هوشیار زێباری بەربژێری کورد بۆ پۆستی سەرکۆماری عێراق ڕایگەیاند، دەستپێشخەرییەکەی سەرۆک بارزانی بەهۆی پێشکەوتنی پەیوەندییەکانی نێوان سەرۆک بارزانی و موقتەدا سەدر و هاوپەیمانی سیادەوە بوو، پەیوەندییەکانمان پتە و و قوڵن، ئەوەشمان لە هیچ لایەک نەشاردۆتەوە.
هوشیار زێباری بەربژێری کورد بۆ پۆستی سەرکۆماری عێراق لەمیانی بەشداریکردنی لە پرۆگرامێکدا لە تەلەڤزیۆنی (العراقیە) ڕایگەیاند: پەیوەندیمان لەگەڵ سەدر و هاوپەیمانی سیادە زۆر بەهێزە و پشتگیری یەکدی دەکەین. ئاماژەی بەوەشکرد دەستپێشخەرییەکەی سەرۆک بارزانی بەهۆی پێشکەوتنی پەیوەندییەکانی نێوان سەرۆک بارزانی و موقتەدا سەدر و هاوپەیمانی سیادەوە بوو، پەیوەندییەکانمان پتە و و قوڵن، ئەوەشمان لە هیچ لایەک نەشاردۆتەوە.
جەختیشی کردەوە کە “لەگەڵ حکوومەتێکی زۆرینەی نیشتمانی دان کە زۆرترین لایەنی نیشتمانی تێیدا بەشداربێت”.
لەبارەی پۆستی سەرکۆماریش ڕایگەیاند: لەدوای مام جەلال پۆست و پێگەی سەرکۆمار تەنها ڕۆڵی تەماشاکەری هەبووە و هیچ پڕۆژەیەکی نەبووە.
هەروەها نیگەرانی خۆی لە ناکۆکی نێوان لایەنە شیعییەکان دەربڕی و گوتی: ئێمە نیگەرانین لەو ناکۆکییانە، ئامانجیشمان ئەوەیە گرژی و بەریەکەوتن لەنێوان شیعەکان ڕوونەدات و هەوڵەکانیشمان بەردەوامن بۆ ئەوە و وەڵامی ئەرێنیشیان هەیە بۆمان.
لەبارەی بەربژێربوونی بۆ پۆستی سەرکۆمار دووپاتی کردەوە بەردەوام دەبن و دەتوانین ڕێژەی یاساییش تەواو بکەن بۆ دانیشتنی ڕۆژی 7ی مانگ.
دووپاتیشی کردەوە کە بەپێی کاتی دەستووری لە بەرژەوەندی عێراق مامەڵەمان کردووە، نەمانویستووە حکوومەت و پرۆسەی سیاسی عێراق بوەستێت و ویستوومانە پەلە بکرێت لە پێکهێنانی حکوومەتدا.
