شاخەوان برایم عەبدوڵڵا
ئۆپەراسیۆنی سەربازیی توركیا 0202 بۆ سەر پەكەكە لە باكوور و هێزە كوردییەكانی رۆژئاوای كوردستان یەكەمجار نییە و دواجاریش نابێت، هەتا ئەو كاتەی توركیا و پەكەكە لەسەر مێزی دانوستاندن بەشێكی كێشەی نێوانیان چارەسەر نەكەن، ئەویش بە تێگەیشتنی نوێ و لەپێناو گەڕاندنەوەی ئاشتەوایی یان رەخساندنی زەمینەیەكی نوێ تا ئەو دوو لایەنە هێندە مۆڕە لە یەكدی نەكەن، هەر وەك بەردەوامیش هەرێمی كوردستان داوای چارەسەركردنی كێشەكانی نێوان توركیا و باكووری كوردستانی لە رێگەی دیالۆگ كردووە.
هەر ئۆپەراسیۆنێكی سەربازی لە دژی پەكەكە، هەر سێ لایەنی توركیا و پەكەكە و هەرێمی كوردستانیش تێیدا زیانلێكەوتوو دەبن، توركیا سەرباری دادەپینی ئابوورییەكەی، ناچار دەبێت پارەیەكی زۆر لەمجۆرە ئۆپەراسیۆنانەدا خەرج بكات، ئەمە لەڕووی خەرجكردنی پارەوە، لەڕووی سیاسیشەوە زیانێكی گەورەتر دەكات و لەسەر ئاستی كۆمەڵگەی نێودەوڵەتیش ناوبانگی توركیا لە پەیوەست بە چارەسەركردنی كێشەی كورد، دووبارە دەزڕێتەوە. راستە ئێستا بەهۆی كۆرۆنا و سەرقاڵی وڵاتان بە ژیان و دۆخی نالەباری خۆیانەوە، ناپڕژێنە سەر ئەوەی قسە لەسەر ئەو ئۆپەراسیۆنەی توركیا بكەن، بەو مانایەش نا وەك دۆسیەی ئەرشیفكراو دواجار و لە پرسی دیكەدا لە دژی توركیا بەكارنەهێندرێتەوە، واتە ئەو كەیسەی بۆ هەڵدەگرن تا ئەو كاتەی بە توركیا دەڵێن، نایەوێت كێشەی كورد لە رێی دانوستاندن و ئاشتی چارەسەر بكات، جگە لە زیانی ئابووری و سیاسیش، توركیا زیانی تری وەك ناسەقامیگریی ناوخۆیی دەكات و بەوەی كێشەیەكی تر بۆ خۆی دەخوڵقێنێت و بە ئاسانیش كاریگەرییە ئابووری و ئەمنی و كۆمەڵایەتییەكانی ناسڕدرێتەوە.
ئەوەیشی پەیوەندی بە پەكەكەوە هەیە، زیانەكانی یەكجار زۆرترن لەچاو توركیا، هەم زیانی ئابووری دەكات بەوەی زۆرترین كەلوپەل و بارەگە و حەشارگەی تێدا لەناودەچن و دووبارەش دەبێت دروستییان بكاتەوە یان جێلەق دەبن، وێڕای برینداربوون و گیانلەدەستدانی گەریلاش هاوكات زیانێكی تری پەكەكە ئەوەیە پرسی ئاشتەوایی لەبار دەچێت كە بۆ پەكەكە یەكجار زۆر پێویستە، ئەگەر بۆ توركیا جارێك پێویست بێت، بۆ پەكەكە دووجار پێویستترە، بەو مانایەی توركیا دەوڵەتە و دەتوانێت ئیدارەی شەڕەكان بدات، بەڵام پەكەكە ناتوانێت و هەتا ئەو دۆخەش بەمجۆرە بەردەوام بێت، هیچ دەستكەوتێك لە شەڕدا بۆ پەكەكە مسۆگەر نابێت، جگە لەوەی بەهۆی ئەو شەڕانەوە كێشە بۆ هەدەپە و لایەنگرانیشی لەناوخۆی توركیادا دروست دەكات. لەو لاشەوە هەرێمی كوردستانیش تۆمەتباری دەكات بەوەی شەڕی باكووری كوردستانی هێناوەتە سەر خاكی هەرێم و بەهۆیەوە زیان بە هاووڵاتییانی هەرێم گەیششتووە، چ گیانلەدەستدان یان بریندار بوون، هەروەها سووتان و كاولبوونی گوندەوارەكانی هەرێمی كوردستان، لەوەشدا پەكەكە ناتوانێت خۆی لەو واقیعە تاڵە بشارێتەوە، بەوپییەی خەباتی سیاسی و چەكداری پەكەكە لە باشووری كوردستان نییە، بەڵام بەهۆی بنكە و بارەگەكانی، زیانی زۆری لە باشووری كوردستان داوە، بە دیاریكراوی هاووڵاتییانی ناوچە سنوورییەكان پشكی زۆریان لەو زیانانە بەركەوتووە.
هەرێمی كوردستان وێڕای ئەوەی بەردەوام پەكەكەی لەوە ئاگاداركردووەتەوە شەڕەكان لەسەر خاكی هەرێم نەكات یان بنكە و بارەگەكانی چۆڵ بكات تا نەبنە پاساوی بۆردوومان و هێرشە بەردەوامەكانی سوپای توركیا لەسەر خاكی كوردستان و لەناو گوندەوارییەكانی هەرێم، كەچی سوودی نەبووە، لەو نێوانەدا هەولێریش بێ زیان نابێت، لەلایەك هاووڵاتییانی هەرێم زیانمەند دەبن و رەخنەش لە هەولێر دەگرن، لە لایەكی ترەوە هەندێ حزبی سیاسیی هەرێمیش، ئەو كەیسە بۆ موزایەدەكردن بەسەر حكوومەت بەكاردەهێنن، بێئەوەی رەچاوی ئەو دۆخە تایبەتییەی هەرێمیش بكەن، كە لەنێوان توركیا و پەكەكەدا، دەبێت یان لەگەڵ توركیا بكەوێتە كێشە یان شەڕ لەگەڵ پەكەكەدا بكات، لە هەردوو دۆخەكەشدا هەرێمی كوردستان بە رەچاوكردنی بەرژەوەندییەكانی خەڵك و هەرێم، نایەوێ لەگەڵ هیچ كامێكیاندا بكەوێتە كێشەوە، بەڵكوو داوا دەكات كێشەكان لە رێگەی دیالۆگەوە چارەسەر بكرێن و بۆ ئەوەش هەموو ئامادەییەكی دەربڕیوە، چونكە ناسەقامیگری ئەمنی لە ناوچە سنوورییەكان زیانی ئابووریشی بۆ هەرێم دەبێت بەتایبەتی ئەوەی پەیوەندی بە مامەڵەی ئابووری نێوان توركیا و هەرێمەوە هەیە، خۆ ئەگەر لەگەڵ پەكەكەش بكەوێتە شەڕەوە، دیسانەوە تاكی كورد لە هەردوولایەنی پێشمەرگە و گەریلا شەهید دەبن و دوژمنانی كوردیش سوود لە ئاڵۆزییەكانی نێوان پێشمەرگە و گەریلا دەبینن، كەوایە حكوومەتی هەرێم بە هیچ شێوەیەك ئەو دۆخەی پێ خۆش نییە و وەك كەیسێكی یاسایی و مامەڵەی لەگەڵدا دەكات و دەخوازێت خاكی هەرێمی كوردستان نەبێتە قوربانی ململانێی هیچ لایەنێكی سیاسیی دەرەكی، ئینجا دیدێكی دیكەی هەولێریش ئەوەیە هەمیشە بۆ چارەسەركردنی كێشەكان داوای دیالۆگ دەكات.
