خه‌بات: حه‌مه‌ ئه‌حمه‌د جاف:- کاتژمێر 5ی سەرلەئێوارەی ڕۆژی سێشەممە ڕێککەوتی 9 ی ئابی 2022، لەهۆڵی ڕۆشنبیری لەشاری هەولێر، بەڕێوەبەرایەتی گشتیی ڕۆشنبیریی و هونەری هەولێر،سەربە وەزارەتی ڕۆشنبیریی و لاوان بە هەماهەنگی پارێزگای هەولێر، یادی چلەی ماتەمینی هونەرمەندی ناسراوی کوردو هونەرمەندە ئەسـڵزادەکـەی هـەولێر (محەمەد ئەحمەد ئەربیللی) دەکاتەوە.

(محەمەد ئەحمەد ئەربیللی) ناوی تەواوی محمەد ئەحمەد شێخ فەتحییەو لەساڵی ( 1933 ) لەگەڕەکی سەعدوناوای شاری هەولێر لەدایکبووەو لەتەمەنی نۆ ساڵیدا لە قوتابخانەی (ئەربیل ئولا)دەستی بەخوێندن کردووە و لەبەر خراپی باری نەداری و هەژاریی خێزانیی دەستی لە خوێندن هەڵگرتووەو لەساڵی 1944و دەستی بە کاری هونەری کردووەو لەساڵی 1959 چۆتە ڕادیۆی بەغداو چەند گۆرانییەکی تۆمارکردووە لەساڵی 1960لەنەخۆشخانەی کۆماری شاری هەولێر بە شۆفێردامەزراوە .

هونەرمەند ئەڕبیللی بە هەرسێ زمانی تورکی و عەرەبی و کوردی گۆرانی گوتوە و گۆرانیەکانی بریتین لە(کیژەکەی کافرۆش، گەنجانی وریا ڕاپەڕن، ئەی دلێران بەچکە شێران، هەولێر شاری شیرینم، بەخێربێیتەوە نەورۆزو بەهار، نەسرین دەمێکە ، لاوانی کورد ، یاڵا شۆفێر، لێرەمە لە هەولێرێ )

هونەرمەند ئەڕبیللی بەهۆی گۆرانی( یەڵا شوفێر ) ناوبانگێکی زۆری دەرکرد و یەکێک لەبەناوبانگترین گۆرانییەکانی (لێرەمە لە هەولێرێ ..دڵدارم لەهەولێرە).
بەرهەمەکانی لەلایەن کۆمەڵێک هونەرمەندەوە گوتراونەتەوە، هونەرمەند ژیانی هاوسەری پێکێهێناوەو خاوەنی شەش کوڕو سێ کچە.
سەد حەیف و مەخابن هونەرمەند لە 2022/6/20 لەنەخۆشخانەی (ژین) ی هەولێرکۆچی دوایی کردو لەگۆڕستانی کەسنەزان بەخاک سپێردرا