سوورە مەرگەیی
مێژووی بزووتنەوەی رزگاریخوازی كورد پڕیەتی لە داستان و گیان بەخشینی پەرجوو ئامێز، بەڵام كات و شوێن و هەستیاری ئەو قۆناغەی داستانەكەی تێدا رووداوە وا دەكات ئەم داستان لەو داستان جیا بكاتەوە، بۆ نموونە: گرنگی و گەرورەیی داستانی خواكورك لەوەدا نەبوو دوژمن چەند كوژراو و بریندار و دیلی هەیە و پێشمەرگەش چەند شەهید و برینداری هەیە، داستانەكە لە كاتێكدا بوو رژێمی بەعس لە شەڕی هەشت ساڵەی عێراق و ئێران بە سەركەوتوویی هاتبووە دەر و ناوچە ئازاد كراوەكانی ژێر دەسەڵاتی هێزی پێشمەرگەشی داگیر كردبوونەوە، بەوەش غرووریەت گرتبووی، جا گەورەیی ئەو داستانە لەوەدابوو پێشمەرگە لە خواكورك غرووریەتی دوژمنی تیكشكاند و ئەنفالی بە چۆكدا هێنا، هۆكاری ئەو سەركەوتن و غروور شكاندنەی رژێم دەگەڕێتەوە بۆ ئەوەی سەرۆك بارزانی راستەوخۆ سەرپەرشتی داستانەكەی دەكرد، ئەوەش هێزی زیاتری بە پێشمەرگە دەبەخشی.
بۆچی تا ئێستاش باس لە داستانی كۆڕێ دەكرێ؟ خۆ لە زۆر داستانی تردا دوژمن خەسارەی گیانی و ماڵی زۆرتری لێكەوتبوو، بەڵام زیاتر باس لە دەستانی كۆڕێ دەكرێ، گەورەیی داستانی كۆڕی لەوە دایە كە سەركەوتنی بە شكستی دوای راپەڕین بەخشییەوە، یان گەورەیی داستانی پردێ و سحێلا لەوە دایە كە چۆكی بە گەلەكۆمەیەكی هەرێمی دادا و گەورەترین خەونی دوژمنان و وڵاتفرۆشانی ناوخۆی لە گۆڕناو حكومەتی هەرێمی لە ناو پیلانێكی فرە جەمسەر دەرهێنا.
داستانی زاویتە و داستانی شارستێنیش دوو داستان بوون لە دوو كات و دوو شوێنی جیاوازدا، هەرچی داستانی زاویتە بوو لە سەرەتای شۆڕشی ئەیلول و وەڵامدەرەوەی سەرەڕۆیی رژێمی داگیركاری بەغدا بوو، هەرچی داستانی شارستێنیش بوو لە سەرەتای شۆڕشی گوڵان و وەڵامدەرەوەی پیلانێك بوو كە لەژێر چاودێری ئەمەریكا بەڕێوەچوو، ئاسان نییە مێژووش بتوانێ گەورەیی ئەو دوو داستانە دەربخات، بۆیە بۆ دەرخستنی گەورەیی ئەو دوو داستانە فەرموودەیەكی سەرۆك بارزانی وەك بەڵگە دەخەمەڕوو.
لە ساڵی 2003و لە یادی داستانی شارستێن لەگەڵ كەسوكاری شەهیدانی داستانەكە و چەند پێشمەرگەیەكی بەشداربوو سەردانێكی سەرۆك بارزانیمان كرد، لە باسی گەورەیی داستانی شارستێندا فەرمووی: شۆڕشی ئەیلول شۆڕش نەبوو، داستانی زاویتە كردی بە شۆڕش، شۆڕشی گوڵانیش شۆڕش نەبوو، داستانی شارستێن كردی بە شۆڕش.
وەك پێشتر ئاماژەم بۆ كرد زۆر جاران كات و شوێن و هەستیاری قۆناغەكە گەورەیی بە داستانەكان دەبەخشێ، جا ئەگەر داستانی خواكورك شكستی بە گەردەلوولی ئەنفال هێنابێ، داستانی كۆڕێ سەركەوتنی بە شكستی دوا راپەڕین بەخشی بێ، داستانی سحێلا خەونی داگیركارانی كوردستان و وڵاتفرۆشانی ناوخۆی لە گۆڕ نابێ، ئەوا داستانی زاویتە و شارستێنیش بڵێسەی دەستپێكی دوو شۆڕش و ناسنامەی دوو شۆڕش بوون.
