بەكر كەریم حەسەن
فەیلەسوفی بەناوبانگی یۆنانی سوقرات دەلێ:پەروەردەی رەوشتی گرنگترە بۆ مرۆڤ لە نان و جل و بەرگ.
دوای چەند رۆژێكی تر قوتابییە خۆشەویستەكانمان دوای پشووی وەرزی یەكەم دەگەڕێنەوە قوتابخانە و پۆلەكانی خوێندن، كە قوتابخانە ئەركی زۆر قورس وهەستیار و كاریگەرە. نابێ لە بیرمان بچێت قوتابخانە بەرپرسیاریەتی ویژدانی ومێژوویی دەكەوێتە ئەستۆ لە پەروەردەكردن و فێركردنی منداڵەكانمان، بەڵام كامەیان پێش ئەوەی ترە، بێگومان پەروەردە پێش فێركردنە، دەپرسین بۆ پەروەردە پێش فێركردنە، چونكە پەروەردە پارێزگارییە و خۆ پاراستنە، پڕەنسیپە، بەهایە، راستگۆییە، دڵسۆزییە، ئەوەی ووشە و چەمك وگوفتار و كرداری جوانە پەروەردەیە، بێگومان فێركردنیش بەهەمان شێوە، بەڵام پەروەردە و فێركردنە، گەر تەماشای ناو و ناونیشانەكان بكەین دەڵێ وەزارەتی پەروەردە، بەرێوەبەرایەتی پەروەردەی، كەواتە كار و ئەركی سەرەكی قوتابخانە سەرەتا پەروەردە كردنە ئینجا فێركردن.
ئەوەی لە ناوەوەی پەرژین وشورەی قوتابخانەكان گوێ بیست دەبین و دەمانەوێ ببینین ئەوەیە ئەركی مامۆستا دەبێت پەروەردەكاری بكات ئینجا مامۆستایەتی، هەر لە سەر دەستی مامۆستایە قوتابی پەروەردە دەكرێ لەسەر دڵسۆزی و راستگۆیی و متمانە بەخۆبوون و هەست كردن بە بەرپرسیاریەتی و رێزگرتنی یاسا و رێنماییەكانی ووڵات و یەكتر قبوڵ كردن و ووتووێژ و گفت و گۆكردن و رەخنە لە خۆ گرتن و هاووڵاتی بوون و خۆشەویستی بۆ خاك و نیشتمان و هاووڵاتیان هەموو ئەوانە و چەندان بنەما و بەها و چەمكی تر كە پێویستە قوتابی لە قوتابخانەكان لەسەریان پەروەدە بكرێ لەلایەن مامۆستا دڵسۆزەكان، ئەوكات مامۆستا رۆڵی دەبێتە رۆڵی پەروەردەكارێكی ئاراستەكراو هاوڕێی قوتابی، بەڵام لە بیرمان نەچێت رۆڵی بەرێوەبەرایەتی پرۆگرامەكان دەبێت كاریگەر بێت و بوونیان هەبێت، واتە پرۆگرامی زیندوو هەبێت بۆ پەروەردە كردنی قوتابییە خۆشەویستەكانمان لە سەر هەموو بنەما و بەها پەروەردەیی جوان كە بەدرێژایی ژیان لەگەڵ قوتابییەكان گەورە و گەورەتر دەبن، ئەوەش لە خزمەت پرۆسەكە و كۆمەڵگەی كوردەوارییە، جگە لەوەش خاڵی وەرچەرخان و چەقی قورسایی بەرپرسیاریەتی وەزارەتی پەروەردەیە بەتایبەتی پرۆگرامەكان تا چەند توانیویانە نەوەیەكی زیندووی بە ئاگا و بارگاوی كراو بە بەها پەروەردەییەكان پەروەردە بكات، كە پەروەردە پێش فێركردن رۆڵی دیت و مامۆستاش رۆڵی پەروەردەكاری بینی و قوتابییە خۆشەویستەكان هەستیان كرد ئەوا قوتابخانەكەیان هەردەم بۆتە منارەیەكی رۆناكی بەخش بۆ رۆشن كردنەوەی بەر دید و بەرچاوی قوتابییەكانمان و نەوەی داهاتوو كە هەردەم گرنگی و بایەخ دەدەن بە چاندنی بنەما و بەهای مرۆڤایەتی خانەدانی، ئەوا ئەوە كات دەلێن بەڵێ قوتابخانەكان بە ئەركی خۆیان هەڵدەستن پەروەردەی منداڵەكانمان دەكەن ئینجا فێریان دەكەن، چونكە پەروەردە و فێركردن هەردووكیان بە بنچینە دا پەیامی كاریگەر و گەورەن، كە هەردەم مامۆستاكانمان دەبێ زۆر بە هەستیاری و پارێزراوی و دڵسۆزی ئەو پەیامە بگەیەنن و ببەخشن لە پێناو تێگەیاندن و پێگەیاندنی نەوەیەكی كارا و زیندوو بۆ كۆمەڵگە، كە سەرەتا لە پەروەردە دەست پێ دەكات ئینجا فێركردن.
❊ بەرێوەبەری گشتی چالاكی وەرزش و هونەر
