شاخەوان برایم عەبدوڵڵا
لە سەروبەندی پێكهێنانی كابینەی نۆیەمدا بە سەرۆكایەتیی مەسرور بارزانی، هێز و لایەنە سیاسییەكان زۆرترین شەڕی وەرگرتنی پۆست و ئیمتیازاتیان كرد، تا دواجار پارتی چاوپۆشی لە زۆر شت و مافی خۆی كرد، بۆ ئەوەی یەكڕیزی و تەبایی نێوان لایەنە سیاسییەكان بە ئاڕاستەی ئاڵۆزی زیاتر نەچێت و حكوومەتیش رەنگدانەوەی تەواوی لایەنە سیاسییەكان بێت و شانبدەنە بەر بەرپرسیارێتیییەكان بە شێوەیەیەك لە بەرژەوەندیی خەڵك بكەوێتەوە، مەرجی پارتیش ئەوەبوو ئەو حزبانەی دێنە ناو حكوومەتەوە، بەشەو ئۆپۆزسیۆن نەبن و بەڕۆژیش لەسەر كورسییەكانی حكوومەت دەوام بكەن، ئێستا خەریكە ئەو مۆدێلە زەقتر دەبێتەوە، بەوەی حزب هەیە لە حكوومەتدایە، وێڕای خۆشاردنەوەی لە بەرپرسیارێتییەكان، رۆڵی ئۆپۆزسیۆنیش دەبینێت.
حكوومەت بەتەنیا پارتی پێكی نەهێناوە و چەندین حزبی سیاسی دیكەش تێیدا بەشدارن و زیاتر لە قەبارەی بەركەوتەی هەڵبژاردنیش پۆستیان وەرگرتووە، حزب هەیە بەنیوەی پارتی كورسی نییە، كەچی هێندەی پارتی پۆستی بردووە، ئەمە چییە؟ ئەگەر رێزگرتنی پارتی نەبێت لەو لایەنانە و رەچاوكردنی دۆخی سیاسی و تەبایی كوردستان نەبێت! پارتی لە بەشێكی مافەكانی خۆیشی خۆشبووە بۆ ئەوەی حكوومەت رەنگدانەوەی هەموو حزبەكان بێت، بەوپێیەی حزبەكانیش رەنگدانەوەی كۆمەڵگەن، ئەگینا خۆی دەیتوانی لەگەڵ پێكهاتەكان حكوومەت پێكبهێنێت، وەلێ رەچاوی تەبایی نێوان لایەنە سیاسییەكانی كرد و دەستبەرداری بەشێكی مافەكانی خۆی بوو.
ئێستا ئەو حزبانە سەرەڕای ئەوەی زیاد لە قەبارەی خۆیان پۆستیان بردووە، خۆیان لە بەرپرسیارێتییەكان دەشارنەوە و كۆی بەرپرسیارێتییەكان بەتەنیا دەخەنە ئەستۆی پارتی، لەكاتێكدا پارتی دروستتر كابینەی نۆیەم نەیگووتووە قەیران و كێشە نییە، بەڵكوو دەڵێ ئێمە هەوڵدەدەین چاكسازی بكەین و قەیرانەكان چارەسەر بكەین، بەشێوەیەك خەڵكی كوردستان لێی سوودمەند بن، كەچی هەندێ حزب بە ئاشكرا خۆیان لە بەرپرسیارێتییەكان شاردووتەوە و تیریش ئاڕاستەی ئەو حكوومەتە دەكەن كە خۆیان پۆستیان تێیدا هەیە، بە رێكخستنی كەمپین دژی حكوومەت و هەڵاتن لە بەرپرسیارێتییەكان.
كابینەی نۆیەم ئەگەر بەتەنیا پارتی تێدا بمێنێتەوە، لە پرسی چاكسازی و هەڵگرتنی بەرپرسیارێتی پاشەكشە ناكات و بە جیدیش لە هەوڵی چارەسەركردنی كێشە جۆراوجۆرەكاندا دەبێت و ئەولەویەتی كاری حكوومەتیش بژێوی خەڵكە، لەگەڵ ئەوەشدا حكوومەتی هەرێم دەزانێت بە ئەنقەست بەربەرستی دەخرێتە پێش تا پاشەكشە لە پرسی چاكسازی بكات، بەڵام حكوومەت بەردەوامی بەو پرۆسە چاكسازییانەی دەدات كە سوودی گشتییان تێدایە. بەگوێرەی زانیارییەكانیش ئەم هەفتەیە شاندی حكوومەت سەردانی بەغدا دەكات و پرسی نەوت و بودجە و دارایی بە گشتی گفتوگۆیان لەسەر دەكرێت.
