نی ڕووچی/ كۆنسوڵی گشتیی كۆماری چینی میللی لە هەولێر
پەتای كۆڤید ــ 19ی جیهانی كە زۆرترین بڵاوبوونەوەی هەیە، زیان بە مرۆڤایەتی دەگەیەنێت لەم سەردەمەدا و لە ئێستادا وێرانكارییەكی زۆری لە تەواوی جیهاندا ناوەتەوە، كە ئەمەش جەنگێكە پێویستە مرۆڤایەتی ئەنجامی بدات و تیایدا سەربكەوێت. چین باوەڕێكی بەهێزی بەوە هەیە كە تاوەكو هەموو وڵاتان یەكگرتوو و هەماهەنگ بن بۆ وەڵامدانەوەی بە كۆمەڵی ئەم پەتایە، كۆمەڵگای نێودەوڵەتی سەركەوتوو دەبێت و ئەم كاتە ناخۆش و ڕەشە دەمانگەیەنێت بە داهاتوویەكی درەوشاوە.
یەكەم:
وەكو یەكێك لەو وڵاتانەی كە بە یەكەم شەپۆڵی ڤایرۆسەكە كاریگەر بوو، چین تاقیكردنەوەیەكی سەختی ئەنجام دا لە سەرەتای دامەزراندنی كۆماری میللی لە ساڵی1949 تاوەكو ئێستا، ئەم ڤایرۆسە خێراتر و فراوانتر لە هەر جۆرە ڤایرۆسێكی تر بڵاوبوویەوە و ئەوەش سەلمێندرا كە سەخترین ڤایرۆسە بۆ لەخۆگرتنی. لە ڕوبەڕوبوونەوەی ئەم نەخۆشییە نەزانراو و چاوەڕواننەكراو و تێكدەرە، چین جەنگێكی یەكلایكەرەوەی دەستپێكرد بۆ ڕێگرتن و كۆنتڕۆڵكردنی بڵاوبوونەوەی نەخۆشییەكە. ژیان و تەندروستیی گەلەكەی كرد بە پێشینەی هەموو كارەكان،1.4 ملیار چینی بەیەكەوە بوون و پشتگیری خۆیان نیشان دا لە دروستكردنی بەربەستێكی پارێزەر كە هێزی ئەوان نیشان دەدات لە ڕووبەڕووبوونەوەی ئەم جۆرە كارەساتە سرووشتییانە.
سەرۆك شی جینپینگ بە شێوەیەكی تایبەت ڕابەڕایەتی ئەم جەنگەی لە ئەستۆگرت و پلانی وەڵامدانەوەی داڕشت و سەرپەرشتی دۆخەكەی بە گشتی كرد و بەشێوەیەكی یەكلاكەرەوە هەڵوێستی نواند بە ئاماژەكردن بۆ پێشەوە لە جەنگی دژ بەم پەتایە. ئەمە باوەڕبەخۆبوونی گەلی چینی بەهێزتر كرد و بووە هۆی كۆكردنەوەی هێز. لەژێر ڕابەرایەتیی حزبی شیوعی چینی، هەموو گەلەكە دوای بنەمای گشتی (باوەڕت بەخۆت بێت، یەكگرتووی، پشتبەستن بە ڕێگا زانستییەكان و گرتنەبەری ڕێوشوێنی ئامانجدار) و جەنگی خەڵك بەسەر ڤایرۆسەكە هەڵگیرسا.
لە ڕێگای هەوڵە مەزنەكان و قوربانییە زۆرەكان و دانی باجێكی قورس، چین لە گۆڕینی بارودۆخەكە سەركەوتوو بوو.
لە ماوەی زیاتر لە مانگێك، بەرزبوونەوەی بڵاوبوونەوەی ڤایرۆسەكە ڕێگری لێكرا: بە نزیكەی دوو مانگ، بەرزبوونەوەی ڕۆژانەی ژمارەی حاڵەتەكانی ڤایرۆسی كۆڕۆنا كەم بوویەوە بۆ ژمارەی تاك و بە سێ مانگ بە نزیكەیی، سەركەوتنێكی یەكلاكەرەوە بەدەستهێنرا لە جەنگی پارێزگاریكردن لە هەرێمی خوبەی و پایتەختەكەی كە شاری ووهانە. بەم دەستكەوتە ستراتیژیانە، چین پارێزگاری لە ژیان و سەلامەتی و تەندروستیی گەلەكەی كرد و بەشداریەكی گرنگی كرد لە پاراستنی تەندروستیی گشتیی هەرێمی و جیهانی. بەپێی لێكۆڵینەوەیەك لەScience Magazine ئەم ڕێكارانەی كە لەلایەن چین گراوەتەبەر ژمارەی تووشبووانی لە وڵاتەكە زیاتر لە700000 كەم كردەووە.
هیچ وڵاتێك نییە نموونەی بێت یاخوود مەترسی جۆرە هێرشێكی لەم شێوەی لەسەر نەبێت، ئامانجی چین ئەوەیە كە بە ڕێكارەكانی ڕێگەگرتن و كۆنتڕۆڵكردنی پەتا بچێتەوە لە كاتی گونجاودا و بەهێزكردنی ڕێوشوێنە كاریگەرەكان و ئەو خاڵە لاوازانەی كە لە پڕۆسەكەدا دەدۆزرێتەوە و چاكسازی لە سیستەمی ڕێگریكردن و كۆنتڕۆڵكردنی نەخۆشی بكات و بەهێزكردنی چاودێریكردنی نەخۆشی و توانای ئاگاداركردنەوەی پیشوەخت، باشتركردنی یاساكانی فریاگوزاری تەندروستیی گشتی و بەهێزكردنی سیستەمی بەڕێوەبردن و چارەسەركردنی سەرهەڵدانی گەورە و ڕووداوەكانی فریاگوزاری تەندروستیی گشتی.
ئەمە ئەوەیە كە حزبی شیوعی چینی و حكوومەتی چینی ئەنجامی دەدات، چونكە ئێمە پابەندین بە چاكسازی خودی و باشتركردنی خودی بۆ باشتر خزمەتكردنی گەل، هەروەها ئەمەش ڕێگایەكە بۆ باشتركردنی حكوم كردن كە هەر حكومەتێكی بەرپرسیار هەڵیدەبژێرێت.
چین تەنها نییە لەم جەنگەی دژ بە كۆڤید-19. كاتێك كە بارودۆخەكە لە چین زۆر سەخت بوو، كۆمەڵگای نێودەوڵەتی هاوكاری و پاڵپشتییەكی بە نرخی بۆ وڵات و گەلەكەی ئێمە دابینكرد. سەرۆكی زیاتر لە170 وڵات، بەرپرسی50 ڕێكخراوی نێودەوڵەتی و هەرێمی و زیاتر لە 300 حزب و ڕێكخراوی سیاسی بیانی لە ڕێگای پەیوەندیی تەلەفۆنی و نامە و لێدوان پاڵپشتی و پشتگیری خۆیان بۆ چین دەربڕی. حەفتا و حەفت وڵات و12 ڕێكخراوی نێودەوڵەتی پێداویستی فریاگوزاری پزیشكیان بە چین بەخشی. هەروەها چەندین حكوومەتی خۆجێی و كۆمپانیا و ڕێكخراوە ناحكومییەكان و خەڵك لە84 وڵات هەڵستان بە بەخشینی كەلوپەل. پاكستان هەموو دەمامكەكانی لە لیستی كەلوپەلی نەخۆشخانە كۆكردەوە بۆ بەخشینی بە چین. وەزیری تەندروستیی میسری سەردانی چینی كرد بە 1 ملیۆن دەمامكەوە. حكوومەتی میانماڕ برنجی دابینكرد، سریلانكا چای ڕەشی دابینكرد و مەنگۆلیا30000 مەڕی بەخشی….هتد. گرنگ نییە بڕی چەند هاوكاری دابینكرا، هەموو ئەم هەڵوێستانە ڕەنگدانەوەی دۆستایەتی ڕاستەقینەن لەم كاتە سەختەدا.
لەو كاتەی گەلی چین دەجەنگا دژ بە كۆڤید ــ 19؟ خەڵكی كوردستانی عێراقیش بەزەیی و پاڵپشتی خۆیان بۆ چین دەڕبڕی بە چەندین ڕێگای جیاواز. چەندین بەرپرسی باڵای حكوومەت، نوێنەرانی حزبە سیاسییەكان و هاوڕێ خۆجێیەكان سەردانی كۆنسوڵگەریەكەمانیان كرد. چەندین لە دۆستە كوردەكانمان نامەیان بۆ ناردین و پەیامیان لە فەیسبووك بۆ جێهێشتین و چەندین كورد لە هەموو بوارەكانی ژیان دروشمی (# گەلی چین ڤایرۆس نین) یان بەرزكردەوە. ئێمە هەڵوێستی میهرەبانیان بەرز دەنرخێنین. ئەم جۆرە هەڵوێستانە باوەڕبەخۆبوون و هێزیان پێ بەخشین بۆ جەنگان لەگەڵ ئەم پەتایە.
دووەم:
لەنێو زیادبوونی ژمارەی حاڵەتەكانی پەتاكە لە جیهان_چین، كە پیشكەوتنێكی بەرچاوی بەدەستهێنا لە بەرەنگارییەكانی لە جەنگی دژ بەم ڤایرۆسە، بە وردی و لە نزیكەوە لەگەڵ كۆمەڵگای نێودەوڵەتی كار دەكات. ئەم هەوڵانەی چین، كە بەشێوەیەكی فراوان لەلایەن جیهانەوە دانی پێداندراوە، بەشداری گرنگی هەبوو لە تەندروستیی گشتی جیهانی و بوو بە نموونەیەك بۆ چۆنیەتی بنیاتنانی كۆمەڵگایەكی ئایندە هاوبەش بۆ هەموو مرۆڤایەتی.
سەرۆك شی خۆی بە تایبەت پەرەی بە هەماهەنگی نێودەوڵەتی دا. لە پەیوەندییە تەلەفۆنییەكان و كۆبوونەوەكاندا لەگەڵ نزیكەی50 سەرۆكی بیانی و بەڕێوەبەری ڕێكخراوە نێودەوڵەتییەكان، سەرۆك شی داوای لە هەموو لایەنەكات كرد بۆ بنیاتنانی كۆمەڵگایەكی جیهانی خاوەن ئایندەیەكی هاوبەش و بەهێزكردنی هەماهەنگیە دووقۆڵی و فرە لایەنەكان. لە 18ی ئایار، وتاری كردنەوەی73 ەمین ڕێكخراوی تەندروستی جیهانی پێشكەشكرد و شەش پێشنیاری خستە ڕوو: ئەوەی لە توانامان دایە ئەنجامی بدەین بۆ كۆنتڕۆڵكردن و چارەسەركردنی كۆڤید ــ19 بۆ پاڵپشتیكردنی ڕێكخراوی تەندروستیی جیهانی لە وەڵامدانەوەی جیهانی بۆ ڤایرۆسەكە، بۆ دابینكردنی پاڵپشتییەكی بەهێزتر بۆ ئەفریقیا، بۆ بەهێزكردنی حكومكردنی جیهانی لە بواری تەندروستیی گشتی، و بۆ گەڕاندنەوەی گەشەسەندنی ئابووری و كۆمەڵایەتی و بۆ بەهێزكردنی هەماهەنگی نێودەوڵەتی. هەروەها زنجیرەیەك لە ڕێكارە سەرەكییەكانی ڕاگەیاند كە چین دەیگرێتەبەر بۆ پاڵپشتیكردنی ئەم جەنگە جیهانییە، لە نێوانیاندا پێدانی بڕی2 ملیار دۆلاری ئەمەریكی لە هاوكارییە نێودەوڵەتییەكان بە درێژایی دوو ساڵ و بنیاتنانی كۆگایەكی جیهانی بۆ وەڵامدانەوەی مرۆڤایەتی و سەنتەرێك لە چین بە هەماهەنگی لەگەڵ نەتەوە یەكگرتووەكان و بەكارهێنانی ڤاكسینی كۆڤید ــ19 وەكو بەرهەمێكی گشتی جیهانی هەر لەگەڵ گەشەپێدان و بڵاوبوونەوەی لە چین و دەستپیشخەری لە جێبەجێكردنی ڕاگرتنی قەرزی وڵاتە زۆر هەژارەكان بەیەكەوە لەگەڵ ئەندامانی كۆمەڵەی 20.
چین هاوبەشی بە زانیاری و ئەزموونی خۆی كردووە لەگەڵ كۆمەڵگای نێودەوڵەتی. چین هیچ كاتێكی بەفیڕۆ نەدا لە بڵاوكردنەوەی زانیارییەكانی وەكو زنجیرەی بۆ ماوەی ڤایرۆسی كۆرۆنای نوێ و نوێكارییەكان و لێكۆڵینەوە دیاریكراوەكانی تایبەت بە ڤایرۆسی كۆڕۆنای نوێ بۆ ڕێكخراوی تەندروستیی جیهانی و وڵاتانی تری پەیوەندیدار و ڕێكخراوە هەرێمییەكان، بەردەوام ئاگاداری كردوونەوە لە نوێكارییەكان. لێژنەی تەندروستیی نەتەوەیی چارەسەری بۆ دەستنیشانكردن، چارەسەركردن،ڕێگەگرتن و كۆنتڕۆڵكردن داناوە و وەریگێڕاوە بۆ سێ زمان و لەگەڵ زیاتر لە 180 وڵات و10 ڕێكخراوی نێودەوڵەتی و هەرێمی هاوبەشی پێكردووە. دەستەی هاوبەشی ڕێكخراوی تەندروستیی جیهانی و چینی تایبەت بە كۆڤید ــ19 هەڵستا بە سەردانێكی مەیدانی بۆ بەیژینگ، چێنگدو، گوانگژۆ، شنژن، و ووهان و هەوڵەكان و سەركەوتنی چینی لە ڕێگەگرتن و كۆنتڕۆڵكردنی ڤایرۆسەكە بەرزنرخاند.
چین یارمەتی مرۆیی بۆ كۆمەڵگای نێودەوڵەتی دابینكردووە. تەنانەت ئەو كاتەی كە چین لە ژێر گوشارێكی زۆری كۆنتڕۆڵكردنی ڤایرۆسی كۆڕۆنای نوێ بوو، بە خێرایی هەڵستا بە دابینكردنی هاوكاری بە پێی پێویست بۆ كۆمەڵگای نێودەوڵەتی. دوو كۆمەڵەی لە هاوكاری پارەی نەخت بە بڕی 50 ملیۆن دۆلاری ئەمەریكی بۆ ڕێكخراوی تەندروستیی جیهانی دابینكردووە، كە یارمەتی ڕێكخراوەكەی دا بۆ كڕینی كەلوپەلی پارێزەری تاكەكەسی و بنیاتنانی سەنتەری یەدەگی پێداویستی. تاوەكو 31ی ئایار، چین29 تیمی پزیشكی پسپۆڕی بۆ27 وڵات ناردووە، هاوكاری پێشكەشی 150 وڵات و4 ڕێكخراوی نێودەوڵەتی كردووە. تیمە پزیشكییەكانی ئاڕاستە كرد بۆ پاڵپشتیكردنی جەنگی خۆجێی كە لە56 وڵات جێگیركران و ڕاوێژكاری و زانیاری تەندروستی پێشكەشی خەڵكی خۆجێی بكەن. تاوەكو ئێستا، زیاتر لە400 خولی ڕاهێنانی ئۆنڵاین و ڕاستەوخۆیان لەم بوارە ڕێكخستووە. حكوومەتی خۆجێی، كۆمپانیاكان، ڕێكخراوە نا حكومییەكان و تاك لە چین كەلوپەلیان بە زیاتر لە150 وڵات و هەرێم و ڕێكخراوی نێودەوڵەتی بەخشیووە.
چین ئامادەكاری پێویستی بۆ هەناردە كردنی ڕێكوپێكی كەلوپەلی پارێزەر ئەنجامداوە. لەگەڵ دڵنیابوون لە دابینكردنی پێداویستی خۆجێی، چین هەموو ڕێگایەكی تاقیكردۆتەوە بۆ دابینكردنی پاڵپشتی بۆ هەموو وڵاتان بۆ كڕینی كەلوپەلی پارێزەر. ئەمەش ئاسانكاری كردووە لە نێوان ڕێگاكانی داواكردن و پێشكەشكردنی پێداویستی و خزمەتگوزاری لۆژیستی ڕێكخراو و گواستنەوە و پیداویستی كەلوپەل، خێراكردنی كاروباری گومرگ. ڕێكاری كاریگەری گرتۆتەبەر بۆ كۆنتڕۆڵكردنی چۆنیەتی(كوالێتی) بەرهەمەكان و ڕێكخستی پڕۆسەی هەناردەكردن و دەركردنی یاسا و ڕێسای تایبەت بە گشت بازاڕە بیانییەكان و بەهێزكردنی سەرپەرشتیكردنی كوالێتی بازاڕ و هەناردەكردن، بە مەبەستی دابینكردنی كەلوپەل بە بەرزترین كوالێتی بۆ وڵاتان. لە 1ی ئازار بۆ 31ی ئایار، چین كەلوپەلی پارێزەری بۆ200 وڵات و هەرێم هەناردە كردووە، لەنێو كەلوپەلەكان70.6 ملیار دەمامك،340 ملیۆن جلوبەرگی پارێزەر،115 ملیۆن جووت لە چاویلكەی پارێزەر، 96.700 ئامێری هەناسەدانی دەستكرد،225 ملیۆن كیتی تاقیگەیی تایبەت بە ڤایرۆسی كۆڕۆنای نوێ، و 40.29 ملیۆن گەرمیپێو.
چین ئاڵوگۆڕ و هەماهەنگی نێودەوڵەتی ئەنجامداوە لە بواری توێژینەوەی زانستی. پەیوەندی و ئاڵوگۆڕەكانی لەگەڵ ڕێكخراوی نێودەوڵەتی جیهانی بەهێز كردووە و لەگەڵ چەندین وڵاتی تر ئاڵوگۆڕ و هەماهەنگی و توێژینەوەی ئەنجام داوە دەربارەی شوێنەواری ڤایرۆسەكە، دەرمان، كوتان و تاقیكردنەوە و هاوبەشی پێكردنی توێژینەوەی زانستی و داتا و زانیارییەكان و لێكۆڵینەوە هاوبەشەكان دەربارەی ستراتیجی ڕێگەگرتن، كۆنتڕۆڵكردن و چارەرەسەركردن. وەزارەتی زانست و تەكنەلۆژیا و لێژنەی تەندروستیی نەتەوەیی سەكۆیەكی تایبەتیان بە پەیوەندی توێژینەوەی ئەكادیمی كۆڤید ــ19 ڕاگەیاند بۆ بڵاوكردنەوەی توێژینەوە و دەرئەنجامەكان و تاوتوێكردنیان لەلایەن توێژەران لە تەواوی جیهان. لە 31ی ئایار، كۆی گشتی104 گۆڤار و970 توێژینەوە و ڕاپۆرت بڵاوكرایەوە. ئەكادیمیای چینی زانستەكان داتابەسی 2019 Novel Coronavirus Resource بڵاوكردەووە و سیستەمی the Novel Coronavirus National Science and Technology Resource Service و Covid-19 Pneumonia Scientific Literature Sharing Platform ی بنیات نا. تاوەكو 31 ی ئایار، ئەم سێ سەكۆیە 48 ملیۆن دابەزاندن(download)? گەڕان و گەڕانەوەی بۆ زیاتر لە 370000 بەكارهێنەر لە هەموو جیهان هەبووە. چین كۆمەڵەیەكی نێودەوڵەتی لە پسپۆڕان دروستكردووە و هەماهەنگی لەگەڵ وڵاتانی تر ئەنجامداوە لە بواری توێژینەوەی دۆزینەوەی ڤاكسین و دەرمان و گەشەپێدان. هانی هاوپەیمانی ڕێكخراوەكانی زانستی نێودەوڵەتی داوە بۆ بەرزكردنەوەی ئاستی هەماهەنگی لەنێو ئەندامەكانی لە بواری ڤایرۆسی كۆڤید-19 لە چوارچیوەی پیشهەنگاوی پشتێنە و ڕێگا.
لە سەرەتای سەرهەڵدانی ڤایرۆسەكە لە هەرێمی كوردستانی عێڕاق، حكوومەتی چینی و كۆنسوڵگەری گشتیی چینی لە هەولێر هەڵوێستی بە پەلەی هەبووە. لە سەرەتای مانگی ئازارەوە، زیاتر لە 500000دەمامكمان بەخشیوە بە حكوومەتی هەرێمی كوردستان، و سێ كۆمەڵە لە هاوكاری مرۆییمان ڕێكخستووە، لە نێویاندا كیتی تاقیگەیی تایبەت بە ڤایرۆسی كۆڕۆنای نوێ، دەمامكی N95جلوبەرگی پارێزەر، چاویلكەی پارێزەر و پێداویستی تری پزیشكی. لە 8ی ئازار، تیمی پزیشكی پسپۆری خاچی سووری چینی گەیشتنە عێراق و لە كۆتایی مانگی ئازار سەردانی هەرێمی كوردستانیان كرد و شانبەشان لەگەڵ پسپۆڕە خۆجێیەكان بۆ زیاتر لە 50ڕۆژ هاوكار بوون لە جەنگان دژ بە ڤایرۆسی كۆڕۆنای نوێ ، ئەمەش دۆستایەتی ڕاستەقینەی نێوان ئەم دوو گەلە نیشان دەدات.
سێیەم
بڵاوبوونەوەی كۆڤید ــ 19 بە هەموو جیهاندا بووەتە هۆی نیگەرانییەكی زۆر. هەریەك لە جەنگان بۆ كپكردنی ڤایرۆسەكە و ڕوبەڕوبوونەوەی قەیرانی جیهانی، داوایەكە بۆ كۆمەڵگای نێودەوڵەتی بۆ ئەوەی بە یەكگرتوویی بوەستن و هاوبەش بن لە هەماهەنگیدا. هەروەها داوای فرەیی و پابەندبوون بە بنیاتنانی كۆمەڵگەیەكی جیهانی خاوەن داهاتوویەكی هاوبەشەوە دەكەن. پشتگیریكردن و هەماهەنگیكردن بریتین لە دوو بەهێزترین چەك لەپێناو بەدەستهێنانی سەركەوتن لە جەنگی دژ بەم ڤایرۆسە. ئەوەی كە ئەمڕۆ ئەنجامی دەدەین، دیاری دەكات كە چۆن دەبین لە داهاتوودا.
دوژمنی هاوبەشی مرۆڤایەتی بریتییە لەم ڤایرۆسە، نەوەكو هیچ وڵاتێك یاخود نەتەوەیەكی دیاریكراو. پێویستە كۆمەڵگای نێودەوڵەتی بە پەلە هەڵوێست بنوێنێت و یەكگرتوویی نیشان بدات و هەماهەنگی لە هەموو بەرەكانی جەنگ بەهێز بكات و دەستبەرداری ڕق و كینە و لووت بەرزی بێت و بەڕووی هەموو ئەوانە بوەستێت كە خۆیان دەكەن بە قۆچی قوربانی و خۆیان هەڵدەخەڵەتێنن لەپێناو بەرژەوەندی تاكە كەسی، هەروەها بە ڕووی لەكەداركردن و بە سیاسەتكردنی ڤایرۆسەكە بوەستێت.
هەرگیز میلەتی چینی بەرانبەر نەهامەتییەكان نەشكاوە. هەرچەندە بەرەنگارییەكان قورستر بووبێت، بە چاونەترسی و بوێریەكی زیاتر ڕووبەڕووی بوونەتەوە. زاڵبوون بەسەر سەختییەكان یارمەتیدەری چین بووە تا بەهێزتر بێت، لە ڕوبەڕوبوونەوەی ئەم ڤایرۆسە، گەلی چین بە یەكگرتووی بە ڕووی ڤایرۆسەكە وەستان و هەوڵەكانیان یەك خست. ئەوان سەركەوتوو بوون لە لەخۆگرتنی بڵاوبوونەوەی ڤایرۆسەكە.
ئێستا، لەو كاتەی ڤایرۆسەكە بەردەوامە لە بڵاوبوونەوە و بووەتە هۆكاری چەندین وێرانكاری لە جیهاندا، كۆمەڵگای نێودەوڵەتی دەبێت ڕووبەڕووی سەختی و بەرەنگاری مەزنتر ببێتەوە. لەم جەنگەدا چین هەمیشە پاڵپشتی وڵاتانی تر دەكات. ئەم پەتایە كاریگەرییەكی گرنگی دەبێت لەسەر گەشەسەندنی مرۆڤایەتی، بەڵام تامەزرۆیی خەڵك بۆ ژیانێكی خۆش بە نەگۆڕی دەمێنێتەوە. ئاشتی، گەشەسەندن، هەماهەنگی لە پێناو سوودمەندبوونی دوو لایەنە سەردەكەوێت. دوای هەموو ناخۆشییەك خۆشی دێت. تاوەكو گەلانی دونیا بەردەوام بن لە پارێزگاریكردن لە هیوا و خەونەكان و لە باوەشكردنی بیرۆكەی كۆمەڵگایەكی جیهانی خاوەن داهاتوویەكی هاوبەش و یەكگرتن لەپێناو بەدەستهێنانی ئامانجی هاوبەش، دەتوانین بەسەر هەموو ئەم سەختی و بەرەنگاریانە زاڵ ببین و جیهانێكی باشتر بۆ هەموو لایەك بنیات بنێین.
مێژووی دوور و درێژی پەیوەندی دۆستایەتی نێوان گەلی چین و گەلی كورد بۆ 2000 ساڵ لەمەو پێش دەگەڕێتەوە، لەم چەند ساڵەی دواییدا، ئاڵوگۆڕ لەبواری جیاجیادا لە نێوان هەردوو گەلەكە بەردەوام بوو، تێگەیشتنی دوولایەنە بەردەوام لە قووڵ بوونەوەدا بووە. لە ڕووبەڕووبوونەوەی ئەم پەتایە، گەلی چین بە هێزەوە لەگەڵ خوشك و برا كوردەكانی دەوەستێت، سەختییەكان هاوبەشی پێدەكات و بەیەكەوە كاردەكەن. بەو هەماهەنگییە بەهێزەی لە نێوانماندا هەیە، بە دڵنیایەوە سەركەوتنی كۆتای لە جەنگی دژ بەم ڤایرۆسە بەدەستدەهێنین لە چین، عێراق و هەرێمی كوردستان و تەواوی جیهان.
تێبینی: ئەم وتارە لەلایەن كونسوڵخانەی چین لە هەولێر بۆ خەبات نێردراوە.
