خه‌بات: فاتیح بەرزنجی:-
لە دیمانەیەكی تایبەت بە رۆژنامەی خەبات ئەندازیار دانا عەبدولكەریم وەزیری ئاوەدانكردنەوەو نیشتەجیكردنی حكوومەتی هەرێمی كوردستان، كارو و پرۆژەكانی وەزارەتەكەی دەخاتەڕوو و باس لە پلانی ئاییندەیان دەكات بۆ زیاتر ئاوەدانكردنەوەی هەرێمی كوردستان و ئەو پرۆژانەی كە پێویستن لە ئێستادا ئەنجام بدرێن.
لە سەرەتای دیدارەكەیدا وەزیری ئاوەدانكردنەوەو نیشتەجێكردن گوتی: لەچواچێوەی كارو بەرنامەو پلانی چوار ساڵی داهاتووی وەزارەتی ئاوەدانكردنەوەو نیشتەجێكردن گرنگیدانە بە هەردوو كەرتی ئاوەدانكردنەوەو نیشتەجێكردن و بە تەواوكردنی ڕێگا جووت سایدەكانی نێوان شارەكانی كوردستان و ئەو ڕێگایانەی كە لەماوەی چوار ساڵی داهاتوودا و دوای تەرخانكردنی بودجەی پێویست دەبێ تەواو بكرێن، لەبەر ئەوەی ئەو ڕێگاوبانانە پەیوەندیان بە ژیان گوزەرانی هاووڵاتیانەوە هەیە لە ڕووی ئاسانكاری هاتوچۆ و لەپێناو سەلامەتی هاووڵاتیان و كەمبوونەوەی ڕووداوەكانی هاتوچۆ.
ئەندازیار دانا عەبدولكەریم گوتیشی: دیارە ڕێگاوبان شادەماری بازرگانی و گەشەسەندنی ئاڵوگۆڕی بازرگانی و ئابووری وڵات و بەستنەوەی هەرێمی كوردستانە بە وڵاتانی دراوسێ و وڵاتانی دیكە، بۆیە ئەولەویەتی كارەكان تەواوكردنی ڕێگاوبانەكانە بەتایبەتی ڕێگا جووت سایدەكان و تەواوكردنی ئەو پڕۆژانەی تەواو نەكراون. كاری دیكەی وەزارەتی ئاوەدانكردنەوە بریتییە لە پڕۆژەی ڕێگاوبانی نێوان شارە بچووكەكان و شارۆچكەو دێهاتەكان، لەپلانی ئەو چوار ساڵەی كارو بەرنامەكانمان دەبێت و ئەگەر بودجەی زیاترمان بۆ تەرخان بكرێت كارو پڕۆژەی زیاتر ئەنجام دەدەین.
دواتر دەربارەی پرسی كارو بەرنامەكانی دیكەی وەزارەتی ئاوەدانكردنەوەو نیشتەجێكردن ئەندازیار دانا عەبدولكەریم گوتی: كارو بەرنامەی داهاتووی وەزارەتی ئاوەدانكردنەوە بەجووت سایدكردنی ڕێگاوبانەكانە، دوای دەست بەكاربوونمان چەندین كۆبوونەوەمان لەگەڵ بەڕێوەبەرە گشتیەكان سازكردو داوامان لێ كردن كە بەپەلە دەرخستەیەك دەربارەی چاككردنەوەی ڕێگا سەرەكییەكان ئامادەبكەن، دوای ئامادەكردنی دەرخستەكان جێگەی سوپاس و پێزانینە كە بەڕێز مەسرور بارزانی سەرۆكی حكوومەتی هەرێمی كوردستان كاتێك داوام لێ كرد بودجەیەك تەرخان بكات بۆ نۆژەنكردنەوەی ڕێگاوبانەكان، بەڕێزیان بەسوپاسەوە داواكەی قەبوڵ كردو دەستكرا بە نۆژەنكردنەوەی ڕێگاوبانەكان و كاتمان بۆ تەواوكردنی پڕۆژەی نۆژەنكردنەوەی ڕێگاوبانەكان دانا و ماوەكەی 70 ڕۆژبوو، لە ئێستادا زیاتر 90%ی پڕۆژەی چاككردنەوەی ڕێگاوبانەكان تەواو بووەو تا ڕۆژی 15/12ی ئەمساڵ پێویستە كاری نۆژەنكردنەوەی هەموو ڕێگاوبانەكان تەواو بێت، لە هەمووی گرنگتر پڕۆژەی چاككردنەوەی ڕێگاوبانەكان بەكوالیتی بەرزو ئەندازەیی ئەنجام دەدرێت و لەكاتی دیاریكراوی خۆی تەواو دەكرێت، تا هاووڵاتیان سوود لەو ڕێگاوبانانە وەربگرن و دوور بن لە ڕووداوی هاتوچۆ.
وەزیری ئاوەدانكردنەوەو نیشتەجێكردنی حكوومەتی هەرێمی كوردستان گوتی: هەمیشە داوامان لە بەڕێوەبەرانی ڕێگاوبان و چاككردنەوەی ڕێگاوبانەكان كردووە كە پێویستە بەهەموو لایەك لە خزمەتی هاووڵاتیانی خۆماندابین و خەمخۆری ڕاستەقینەی هاووڵاتیان بین و دەرخستە بۆ كارو پڕۆژەكان ئامادەبكەن و هەمیشە لەخەمی چاككردنەوەی ڕێگاوبانەكاندابن، هەر ڕێگاوبانێك كە تێكچووبوو پێویستی بە چاككردنەوە هەبوو پێویستە بە زووترین كات دەرخستەی بۆ ئامادە بكەن بەتایبەتی ڕێگای گوندەكان تا خەڵكی گوندەكان بۆ هاموشۆكردن ئاستەنگیان بۆ دروست نەبێت، بۆیە دەبێ ڕێگاوبانی گوندەكانمان بەردەوام چاك بكرێتەوە، بۆ ئەو مەبەستە ساڵانە بودجەیەكمان تەرخانكردووە بۆ ڕێگاوبانی گوندەكان و لەگەڵ تەرخانكردنی ئەو بودجەیەی كەبۆمان دیاری دەكرێت و بەپێی ئەو دەرخستانەی كەئامادەكراون، ئێمە دەست دەكەین بەكاركردن لە پڕۆژەكان و ئومێدەوارین بۆ ساڵی داهاتوو دەست بكەین بە ئەنجامدانی ئەو پرۆژانە.
دواتر دەربارەی بەجووت سایدكردنی ڕێگاوبانەكان ئەندازیار دانا عەبدولكەریم وەزیری ئاوەدانكرنەوەو نیشتەجێكردن گوتی: هەركە بودجەمان بۆ تەرخانكرا ئێمە دەمودەست هەوڵی كاركردن دەدەین لە كارو پرۆژەكان وەك تەواوكردنی رێگای جووت سایدی هەولێر-كۆیە بە پێنج قۆناغەو لەهەوڵی ئەوە داین هەموو قۆناغەكانی كاركردن لەو پرۆژە گرنگە بەشێوەیەكی خێرا بكەوێتەوە كاركردن، هەرچەندە لە سێ قۆناغدا كاركردن دەستی پێ كردۆتەوە، بەڵام بەشێوەیەكی لەسەرخۆیەو ئەگەر بودجە بۆ پڕۆژەكان بەزوویی تەرخان بكرێت، ئەوا هەوڵدەدرێت خێرایی لەو پرۆژانە بكرێت و داوامان لەسەرۆكایەتی ئەنجوومەنی وەزیران كردووە، كەئەو پرۆژانەش بكەوێتە چوارچێوەی ئەو پڕۆژانەی كە بودجەی بۆ تەرخان دەكرێت بۆ ئەوەی بتوانین لەماوەی ئەو چوار ساڵەی كە باسمان لێوەكرد ئەو پڕۆژانەش تەواو بكرێن و هەوڵیش دەدەین هەموو ڕێگاوبانەكان بەجووت ساید بكەین و ڕێگاوبانەكانی دەروازە سنوورییەكانیش بەكوالیتیەكی بەرز چاك بكەینەوە، وەك پڕۆژەی دەروازەی پەروێزخان ئەویش دوای تەرخانكردنی بودجەی بۆ كراوەو پڕۆژەی تەواوكردنی رێگای حاجی ئۆمەران ئەویش لە ئایندەیەكی نزیكدا دەست بەكارەكانی دەكرێتەوە بۆ ئەوەی ئەو ڕێگاوبانە ستراتیژیانە بەردەوام بەشێوەیەكی ئەندازەیی چاك بكرێتەوە،پێویستە ساڵانە بودجەیەكی تایبەت هەبێت چاكسازی رێگاوبانەكان و چاككردنەوەیان بە شێوەیەكی ئەندازەیی بۆ ئەوەی ڕێگاوبانەكان زوو تێك نەچێت و لەبەر بەرژەوەندی گشتی وەك وەزارەتی ئاوەدانكردنەوە بڕیاردرا بە دووبارە داڕشتنەوەی هەمواركردنەوەی كێشی رێپێدراو بۆ ئوتومبیلە بارهەڵگرەكان واتا كێشی ئەكسلی ڕێ پێدراو تا چیتر بەهۆی ئەو ئوتومبێلە بارهەڵگرانە ڕێگاكان زوو تێك نەچن.
دواتر ئەندازیار دانا عەبدولكەریم وەزیری ئاوەدانكردنەوەو نیشتەجێكردن گوتی: لەچوارچێوەی كارو بەرنامەی وەزارەت پڕۆژەیەكی گرنگ و ستراتیژی وەك دروستكردنی هێڵی شەمەندەفەر هەیە، ئەو پڕۆژەیە زۆر گرنگە و بریتییە لە هێڵی ئاسنی و یەكێكە لەو پڕۆژە گرنگانەی وەزارەتی ئاوەدانكردنەوەو لە چوارچێوەی بەرنامەی پلانی چوار ساڵەی وەزارەتی ئاوەدانكردنەوەو نیشتەجێكردن و لە ئێستادا لەقۆناغی ئەوەداین، كە لەگەڵ كۆمپانیایەكی ڕاوێژكاری گرێبەست بكەین بۆ ئەوەی كە راوێژمان پێ بدات و توێژینەوەیەكی زانستیمان بۆ بكات لەسەر جەدوای ئابووری پڕۆژەكەو دوای تەواوكردنی توێژینەوە زانستیەكە ئێمە ئەو كاتە دەست دەكەین بەتەواو كردنی دیزایینی پڕۆژەكەو سپاردنی بە كۆمپانیایەك بۆ ئەوەی كارەكە تەواو بكات لەبەر ئەوەی ئەو پڕۆژەیە پرۆژەیەكی گرنگ و ستراتیژیەو بودجەیەكی زۆریشی پێویستەو لەوانەیە لە ئێستادا لە توانای دارایی حكومەتی هەرێمی كوردستاندا نەبێت، بۆیە پڕۆژەكە بەلامانەوە گرنگە كە بە شێوەی هاوكاریكردنی كەرتی گشتی و كەرتی تایبەت ئەو پرۆژەیە بكەوێتە واری جێبەجێكردنەوە ئەو كاتە پڕۆژەكە بەئاسانی ئەنجام دەدرێت ئەویش بەهاوكاری و هەماهەنگی حكوومەتی هەرێم و كەرتی تایبەت پشتیوان بەخوا تا ساڵی داهاتوو دوای تەواو كردنی جەدوای ئابوری پڕۆژەكە و ئامادەكاریەكان واژۆی پڕۆژەكە دەكرێت.
دواتر دەربارەی پڕۆژەكانی نیشتەجێ بوون ئەندازیار دانا عەدولكەریم وەزیری ئاوەدانكردنەوەو نیشتەجێكردن بۆ خەبات ڕوونیكردەوە: سەبارەت بەكارو بەرنامەكانی داهاتووی وەزارەتی ئاوەدانكردنەوە بۆ پرسی نیشتە جێ بوون لە چوارچێوەی پلانی ئەو چوار ساڵە كارمان لەسەر ئەو پرسە كردووەو كە نیشتەجێكردنەو كارمان لەسەر كردوەو پێشكەشی ئەنجوومەنی وەزیرانی هەرێمی كوردستانمان كردووەو بریتیە لەدوو قۆناغ و یەكێكیان بریتییە لە تەواوكردنی پڕۆژە وەستاوەكانەو ئەوی دیكەیش دروستكردنی پڕۆژەی تازەیەو ئێمە ئێستا نزیكەی 9 هەزاریەكەی نیشتە جێ بوونمان لەژێر جێبەجێ كردندایەو بەشێكیان وەستاوەو داواشمان لە سەرۆكایەتی ئەنجومەنی وەزیران كردووە بۆ تەرخانكردنەوەی بودجە بۆ ئەو پڕۆژانەی كە كاركردنی تیا وەستاوەو بڕیاریش وایە لەماوەی ئەو چوار ساڵەدا نزیكەی 3 هەزار یەكەی دیكەی تازەش دروست بكەین هەموو پڕۆژەكان دەگاتە نزیكەی 12 هەزار یەكەی نیشتە جێكردن بە پڕۆژە تەواو نەكراوەكان و پڕۆژەی تازە ئومێدەوارین لەماوەی ئەو چوار ساڵەدا ئەو 12 هەزار یەكەی نیشتە جێبوونانە تەواو بكرێن و سوودی بۆ هاووڵاتیان و فەرمانبەران هەبێت و هەوڵی ئەوە دەدەین كە ئەو پڕۆژانەی كە خزمەتگوزاریان ماوە تەواو بكرێت ئەوە یەكێكە لە كارەكانی لە پێشینەی ئێمەو چاوەڕوانی بودجە دەكەین بۆ تەواو كردنی پڕۆژەكەو مایەی خۆشحاڵیە كە قۆناغی یەكەمی ئەو پارەیەی كە تەرخانكراوەو دەست بەكارەكان كراوەو تیمەكانمان لەگەڵ ئەو بەڵێندەرانەی كە پڕۆژەكانیان لەلایەو دەستیان بەكاركردن كردۆتەوەو لەو قۆناغەدا نزیكەی 5 ملیار تەرخانكراوە بۆتەواو كردنی خزمەتگوزاری ئەو یەكە نیشتەجێ بووانە.
دەربارەی تەواو كردنی تونێلی هەولێر ژ پیرمام ئەندازیار دانا عەدولكەریم وەزیری ئاوەدانكردنەوەو نیشتەجێكردن بۆ خەبات ڕوونیكردەوە: مایەی خۆشحاڵییە كێشەی تەواو كردنی پڕۆژەی تونێلی هەولێر- پیرمام چارەسەر كراوە دوای داواكردنمان لە سەرۆكی حكوومەتی هەرێمی كوردستان بۆ ئەوەی كار لە پڕۆژەی تونێلی هەولێر ژ پیرمام بكەوێتەوە كاركردن و تەواو بكرێت ئەوەبوو بەڕێز مەسرور بارزانی سەرۆكی حكوومەتی هەرێم ڕەزامەندی دا نزیكەی 18 ملیۆن دۆلار تەرخان بكرێت بۆ تەواوكردنی ئەو تونێلەو ئومێدەوارین كە لە ساڵی داهاتووئەو تونێلە بە ڕووی هاووڵاتیاندا بكرێتەوە.
