خەبات: ڕۆشنا عەلی:-
دوای ئەوەی وەزارەتی خوێندنی باڵاو توێژینەوەی زانستی پڕۆسەی پێشەشكردنی خوێندنی دبلۆمی باڵا و ماستەر و دكتۆرا ی لە زانكۆ حكومیەكانی هەرێمی كوردستان بۆ ساڵی خوێندنی 2019-2020 راگەیاند، خوازیارانی ئەو خوێندنە گلەیی لە ڕێكارو ڕۆتینە زۆرەكانی دەكەن ، خوازیارێك ئاماژە بەوەدەدات كە كورسییەكان بە نادادپەروەری دابەشكراوەو پشكی گەورە بەر خودی وەزارەت كەوتووە.
ناداد پەروەری لە دابەشكردن حیكمەت حەسیب قادر مامۆستای زمانی ئینگلیزی دەربارەی تێبینییەكانی بۆ خەبات دواو ئاماژەی بەوەدا كە ئەوان وەك فەرمانبەران گلەییان لە وەزارەتی خوێندنی باڵا هەیە ئەو لەمبارەیەوە وتی : یەكێك لە تێبینییەكانم تایبەتە بە تەرخانكردنی كورسییەكان كە سێ جۆرە یەكەمییان بۆ فەرمانبەرانی كەرتی گشتی وفەرمانبەران وەزارەتی خوێندنی باڵا و هەندێكی تر بۆ پارالێڵ كە كرێی خوێندن لە ئەستۆی خۆیانە ، ئێمە وەكو فەرمانبەران و مامۆستایان جگە لە فەرمانبەرانی وەزارەتی خوێندنی باڵا ئەو گلەییەمان هەیە كە وەزارەتی خوێندنی باڵا كۆمەڵێك كورسی بۆ موعید و فەرمانبەرانی خۆی تەرخانكردووە كە دەیانخەنە ناو ئەو كێبڕكێیەوە، من وەك خۆم كە ماوەی یانزە ساڵە لەوەزارەتی پەروەردە مامۆستام و خزمەت ئەكەم پێم ڕاست نییە كە وەزارەت كورسی بۆ فەرمانبەری خۆی داناوە لەوە دەرنەچێ بیخاتە كێبڕكێی كورسییەكانی فەرمانبەرانیش یان بچێتە ئەوەی پارالێڵیش ، بۆیە بۆچوونم وایە كەمادام كورسییەكان جیاكراوەتەوە با خوێند-نی باڵا كورسییەكانی خۆی ببا و كورسییە گشتییەكانی وەزارەتەكانی تریش لەسەر كورسی گشتی كێبڕكی بكەن و پارالێڵیش با بۆ هەمووی بێت خاڵێكی تر ئەوەیە كەلە هیچ كام لە رێنماییەكان ئاماژە بە تەمەن نەكراوە كە خاڵی لەسەر بێت لە كاتێكدا ئەبوو خاڵی لەسەر بێت ،چونكە من بۆنموونە 50 ساڵ بم و تۆ 30 ساڵ بیت ئەگەر مەرجی تەمەن 55 ساڵ بێت ئەوا من 5 ساڵم لەبەردەستە و تۆ 25 ساڵ كەواتە با مەرجی تەمەن هاوكار بێت ، تێبینییەكی تر ئەوەیە كە ژمارەی كورسییەكان زۆر كەمن بۆنموونە بەشی ئینگلیزی لە زانكۆی صەڵاحەدین سێ كورسییە كە كێبڕكێی لەسەرە ، لە وڵاتانی دنیا ئاسانترین شت بەرزكردنەوەی بڕوانامەو ئاستی زانستی تاكە ئەو وەزارەتانەی پەیوەندیدارن زۆر هاوكارن و هاوكاری تاكەكانن بۆ ئەوەی پەرە بە بڕوانامەكانییان بدەن بۆنموونە ساڵانی ڕابردوو ئافرەتێك بڕوانامەی بەكالۆریۆسی لەتەمەنی 80 ساڵی بەدەستهێنا.
سوود مەند بوونی كۆمەڵێك
بارزان محەمەد دەربارەی رێكارەكانی كە تاچەند ئەم هەموو ڕێكارە پێویستن ئاماژە بەوە دەدات كە پێویست بەم هەموو ڕێكارە پێشوەختەیە ناكات ئەو وتی: نەخێر شتێكی زۆر زیادە، لەهیچ شوێنك و وڵاتێك ئەم هەمووڕێنماییە و ئەومەرجەقورسانەنیین، تەنهابریتین لە قورس كردنی ئەركی سەرشانی قوتابیان، لەمەش داچەند كەسێكی دیار لێی سوود مەند دەبێت و زۆرینەش لێی بێ بەش دەبن و ساردبوونەوە لەخوێندن و دووبارە ئیتیمای نیشتیمانی و ئەو مەبدەئەی پێشتر هەی بووەبۆ وڵات بەگشتی نامێنێت و كاری پێناكاتەوە.
عەلی ئەحمەد خوازیارێكی خوێندن ئاماژە بەوەدەدات كە ڕێكارەكان ئەركی سەرشانی خوازیارانی قورسكردووە ئەو لەمبارەیەوە وتی: وەك ئاشكرایە وەزارەتی خوێندنی باڵا كۆمەڵێك ڕێكاری داناوە بۆ پێشكەشكردن خوازیارانی ماستەرو دكتۆرا، بەڕای من هەموو ڕێكارێك پێویستە بگیرێتە بەر بەڵام بەشێوەیەك بێت لە بەرژەوەندی خوازیار بێت، بەڕاستی هەندێك ڕێكار دانراون كە بەهیچ شێوەیەك پێویست ناكات لە سەرەتای پێشكەش كردن، ئەركی سەرشانی خوازیاری ئێكجار قورس كردوە ، خوازیار زۆر سارد ئەكاتەوە بەڕادەیەكی زۆر وا ئەكات بە ڕەشبینیەوە پاشەكشە بكات لەو خەونەی هەیەتی بە نموونە تەنها بۆ ئەو تاقیكردنەوانەی كە خوازیار پێویستە بیكات پێش وەربگیرێت كە تاقیكردنەوەی توانستی زانستییە بۆ ئەم تاقیركردنەوەیە خوازیار دەبێت بە چەندین مانگ خۆی ئامادەكردبێت لە كاتێك دا بابەتەكان زۆر درەنگ ڕاگەیەنران.
بارگرانیەكی تر ئەم كتێبانە لە بازاڕ بە نزیكەی 100 هەزار یا زیاتر دەستت دەكەوێ، سەرەڕای ئەوەی كە دەبێ لەكاتی فۆرمی پێشكەشكردن بۆ تاقیكردنەوەی توانستی 150 هەزار بدەی كە ئەمەش بەڕاستی بارگرانیەكی ئێكجار زۆر دەكەوێتە سەرشانی خوازیار ، دەكرا ئەمە بڕەكەی كەم بكرایەوەو باشتر وابوو لەو قوتابیانە وەربگیرێت كە لە تاقیكردنەوەكە دەردەچن یان ئەگەر هەموو ئەو داواكاریانەش نەبێ ، بەڵام دەكرا بەشێكی زۆری ئەم داواكاریانەی وەزارەت خستویەتیە پێش خوازیار لەوكاتانە داواكرابا كە خوازیار وەرگیرابا، بۆیە ئەمەش ئەركی سەرشانی خوازیارانی قورستر كردوەو وە هیواو ئومێدی زۆریان نیە.
تێبینییەكی تر ئەوەیە كە ڕێژەی كورسیەكان زۆر كەمە دەكرا كورسی زیاتریان تەرخان كردبا، وە بۆ ئەو فەرمانبەرانەشی كە دامەزراوو فەرمانبەری دەوڵەتن كار ئاسانی زیاتر كرابا ، چونكە ئەوان ڕاستەوخۆ دوای بەدەستهێنانی بڕوانامە خزمەت دەكەن نەك چاوەڕێی دامەزراندن.
سەرەڕای هەموو ئەو تێچوونانە جێگای دەستخۆشیە كە وا لە خوازیار كراوە لەجیاتی داهات و سامانی ولات ببات بۆ دەرەوەو لە جیاتی وڵاتێكی تر لەم وڵاتەی خۆمان بخوێنێ و داهاتەكەی هەر لەناوخۆ خەرج بكات كە ئەمەش سوودی بۆ هەموو لایەك دەبێت، بەڵام بە باشی دەزانم بۆ ساڵانی ئایندە یان ئەگەرچی هێشتا كات ماوە وەزارەت هەندێ بڕیار دەربكات كە كاری خوازیاران ئاسانتر بكات.
