سوورە مەرگەیی
حوسێن عوبەیدی ئیمام و وتارخوێنی مزگەوتی (زەیتوونە)ی تونس كە بە ناوبانگترین مزگەوتی وڵاتی تونسە دەڵێ: بە 24 وڵاتی عەرەبی و 50 وڵاتی ئیسلامی ناتوانن خواردەمەنی بگەیەننە غەززەی عەرەب و موسڵمان نشین، مەسعود بارزانی سەرۆكی هەرێمێكە و بەناو وڵاتی دوژمنێكیدا هێزی گەیاندە كۆبانێ و نەیهێشت كۆبانێی كورد بكەوێ، بۆیە من وەك عەرەبێكی موسڵمان شانازی بە سەرۆك بارزانی دەكەم و لەو باوەڕەدام بە هەزار ساڵی تر سەرۆكێكی هاوشێوەی بارزانی لەناو عەرەب و ئیسلامدا هەڵناكەون.
ئەو گوتن و بەراوردەی حوسێن عوبەیدی ئیمام و وتارخوێن لە نێوان سەرۆك بارزانی و 24) وڵاتی عەرەبی و 50)وڵاتی ئیسلامی زۆر هەڵدەگرێ و جێگای هەڵوەستە لەسەر كردنە، هەر ئەوەش نا، لە كاتی هێرش و پەلامارەكەی توركیا بۆ سەر رۆژئاوای كوردستان دەزگای خێرخوازیی بارزانی لەناو هەموو وڵاتان و دەزگاكانی خێرخوازیدا یەكەم دەزگای خێرخوازی بوو خواردەمەنی و پێداویستی پزیشكی گەیاندە كوردانی ئاوارەبووی رۆژئاوا، جگە لەوەش هەر بە فەرمانی سەرۆك بارزانی محەمەدی جەستە هەڵقرچاو بە چەكی قەدەغەكراوی نێودەوڵەتی دەرباز كرا و بە فرۆكەی تایبەتی گەیەنرایە وڵاتی فەرەنسا.
خاڵێكی تر كە پێویستە ئاماژەی بۆ بكرێ حوسێن عوبەیدی ئیمام و وتارخوێنی تونسی لەو بەراوردەیدا راستەوخۆ بە سەرۆك و بڕیار بەدەستانی ئەو 24) وڵاتە عەرەبی و 50) وڵاتەی ئیسلامییە دەڵێ: ئێوە خاوەنی وڵاتی سەربەخۆ و هێز و سوپا و جبەخانەی جەنگین، كەچی بە هەمووتان مەسعود بارزانییەكتان لێ درووست نابێ و ناتوانن خواردەمەنی بگەیەننە غەززەی عەرەبی و موسڵمان نشین.
مەسعود بارزانیش خاوەنی وڵاتێكی داگیركراو و بەش بەش كراوە و چوار داگیركاری وڵاتەكەشی بە هێز و سوپا بەردەوام بۆی لە بۆسەدان و پیلان لە دوای پیلانی لە دژ دەگێڕن، كەچی لە هەر شوێنێك كورد لێی بقەومێ سنوورە دەستكردەكانی وڵاتەكەی دەبڕێ و بە هانایانەوە دەچێ، بە واتایەكی تر پێیان دەڵێ غەززە بێكەسە و ئەگەر خاوەنی مەسعود بارزانییەك بووایە، ئاوا بێ پشت و پەنا نەدەكەوت و لانیكەم خواردەمەنی دەگەیاندە منداڵە برسییەكانی.
