خەبات- عەلی بانیشاری-هەولێر:
بەهۆی كەمبوونەوەی مریشك لە كێڵگە پەلەوەرییەكانی باشووری كوردستان نرخی كیلۆیەك مریشكی زیندوو لە بازاڕدا بۆ 3500 دینار بەرزدەبێتەوە. بەرزبوونەوەی نرخی مریشكی زیندوو ناڕەزایی لای هاوڵاتیان دروستكردووە. خاوەن كێڵگەیەكی پەلەوەریش دەڵێ” ساڵانە و لەم وەرزەدا كێڵگەكان كەمتر مریشك دەخەنە بازاڕەوە، چونكە نەخۆشی بڵاودەبێتەوە، ئەوەش وا دەكات نرخی مریشكی زیندوو بەرزبێتەوە”. بەپێی ئامارەكانی كۆمەڵەی كێڵگە پەلەوەرییەكانی هەرێمی كوردستان نزیكەی 1500 كێڵگەی پەلەوەری لە باشووری كوردستان موڵەتیان پێدراوە.
بەرزان دلێر، دوكانی مریشك فرۆشتنی لە شاری هەولێر هەیە و دەڵێ” هەفتەی رابردوو یەك كیلۆ مریشكی زیندوو 2500 -2800 دینار بوو، بەڵام لەسەرەتای ئەم هەفتەیەوە كیلۆیەك مریشك بۆ 3500 دینار بەرزبووەتەوە”. گوتیشی” ساڵانە و لەم وەرزەدا نرخی مریشك بەرزدەبێتەوە، چونكە خستەڕوو كەم دەبێتەوە و خواست زۆر دەبێت”. ئەو دەشڵێت” بەرزبوونەوەی نرخی مریشك كاریگەریەكی ئەوتۆی لەسەر رێژەی فرۆشتنی نابێت، چونكە ئەگەر كەسێك چوار كیلۆیش بكڕێت چەند هەزارێك دەچێتە سەری”. ئاماژەی بەوەشدا گۆشتی مریشك بۆ هەندێك خێزان وەكو پێداویستی رۆژانەی لێهاتووە.
ئەكرم بەكر، یەكێكی دیكە لە مریشك فرۆشەكانی شاری هەولێر و دەڵێت” لە وەرزی زستان و هاویندا زۆربەی كات نرخ مریشك بەرز دەبێتەوە، چونكە لەو دوو وەرزەدا تێچووی بەخێوكردنی مرشك لە وەرزەكانی دیكە زیاترە و رێژەی لەناوچوونیشی زیاترە، بۆیە خاوەن كێڵگەكان مریشك بە گرانتر بە ئێمە دەفرۆشنەوە”. گوتیشی” هەر كاتێك مریشك لە كێڵگەكان كەمیكرد یان بۆ ناوەڕاست و باشووری عێراق رەوانە كرا راستەوخۆ نرخەكە گران دەبێت”.
قەدری عەلی، خاوەن كێڵگەی پەلەوەرییە لە پارێزگای هەولێر، ئەو دەڵێت: بەهۆی بڵاوبوونەوەی نەخۆشی نیوكاسڵ كە نەخۆشییەكی پەلەوەرییە لە چەند مانگی رابردوودا خاوەن كێڵگەكان نەیانتوانی جوجەڵە داخڵی كێڵگەكانیان بكەن، چونكە بەشێك لە جوجەڵەكان بەهۆی ئەو نەخۆشییەوە لەناو كێڵگەكان لەناودەچن، ئەوەش زیانی مادی لە خاوەن كێڵگەكان دەدات”. گوتیشی” كەمبوونەوەی مریشك لە كێڵگەكان نرخی مریشكی زیندووی بەرزكردووەتەوە”.
ئەو خاوەن كێڵگەیە باس لە هۆكارێكی دیكەی كەمبوونەوەی مریشك لە بازاڕ دەكات و دەڵێ” لە وەرزی زستاندا تێچووی بەخێوكردنی مریشك زۆرە، بۆیە بەشێك لە خاوەن كێڵگەكان مریشك بەخێو ناكەن و ئەوەشی بەخێوی دەكات ناچارە بە گرانتر لە وەرزەكانی دیكە بیفرۆشێتەوە”. بە بۆچوونی قەدری عەلی هۆكاری سێیەم بۆ گرانبوونی نرخی مریشكی زیندوو “چوونی بەرهەمەكانیان بۆ ناوەڕاست و باشووری عێراق”.
بەپێی ئامارەكانی وەزارەتی كشتوكاڵ ساڵانە دانیشتووانی باشووری كوردستان پێویستیان بە نزیكەی 150 هەزار تەن گۆشتی مریشكە، بەڵام بەرهەمی كێڵگە پەلەوەرییەكان لەو رێژەیە زۆر زیاترە و دەگاتە 250 هەزار تەن.
