خەبات: سۆلین سلێمان:-
هونەرمەندی دەنگخۆش ئارارات هەڤاڵ حاجی، كە لە ماوەی رابردوودا ناوبانگێكی باشی لە بواری هونەری بەدەست هێنا لەم چاوپێكەوتنەدا دەربارەی كارە هونەرییەكانی دەڵێت: ماوەیەكی زۆرە گۆرانی دەڵێم هەروەها لە قوتابخانە گۆرانیم دەگوت و حەزێكی تایبەتی خۆم بووە، سەبارەت بە یەكەم بەرهەمی ڤیدیۆ كلیپیەوە گوتی: یەكەم بەرهەمم بە شێوەی ڤیدیۆ كلیپ لە ساڵی 2015 بە ناوی “قەدەر” بڵاو بووە، گوتیشی گۆرانیم زۆرە، هەندێكیان كاری كلیپم بۆ ئەنجام داون و هەندێكیشیان تەنها بە شێوەی دەنگە و هەندێكیش لەوان ئامادەكراون، بەڵام هێشتا بڵاونەكراونەتەوە، ئەو گۆرانییانەی كەوا كاری كلیپم بۆ ئەنجام داون 5 گۆرانین ، و هەندێك كلیپیشم هەیە تایبەتن، نزیكەی 30 گۆرانیم بڵاوم كردوونەتەوە، ئاماژەشی بەوە كرد : كاتێك دەستم بە كاری هونەری كرد وەك حەزێك دەستم پێكرد.
سەبارەت بەوەی كەوا ناوبانگ بوون چ شتێكی لێ سەندوتەوە دەڵێت: بەناوبانگ بوون ناتوانێت هیچ شتێكت لێ بسەنێتەوە ئەگەر خۆت بتەوێت، هەروەها دەربارەی ئەلبوومەكەی دەڵێت: كارم لەسەر دروستكردنی ئەلبومێك دەكرد، بەڵام بە هۆی هەندێك تەگەرەوە نەمتوانی بەردەوامی پێ بدەم و بڵاوی بكەمەوە، لە پرسیارێكدا كە ئایا چۆن بتوانین هونەری كوردی پێش بخەین دەڵێت: پێشخستنی هونەری كوردی لە دەست شاعیر و ئاوازدانەرەكانە، ئەوان دەتوانن كەلتووری زمانەوانی و هەڵبەستی كوردی پێش بخەن، ئاستەنگ و گیروگرفت زۆر دێنە پێش هونەرمەندان، بەڵام هێزێكی زۆر پێویستە بۆ ئەوەی بتوانیت رووبەروویان ببیتەوە، هەروەها هونەری كوردی پێشكەوتنێكی زۆری بە خۆیەوە بینیوە، ئاشكراشیی كرد، حەز بە هەموو ئالەتە میوزیكییەكان دەكەم و سەرسامی دەنگی زۆرێك لە هونەرمەندانم بە هونەری باوكم سەرسامم و هەر ئەویش پاڵپشتی سەرەكیمە لەو بوارەدا.
