فارس قادر فەقێ عەبدوڵڵا❊
ئەمە قسەی كوردە لە باب و باپیرانمانەوە بۆمان مایتەوە، بەڵێ كە گوتت حەق، كەواتە راست (عدل) ئاو رادەوەستێت و هیچ رێڕەوێكی نامینێت دزەی پێدا بكات، بەڵێ ئاو لەسەر تەرازووی لەنگ جوڵە دەكات و لە تەرازووی راست، راست رادەوەستێت. ئەم شرۆڤە و بابەتەم لە بەرواری 11/12/2019وە كاردانەوەیەكی هزرییە لە ناخم روویدا، بەرانبەر بە هەڵوێستی هەندێك كەس و گرووپی نابەرپرس بەناو كورد، بەڵێ كاتێك لە پاش نیوەڕۆی رۆژی 11/12/2019 لە كاتژمێری 4-3 بەرانبەر بە تەلەفزیۆن و كەناڵی رووداو دانیشتبووم، ئەم دوو هەواڵەم بیست:
1-نوێنەری سووریا لە نەتەوە یەكگرتووەكان لە وڵامی پەیامنێری رووداودا لە كۆنگرەیەكی رۆژنامەوانیدا لەسەر كێشەی كورد، گوتی: لە سووریا هیچ شتێك نییە پێی بگوترێت كێشەی -كورد! من دەزانم ئەوە شتێكی سەیر نییە، ئەوە واقیعی كوردە لە سووریا و فەلسەفەی حزبی بەعسە و لەوە زیاتر چاوەڕوانیان لێ ناكرێت، بەڵام دەكرێ پرسیارێك لەو زۆڵە كوردانەی خۆمان بكەین، لە رۆژئاوای كوردستان كە چەندین ساڵە شەڕی هەموو دونیایان كرد، شەڕی كورد لەگەڵ كوردییان كرد! كوردستانی رۆژئاوایان پاوانكرد و بۆ خۆیان كەسیان قبووڵ نەكرد، كەچی تەنیا شەڕی رژێمی سووریایان نەكرد بۆچی؟ شارەكانی سووریایان پاراست بۆچی؟! بە بەشی كوردستانیشەوە تەسلیم بە سووریای بەعسیان كردەوە بۆچی؟ دەكرێت بپرسین و بڵێین برایانی خۆسەری (خۆربەسەر) بۆ كێتان كرد بۆ كوردستانتان تەسلیم بە بەشار ئەسەد كردەوە؟ بۆچی شەڕی هەموو كوردتان كرد تەنیا و تەنها شەڕی بەشارتان نەكرد توخوا بۆچی؟! دەبینین ئێستا لە وڵامدا نوێنەری بەشار گوتی كێشەیەك نییە ناوی كێشەی كورد بێت گەر وایە كەواتە ئێوە كورد نین! تكایە وڵام؟.
2-كاك عەلی باپیر لە مەراسیمی مردنی مامۆستا مەلا سدیق خوای لێخۆشبێت قسەی جوانی كرد، بەڵێ وایە لە كوردستان جیاوازییەكی زۆری چینایەتی دروستبووە لە نێوان هەژار و دەوڵەمەند، بەڵێ رادەبەدەر جێگای هەڵوەستە لەسەركردنە و ناكرێ وا بمێنێت، ناكرێ قبووڵ بكرێت، ناكرێ ئەم جیاوازییە بە ئاسایی وەربگیرێت، بە كورتی بەڕێوەبردنی خۆسەر لە سووریا شەڕی برایانی كورد لەگەڵ داگیركەری توركیا شەڕی كورد لە رۆژئاوا لەگەڵ داعش و قسەكانی ماموستا عەلی باپیر لە جیاوازیی نێوان هەژاران و دەوڵەمەندان ئۆبار بە ملم، هەڵوێستن ئازایەتین، كوردایەتین، نیشتمانپەروەرین، بەڵێ مرۆڤ حەق بڵێ ئاو رادەوەستێت! جا باشە با پرسیارێك لە رێبەرانی خۆسەر بكەین بڵێین ئەی شەڕی كورد لەگەڵ كورد پاوانكردنی رۆژهەڵاتی كورد لەبەردەم كورد، كوشتنی كورد بە دەستی كورد تەسلیمكردنەوەی كوردستانی رۆژئاوا بۆ ژێردەستی داگیركەری رژێمی بەعسی سووری و دان نەنانی دوژمنان بە كێشەی كورد و ئینكاریكردنی مافی كورد لە سەرەتای ساڵی2020 كە چەند رۆژێكمان ماوە ئەی گوتن و باسكردنی ئەم شەرمەزارییانە چ خۆمان بكەین یان دوژمن ئەویش حەق نییە وابزانم ئەمانە ناشاردرێنەوە دەگووترێن.
با پرسیارێكی تر لە ماموستا عەلی باپیر بكەین و بڵێین مامۆستای بەڕێز قسەكانت زۆر جوان بوون، دەبێت بە ئاوی زێر بنووسین و ناشبێت ئەم جیاوازییە لە نێوان هەژاران و چینێكی دەوڵەمەندی تاوانبار و دز و جەردە هەبێت و رێگا بدرێت بۆیان بچێتە سەر، بەڵام خۆ ئەگەر منیش پرسیار بكەم و بڵێم ئەی چۆن دەبێت تۆ بە تەنیا لەناو پەرلەمانی كوردستان جورئەت بكەیت رێز لە سروودی ئەی رەقیب نەگریت! رێز لە شعووری 40-50 ملیۆن كورد نەگری! رێز لە دایكی شەهید نەگریت! رێز لە خوێنی شەهید نەگریت! رێز لە شعووری رۆڵەكانی شەهیدان نەگری؟! دە توخوا وڵام بدەوە!
ناكرێ بڵێیت ئایین رێگا نادات؟! گەروا بڵێیت منیش دەڵێم خوای گەورە رێگات پێ نادات شعووری 40-50 ملیۆن كەس بریندار بكەیت، پێ لەسەر سەری خەباتی سەدان ساڵەیان بنێیت، فەرموو ئەوە من و تۆ و ئاینی ئیسلام، بەڵێ كورد ئیسلامە و لە ئیسلام تێدەگات، گەر ئەوەی بەڕێزیشت كردت سیاسەتە و سیاسەت بوو ببوورە منیش حەقمە قسە بكەم دووبارە دەڵێم ماموستا مەلا عەلی بەڕێز و ئەوانەی رۆژئاواتان پاوانكرد و تەسلیم بە سووریاتان كردەوە، كە گوتت حەق ئاو رادەوەستێت، منیش حەقم! گەر ئەو پرسیارانەتان لێ بكەم، بانێك و دوو هەوا نابێت كوردستانێكی سەربەخۆ نەبێت حوكمڕانییەكی خاوێن و یەكسانی و دادپەروەریش نابێت، بەڵێ نابێت لە ژێر چەتری كوردایەتی و ئاڵای كوردستان و سەربەخۆیی هەمووی دەبێت ئەو كەسە بڕوای بە خاك و وڵاتی خۆی نەبێت، لەناو ناخی خۆی ئازاد نەبێت، بۆ خۆی نەبێت بە هیچ كەس نابێت، بەڵێ حەقمە بڵێم ناختان ئازاد بكەن، بەڵێ راستی تاڵە، بەڵام كە گوتت حەق ئاو رادەوەستێت.
❊ مامۆستای زانكۆ/ قوتابی دكتۆرا لە مێژووی هاوچەرخ و نوێ ، ئەندامی ئەنجوومەنی سەركردایەتیی پارێزگای هەولێر (پ.د.ك)
