیارا دوژمنی بكەن و بێژنێ تە ترس و سەهم پتر ژ كی سەركردەیی كریە.
– پرسیارا ئاوارە و كەس و كارێن شەهید و پێشمەرگەهێن قەهرەمان بكەن و بێژنێ هوین پتر ئاشق و ئەڤیندارێت كی سەركردە و رێبەری بووینە .
– پرسیارا هەمی رێبەر و زانا و بلیمەت و شورەشگێر و خەباتكاران بكەن و بێژنێ هوین شانازیێ ب ناڤێ كی رێبەری دكەن.
– پرسیارا ئەسمانێ سەربلندیێ و داڤێت روژا ئازادیێ و سەربەستیێ بكەن و بێژنێ هوین كی سەركردەیی پتر د باوەشا مەزنا خۆدا دگرن .
- پرسیارا محەمەد مەهدی جەواهیری بكەن و بێژنێ: (بالمصطفى، عنوان نهضة امة يوم التخاصم بإسمه يُقسّمُ)
، تۆ دگەل كێ بووی.
– پرسیارا هەژارێ موكریانی بكەن و بێژنێ كانیكا هوزانێت تە دگەل كی ناڤی خەمل و جوانیا خۆ دكەن ، تو دگەل كێ بووی كو تە دگوتێ :(من دەزانم تۆ نامری تۆ لە مردن بەهێز تری).
– پرسیارا دونیایێ بكەن و بێژنێ ئەرێ ئەو كی سەركردەیە مەلبەندەك ل دونیایێ ب ناڤێ پیروزێ وی هاتیە دامەزراندن و میللەت شانازیێ پێڤە دكەن.
– پرسیارا هەمی سەركردە و رێبەر و خەباتكارێت میللەتێت ئازادیخواز و ئاشتیخواز بكەن و بێژنێ هوین بۆ مەزناتیا خۆ كی سەركردەیی هەلدبژێرن؟
ئەڤە هەمی دێ كوم بن و ب ئێك دەنگ دێ بێژن
مستەفا بارزانی ……بارزانی مستەفایە.
