نووسەر و ئەدیب، نەژاد عەزیز سورمێ دوو بەرهەمی لە بواری هونەر و شیعر و رۆژنامەنووسی چاپ و بڵاوكردەوە. كتێبەكانی پێكهاتوون لە “دیدار لە بارەی شیعر و رۆژنامەنووسی” و هەروەها كتێبی “هونەری كۆلاژ، مێژوو. تەكنیك. ئەزموون”.
نەژاد عەزیز سورمێ، نووسەر و شاعێر، لە پێشەكی ئەو كتێبەیدا لە بارەی هونەری كۆلاژ، نووسیوویەتی “هونەر لە خۆیدا بە ئەنگیزەی ئەو ویست و ئارەزووانە هاتووە، ئادەمزاد روانین و وردبوونەوە و پرسیارە سادە و ئاڵۆزەكانی پێ كردووە و خۆی پێ رازی كردوە. ئەمە هەر لە دێری دێرەوە خولیای مرۆڤ بووە، لە سەردەمی چاخە بەردینەكانەوە، كە رەنگە تەنانەت بە ئاستی لاسایی كردنەوەیش لە ئیستاتیكا و رەهەندەكانی نەگەیشتبن، بەڵكو پێویستی ئەوان سەردەمان رەنگڕێژیی بەها ئیستاتیكییەكانی كردووە، كە پاشان دوای دەیان و سەدان و هەزاران ساڵ، لێی كۆڵراوەتەوە و هەوڵی دۆزینەوەی مەودای جوانی و پاڵنەرە ئەفسانەیی و خۆڕسكەكانی دراوە.
نموونەش بۆ هەردوو بەر، داهێنەر و بینەر لەو ساوە ون نەبووە، لە هونەری سەر دیواری ئەشكەوتانەوە ڕا تا دەگاتە شارستانیەتە ئۆریگناڵەكانی وێنەی شارستانەتی سۆمەر و دۆڵی نیل و دۆڵی سند..”.
كتێبی “دیدار لە بارەی شیعر و رۆژنامەنووسی” تایبەتە بە سەرجەم ئەو دیدار و سەرنجانەی نووسەر لە چەند ساڵی رابردوودا، لە رۆژنامە و گۆڤارەكان بڵاوكراونەتەوە.
نووسەر لە بارەیەوە نووسیویەتی: “ئەوەی لە دووتوێی ئەم كتێبەدا كۆكراونەتەوە، چەند دیدارێكی رۆژنامەنووسین لە كاتی جیاجیادا، بە داوای ئەو رۆژنامە و گۆڤارانەی لە شوێنی خۆیاندا ئاماژە بە ژمار و رۆژی دەرچوونیان دراوە، لەگەڵم كراوون. زادەی وەختی خۆیانن، كێرڤی بۆچوونەكانمن لەوەی پەیوەستن بەو مەسەلانەی لە پرسیارەكاندا وروژێنراون.
