خه‌بات: ساسان دەروێش- هۆڵەندا:-
لە نێو چەندین نەتەوەی جیاواز و نیشتەجێی هۆڵەندا، هەبوونی كۆمەڵە و ڕێكخراوی جیاواز بەخۆیان كە گوزارشت لە ناسنامە وكلتوری هەریەكەیان دەكات ، بەفەرمی لە نێو هۆڵ وشوێنە گشتیەكان چالاكی هەمەچەشنە ئەنجام ئەدەن ، بۆنە نیشتیمان و نەتەوەییەكانیان بەرزڕادەگرن، نەوەكانیان غافڵ ناكەن لە بوونی خۆیان ، دیارە گەلی كوردیش لەنێو هەموو ئەم كلتورانەدا ، بەپێی توانای خۆی و دەرفەتی بۆ ڕەخسابێت بەهیمەتی دڵسۆزانی كورد و كوردستان ، چرایەكیان داگیرساندەوە بۆ هیوا بوونی كورد و كۆكردنەوەیان لەژێر یەك چەتری نەتەوەیدا، ڕووناكیان خستۆتە سەر ناساندنی ناسنامەی نەتەوەیی كورد، بۆ ئەو مەبەستەش 15 ساڵ لەمەوبەر كۆمەڵەیەكی ڕۆشنبیری و كلتوری لە چوارچێوەی یاساو ڕیساكانی وڵاتی هۆڵەندا لە ڕۆژی خۆشەویستیدا لە 14 /2/2005 بەفەرمی ماڵێكی بۆ هەموان ئاوەدانكرد، لەیەكێك لە شارۆچكەكانی باشووری هۆڵەندا لە زیڤن بێرخن بەسەرپەرشتی لەتیف عومەری شاعیر و نووسەر وهاریكاری هاوژینەكەی خاتوو خۆشی و چەند برادەرێكی هونەر دۆست و ئەدەب دۆست بەمەبەستی خزمەتكردن بەكلتوری كوردی لە تاراوگە، كە لە ماوەی ڕابردووشدا چەندین چالاكی هەمەڕەنگی كلتوری كوردی و هۆڵەندای پێشكەشكردوە.
زۆرترین ڕەوەندی كوردی و هۆڵەندی لە ئامـێزی خۆی كردوە لە بۆنە نیشتیمانی و نەتەوەییەكانمان و چاڵاكی هەمەچەشنە بۆ ئەدەب و هونەر و ئافرەتان و منداڵان و وەرزش و گرێدانی دۆستایەتی كورد و هۆڵەندی و نەتەوەكانی تر تۆمارێكی جوانی پر لەسەروەری بۆخۆی و نەوەكانی كوردی تۆماركردوە ، بۆ بەرزڕاگرتن و مانەوە وپێشكەوتنی زیاتر بەبۆنەی 15 ساڵ لە دامەزراندنی و ڕۆژی خۆشەویستی كۆمەڵەی كوردی موردایك، ئێوارەیەك پڕ لە خۆشەویستی ودنیای شیعرومیوزیك وخوانێكی گشتیان سازكرد بەئامادەبوونی بەشێك لە ڕەوەندی كورد و هۆڵەندای ، خاتوو دالیا ئەندامی دەستەیی كۆمەڵەكە بەخێرهاتنی هەموانی كردو دواتر وتەی كۆمەڵەكە لەلایەن لەتیف عومەری بەرپرس پێشكەشكرا،پاشان لە نێو دنیای شیعر و میوزیك و گۆڕانی و هەڵپەڕكێ و پرسیارو وەڵام لەسەر زانیاری گشتی و كوردەواری و خواردنی خوانێكی گشتی و كوردەواری لە خواردنە كۆنەكانی كورد وژەنینی عود لەلایەن بژار حەمدی هونەرمەند، یادی دامەزرانی 15 ساڵەی كۆمەڵەكەیان پیرۆزكرد ، لەمبارەیەشەوە لەتیف عومەری سەرپەرشتیاری كۆمەڵەكە بۆ ڕۆژنامەی خەبات دوا: پیرۆزبایی لە خۆمان و هەموو دڵسۆزانی ڕەوەندی كورد لە تاراوگە و هۆڵەندا دەكەم ئەگەر پشتگیری و بەدەنگەوە هاتنی ئەوان نەبێت هیچ كات نەمان دەتوانی مۆمی 15 ساڵەی كۆمەڵەكەمان داگیرسێنین، ئێمەش چارەنووسمان وەك هەموو ئەو كۆمەڵەو ڕێكخراوە ڕۆشنبیری و كۆمەڵایەتیانەی هەبوون وماڵئاواییان كرد وجییان هێشتین، بەڵام بەهیمەتی هەموولایەك لەسەر پەیڕەوی كوردایەتی و كۆكردنەوەی هەموو ڕەنگ و دەنگەكان بە هەموو جیاوازییەكانەوە و خۆدۆزینەوەیان لەنێو كار و چالاكیەكان و دوور لە حیزباتی تەسك ڕەنگدانەوەیان هەبووە، لە ئێستاشدا لە خۆئادەكردنداین بۆ بەرز و پیرۆز ڕاگرتنی جەژنی سەری ساڵی كوردی و نەورۆز.
