دووەمین راسپێردراو بۆ پێکهێنانی کابینەی تازەی حکوومەتی عێراق، کشانەوەی خۆی لەو ئەرکە راگەیاند و داوای لێبووردنی کرد.
ئەمڕۆ پێنجشەممە ٩ی نیسانی ٢٠٢٠، عەدنان زورفی، راسپێردراو بۆ پێکهێنانی کابینەی نوێی حکوومەتی عێراق لە پەیامێکدا بە فەرمی داوای لێبووردنی کرد و رای گەیاند کە ئەو ئامانجی هەبووە عێراق ڕزگار بکات و بیگەڕێنێتەوە سەر ڕێگە راستەکەی و بیکاتە وڵاتێکی سەقامگیر و کاریگەر لە ناوچەکە.
بانگەشەی ئەوەشی کردووە کە لە هەفتەکانی رابردوودا سەرەتایەکی راستەقینەی بۆ سیاسەتێکی عێراقیی بونیادنراو لەسەر شەراکەتی ئابووری دامەزراندووە و لە یەکەمین ڕۆژی دوای راسپاردنیەوە، بەپێی گوتاری راسپاردنەکەی کاری کردووە و هەوڵی داوە ئابووریی وڵاتەکە ڕزگار بکات و سزای بکوژانی خۆپیشاندەران و تاوانباران بدات.
هاوکات سوپاسی ئەوانەی کردووە کە پشتیوانییان لێی کردووە و هەوڵی سەرخستنیان داوە و رای گەیاندووە: “ئەزموونی راسپاردنم جێدەهێڵم و من ویژدانم ئاسوودەیە”.
جەختیشی کردووەتەوە کە شکستهێنانی لە ئەرکەکەی بۆ هۆکاری ناوخۆیی و دەرەکی دەگەڕێتەوە و رای گەیاندووە کە لە هەڵبژاردنی داهاتوودا هەوڵدەدات پڕۆژەکەی تەواو بکات.
