شوكر محەمەد هەركی-باسرمە
كوردستان رۆژبەرۆژ روە و سەركەوتن و سەقامگیری پەل دەهاوێژیت، كە لەسایەی سیاساتێكی ژیرانە و عەقڵمەندانەی تێكرای سەركردایەتیی سیاسی كوردستان سەرچاوەی گرتووە، وەك ستراتیجیەتێك و بەدەنگەوەچوونی خواستی جەماوەری كوردستان. هەنگاونانی پێ بە پێ لەپێناو بەرژەوەندیی گشتیی خەڵكی كوردستاندا بەهەموو چین و پێكهاتەكانییەوە، بەرەو كەناری ئارام لەسەقامگیریی گشتی لەهەمبەر هەلومەرج و بارۆدۆخی ناوچەكەدا پێیدا تێدەپەرێت، كە ئاستی گرژییەكان سەرەو لێوار و داڕمانن، بەپێی هەموو خوێندنەوەكان سەلمێنەرێكی بەدیهاتووە، ئەوەتا گرژی و ئاڵۆزی بەرۆكی زۆربەی وڵاتان و دەڤەرەكەی گرتووە، واقعی رووداوەكانی رۆژ بریار لە هەڵكشان و داكشان ئەدەن، لەمەر پرسگەلێكی هەنووكەیی و ستراتیژیدا، بەتایبەت دۆخە نەخوازراوەكان بەرۆكی رۆژهەڵاتی ناڤینی گرتووە، دەربازبوون لێیان ئەستەم دێتە بەرچاو! لەمەر نەهامەتی و فاكتەكاندا لەگۆرەپانی سیاسیدا بوون و هەژموونیان هەیە و بەرجەستەن، بۆیە خاوەن پێناسە هەژموونی و هەرێمایەتییەكان رۆڵی زۆران بازی و یەكلاكەرەوە لەدەستی ئەواندایە، لە سەقامگیریی گشتی و قووڵبوونەوەی ناكۆكییەكاندا.
كوردستان و (جێبەجێكارانی كوردستان)، هەم سیاسەتی گشتیی سەركردایەتی كوردستان و هەردوو بەرێزان لەسەرۆكایەتی هەرێم (رێزدار نێچیرڤان بارزانی )و بەرێز (كاك مەسرور بارزانی) لەسەرۆكایەتیی حكوومەتدا، دوو ئەكتەری سەرەكی رۆڵگێرن لەم سەقامگیری و پێشڤەچوونە دیپلۆماسییانەدا، بەتایبەت لە دوو كۆربەند و كۆنفراسە گرنگەی (داڤۆس و میونشن)دا، تایبەت تر لە كۆنگرەی میونشن لەهەمبەر پرسی ئاسایش و لێكەوتە و دەرەنجامەكانی لەسەرئاستی هەرێمایەتی و نێودەوڵەتیدا رووە و رووداوی گەرماوگەرم پەرەدەستێنن، گفتگۆ و دیالۆك رێگاچارەی گرێ كوێرەكان دەكەنەوە و بەكارهێنانی ئاستە دیپلوماسییەكان هەنگاوەكان نزیكتر و ئەرێنیتر دەبن لە تەك دیبەیت و دانیشتەكاندا، بۆیە دیپلۆماسی هەردوو بەرێزان وەك نوێنەری گەلی كوردستان كەپشكدارو رۆل گێرن ، بەبەرزدەهێنە نرخاندن ، هەم لەرای گشتی كوردستان و وڵاتە زلهێز و هەرێماتییەكاندا، ئەوەتا لە داڤۆس ئاست و پێگەی دیپلۆماسی كورد بەسەرۆكایەتیی رێزدار سەرۆكی هەرێم چووە قاڵب و فۆرمێكی نوێوە كە وا بەهەند وەرگیرا لەئاست دەوڵەتێكی خودان شوناسنامەدا.
بۆیە هەم جێگای شانازییە و هەم خوێندنەوەی زۆری بۆ دەكرێت چ لەئاستی نێودەوڵەتیدا چ لەئاستی نیوخۆشماندا ببێتە وەرچەرخانێك بۆئەوەی هەرچی زیاتر پایەكانی ئەم حكومەتە بەهێزە بەرەو سەركەوتن و ئومێدواری زیاتر ببەن، لەپێناو هاووڵاتی و تەواوی گەلی كوردستاندا.
لەلایەكی دیكەوە بەشداری بەرێز سەرۆكی حكوومەتە لە كۆنفراسی میونشندا، دانپێدانانێكی تەواوە لەئاستی دیپلۆماسییەت و پێگە و سەنگی كوردستان لە پشكداری و نواندنی ڕۆڵ بینین، لە دانیشتن و گفتگۆیەكان و چاوپێكەوتنەكان لەگەڵ وەزیرانی ئەمریكا و روسیا و ئەڵمانیا و بولغاریا و ئێران و عێراق و زۆر لەوڵاتانی تر بەسەرۆكایەتی راستەوخۆی سەرۆكی حكوومەتی هەرێمی كوردستان، هەموو ئەم چاوپێكەوتن و دیدارانە مایەی خۆشحاڵین و چاوەروانی هەنگاوی باشتریان لێ دەكرێت لە ئاستی نێودەوڵەتیدا، كەكوردستان خاوەن قەزیە و تایبەتمەندی و جیۆپۆلەتیك و وزەی تایبەت بەخۆیەتی، ئەمانەش دەچنە چوارچێوەی حیساب بۆكردن، رەقەمێكی دیار و روونن لە چاوی دەوڵەتانی ناوچەكە بەگشتی و زلهێزەكان بەتایبەتی، بۆیە ململانێكان دیارن، ئەوەتا لە عێراق، سوریا، لوبنان، لیبیا و توركیا، گەمارۆكانی سەر ئێران لەلایەكیترەوە، جیهانی بەخۆیەوە سەرقاڵ كردووە، كوردستان وەك تاكە ناوچەی ئارام و خاوەن پێگە لە ئاشتی و بنەماكانی دیموكراسی و پێكەوەژیان، جیاوازتر و سەقام گیرتر دەبینرێت، ئەوەتا رۆژبەرۆژ لەبواری دیپلۆماسیدا لەبەهێزیدان و رۆژبەرۆژ لەپەرەسەندن و هەنگاوی ئەرێنیدان، لەپێناو سەقامگیری گشتیی جیهانی و سەقام گیری و بەهێزی كوردستاندا.
