سازان وەهاب
تەنیا عێراق چەقی ململانێكەی نێوان ئێران و ئەمریكا نیە، بەڵكو تەواوی ناوچەكە بووەتە گۆڕەپانی شەڕ، لە سوریا مانەوەی ئەسەد و دەستگرتنەوە بەسەر بەشێكی زۆری خاكە لەدەستچووەكەی جۆرێك بوو لەسەركەوتنی ئێران، لە عێراقیشدا لابردنی سەرۆك وەزیران و دروست كردنی ناسەقامگیرییەك هاوشێوەی لوبنان زەنگێك بوو بۆ ئەمەریكا.
مانۆڕە دەیارییەكانی ئێران لە كەنداو و جوڵە سیاسی و سەربازییەكانی لە ناوچەكە و نزیكبوونەوەی هەڵبژاردن لە ئەمریكا دۆخەكەی ئاڵۆزكرد، بەڕادەیەك بەرلێككەوتنی سەربازی لەئەگەر دەربچێت و شەڕی ژێربەژێر ببێتە شەڕێكی راگەیەنراو. بەمەش ئەمریكا زۆر لە بەرنامەكانی ئێرانی ئیفلیج كرد.
دەكرێ لە چەند شوێنێكی دیكەی ناوچەكە رووبەڕووبوونەوە و شەڕی نێوان هێزە بەوەكالەتەكانی ئێران و ئەمریكا بێتە ئاراوە، ئەمەش ئەگەری هەمیشە كراوە و چاوەڕوان كراون.
بەڵام عێراق و كوردستان یەك شوێن و دوو دەسەڵات و تێڕوانینی جیاوازە، سەرۆك وەزیرانی دەستلەكاركێشاوەی عێراق عادل عەبدولمەهدی لەكۆبوونەوەی هەفتانەی حكوومەتە كاربەڕێكەرەكەیدا وتی” كوردستان دۆخێكی تایبەتە و دەبێت رەچاوی ئەو دۆخە تایبەتە بكەین. ئەم پەیامەی عەبدولمەهدی بۆ عێراقییەكان نەبوو بەتەنیا، بەڵكو بۆ ئێران و وەكیلەكانی ئێران بوو لە عێراق كە كورد بەشێكە لە هاوپەیمانی دژ بە تیرۆر، دۆستی نزیكی ئەمریكایە، بەڵام مانای ئەوە نییە ئەم دۆستایەتییە دژی ئێمە و ئێرانیش بەكاربهێنێت، ئەمە پەیامێكی تەواو روون بوو.
سەرۆك مەسعود بارزانیش لەپەیامەكەیدا وتی: “لە ماوەی چەند ڕۆژی ڕابردوودا بارودۆخێكی زۆر ترسناك لە ناوچەكە و عێراقدا هاتۆتە ئاراوە و لە هەموو لایەك هەست بە مەترسییەكی گەورە دەكرێت”. هەروەها لە درێژەی پەیامەكەیدا سەرۆك بارزانی گوتی: “ئێمە لە یارمەتیدان بۆ دۆزینەوەی چارەسەر درێخی ناكەین، بەڵام لەگەڵ ئەوەدا نابین كە وڵات تووشی شەڕی بە وەكالەت و چارەنووسی نادیار بكات.
دۆخەكە ترسناكە، بەشێك لە چارەسەر دەبین، بەڵام ناچینە شەڕی بەوەكالەت، ئەم شەڕی بەوەكالەتەش روونە، وەك میلیشیا شیعەكان نابین و لەگەڵ ئەوەشدا، نابینە هەڕەشە لەسەر ئێران، لە ماوەی حكومڕانییەكەی هەرێمی كوردستانیش ئەمە بە كردەوە ئێران دیویەتی كە هیچ كاتێك هەرێمی كوردستان نەبووەتە هەڕەشەیەك لەسەر بەرژەوەندییەكانی، بەڵام هیچ كاتیش سیاسەتی ئێران بە دروست نەزانراوە و نەچووەتە ژێرباری ئەو سیاسەتانەی كە كورد پێیوایە لە بەرژەوەندیی گەلانی ناوچەكە نییە بەتایبەتی پرۆسەی ئاشتی و سەقامگیری.
ئاساییە خەڵكی هەرێمی كوردستان بترسن و بپرسن كێ دەمانپارێزێت؟ ئێمە لە بەرەی ئەمریكاین و ئێرانیش هەڕەشە لە هاوپەیمانەكانی ئەمریكا لە ناوچەكە دەكات!
ئێران دۆخی هەرێمی كوردستان باش هەڵدەسەنگێنێ، دەزانێت نە دەسەڵاتەكەی نە میللەتەكەی بەشێك نین لە ناسەقامگیری، بەشێك نین لەو شەڕەدا، بەڵكو بەشێكن بە دوای دەرفەتی رووداوەكان دەگەڕێن و لە كوێدا بەبێ مەترسی دەستكەوتێكیان دەستبكەوێت بۆ سەقامگیرتركردنی ناوچەكەیان درێغی ناكەن و خۆیان لە هەموو ئەو لایەندارییە دەپارێزن كە لە عێراق بووەتە بابەتێكی بێزاركەر لەلایەن میللەتەوە.
هەرێمی كوردستان لە هەنگاوەكانی بەتایبەتی سەرۆكایەتی هەرێم رەنگیداوەتەوە، دەبێتە پارێزەری خۆی و كۆمەڵگەی نێودەوڵەتیش لە تەواوی رووداوەكانی ناوچەكە و هاتنی داعش و دوای 16ی ئۆكتۆبەری ساڵی 2017 تێگەیشت هەرێمی كوردستان لانكەی ئارامی و سەقامگیری و پێكەوەژیان و ئاشتییە، ئەمەش دیسان خاڵێكی گرنگە، بەڵام لە هەمووی گرنگتر كە كوردستان دەپارێزێ لە ئاگر و لێكەوتەكانی شەڕ یەكڕیزییەكەیە كە هەموان نزای بۆ دەكەن.
