خه‌بات: عەلی بانیشاری – هەڵەبجە:-
لە پارێزگای هەڵەبجە و ئیدارەی راپەڕین و قەزاكانی پێنجوێن و سۆران و چەند ناوچەیەكی دیكە هەڵمەتی ناشتنی بەڕوو بۆ ماوەی دوو هەفتەیە دەستی پێكردووە. بەپێی هەندێك ئاماری نافەرمی لە ماوەی ئەو دوو هەفتەیەدا نزیكەی 30 هەزار بەڕوو چێنراون. بەوتەی شارەزایانی باخداری كانوونی یەكەمی هەموو ساڵێك باشترین مانگە بۆ چاندنی بەڕوو. داربەڕوو یەكێكە لەو رووەكانەی یارمەتیدەرێكی گەورەی پاك ڕاگرتنی ژینگە دەدات و بەرگەی بێ ئاوی زۆر دەگرێت. هەروەها داری بەڕوو رێگر دەبێت لە راماڵینی خاك لە ناوچە شاخاوییەكان.
ئەحسەن حمە كەریم، سەرپەرشتیاری گروپی شاخەوانی هەورامان بەخەباتـی گوت” گروپەكەیان لە ماوەی دوو هەفتەدا 8000 هەزار بەڕووی لە شاخەكانی هەورامان چاندووە”. گوتیشی” هەڵمەتەكە بە دوو قۆناغ ئەنجامدراوە، قۆناغی یەكەم 3000 هەزار بەڕوویان چاندووە و قۆناغی دووەمیش 5000 هەزار”. ئەوەشی گوت” ئامانج لە هەڵمەتكە سەوزكردن و جوانتركردنی ژینگەی هەرێمی كوردستان و پاك راگرتنیەتی”. باسی لەوەشكرد چاندنی بەڕوو بیرۆكەیەكی نوێ نییە، بەڵكوو دەیان ساڵە هاوڵاتیانی باشووری كوردستان بەڕوو لەم كاتەدا چاندووە.
سەرپەرشتیاری گروپی شاخەوانی هەورامان هەروەها گوتیشی” لە هەڵمەتدا چەندین كەس لە هەردوو رەگەز بەشداریان تێدا كردووە”. ئاماژەی بەوەشدا لە داهاتوودا گروپەكەیان پلانی دیكەی بۆ سەوزكردنی سروشتی هەرێمی كوردستان هەیە. ئەحسەن حمە كەریم داواشدەكات هەمووان دەستیان لە پاك ڕاگرتن و سەوزكردنی سروشتی كوردستاندا هەبێت.
سالار بیارەیی، یەكێكە لە ئەندامانی ئەو گروپەی كە 8000 هەزار بەڕوویان لە شاخەكانی هەورامان چاندووە. ئەو دەڵێ” ئەو بەڕووانەی كە چێنراون سەرجەمیان هی داربەڕووەكانی هەورامانن”. گوتیشی” لەگەڵ راگەیاندنی هەڵمەتەكە چەند هاوڵاتی پەیوەندی بە ئێمەوە كردووە تا بەشداربن لە چاندنی بەڕوو، هەر ئەمەش وایكرد كارەكە فراوان ببێت و چەندین كەس بە خۆبەشداری بەشداری هەڵمەتی چاندنی بەڕوو بكەن”. دەشڵێت” هەڵمەتەكە سەرەتا لە شاخەكانی هەورامانە دەستی پێكردووە، بەرنامەی ئەوەمان هەیە لە ناوچەكانی دیكەی كوردستانیش بەڕوو بچێنین و هەڵمەتەكە فراوانتر بكەین”.
بەڕوو 600 جۆری هەیە، دابەش دەكرێت بۆ دوو گروپ هەمیشە سەوز، وەرزی. داربەڕوو كۆمەڵێك سوود و تایبەتمەندی هەیە لەوانەیش 1-یەكێكە لەو رووەكانەی كە یارمەتی خاوێن كردنەوەی ئاو و خاك ئەدەدات، ئەمەش لە رێگەی هەڵمژینی هەموو ئەو كانزا و پێكهاتە زیانبەخشانەی كە لە ناو خاكدا هەن. 2- یارمەتیدەر دەبێت لە راگرتنی راماڵینی خاك بە تایبەت بە ناوچە شاخاوییەكان. 3- داربەڕوو وەكو سەرچاوەی خۆراكی بۆ كۆمەڵێك گیانلەبەر و باڵندە دادەنریت. 4- یەكێكە لەو درەختانەی پاش سووتانی زۆر بەخێرایی گەشە دەكاتەوە. 5- داربەڕوو توانای خۆگونجاندنی لەگەڵ گۆڕانكارییە ژینگەییەكان هەیە و بەرگەی پلەی گەرما و سەرمای زۆر دەگرێت. 6- بەشێوەیەكی گشتی تەمەنی داربەڕوو دەگاتە 500 ساڵ. 7- بەڕوو وەكو چارەسەر بۆ چەندین نەخۆشی سوودی لێ دەبینرێت.
