خه‌بات: هاوار مورتكەیی:-
دوای ئەوەی ئەندازیار كەمال محەمەد ساڵح وەزیری كاەبا لەگەڵ پارێزگاری هەولێر كۆبۆوە و بریاردرا ماوەی مانگێك مۆڵەت بدرێتە ئەو كەسانەی گرفتی بەستنی پێوەر یا خود گرفتیان لە پێوەرەكان هەیە سەردانی بەرێوەبەرایەتی و فەرمانگەكانی كارەبا لە سنوری هەولێر بكەن بۆ چارەسەركردنی كێشەكانیان، لە كۆنفرانسێكی رۆژنامەوانیدا د. فرسەت سۆفی پارێزگاری هەولێر بەئامادەبوونی ئەندازیار حوسێن حەمەد قادر بەرێوەبەری گشتی دابەشكردنی كارەبای هەولێر و بەڕێوەبەری پۆلیسی هەولێر، هۆشداریی دایە ئەو كەسانەی زیادەڕۆییان كردووەتە سەر كارەبای نیشتمانی و مۆڵەتی یەك مانگی پێ دان.
فرسەت سۆفی گوتی: ئەوانەی زیادەڕۆییان كردووەتە سەر كارەبای نیشتمانی، یەك مانگیان لەبەردەستە بۆ ئەوەی بە ئیرادەی خۆیان ئەو زیادەڕۆییە لابەرن، بە پێچەوانەوە لە رۆژی 1ی كانوونی دووەمی 2020 كارەباكەیان دەبڕدرێت و رووبەڕووی دادگاییكردن و سزای دارایی توند دەكرێنەوە.
هەروەها پارێزگاری هەولێریش گوتیشی: هەموو لایەنە پەیوەندیدارەكان و خودی سەرۆكی حكوومەتی هەرێمی كوردستان، بە توندی پشتیوانی ئەو هەوڵەمان دەكات و وەزیری ناوخۆ و زێرەڤانی و پۆلیس و دامەزراوەكانی دیكەی حكوومەت، بە هاوبەشیی كاردەكەن بۆ سەرخستنی ئەو هەڵمەتە.
كۆبوونەوەیەكی نائاسایی
بەمەبەستی گرتنەبەری رێوشوێنی پێویست بەم بڕیار و هۆشدارییە، دوێنی بەڕێوەبەری گشتی كارەبای هەولێر سەرپەرشتی كۆبوونەوەیەكی فراوانی كرد كە بەڕێوەبەرانی دابەشكردن و فرۆشیاری وزە و بەشی یاساكانی سنوری پاریزگای هەولێر ئاماەبوون، كە تیایدا دوای گفتوگۆ و خستنەرووی ئاستەنگ و كێشەكانی لەكاتی جێبەجێكردنی ئەو هەڵمەتە دێنە پێشەوە، چەند رێنمایی و بڕیارێكیان دەركرد.
گرتنەبەری رێوشوێنی پێویست
ئەندازیار حوسێن حەمەد قادر بەتێروتەسەلی باسی لە گرنگیی ئەو بڕیارە كرد و گوتی: یەكێك لەهۆكارەكانی كەمیی كارەبا و پچڕ پچڕی دابەشكردنی كارەبا، ئەو سەرپێچیانەیە كە لەسەر تۆڕەكانی كارەبادا هەیە، دیارە یەكێك لە كارە پێشینەكانی حكومەتی هەرێمی كوردستانیش باشتركردنی دۆخی كارەبایە، هەربۆیەشە لەم سۆنگەوە ئەو بڕیار و هۆشدارییە درا كە لەماوەی مانگێكدا دەرفەت بە سەرپێچیكاران دراوە بۆ ئەوەی لەماوەی ئەو مانگەدا سەردانی فرۆشیاری وزە و فەرمانگەكانی كارەبا لە سنوورەكانی خۆیان بكەن، بەمەبەستی لادانی سەرپێچییەكە و هەروەها گرتنەبەری رێوشوێنی پیویست لەپەراویزی ئەو بڕیارەوە، چونكە هەر هاوڵاتییەك دوای ئەو بڕیارە داوای كارەبا بكات، پیی نادرێت و خۆی بەرپرسیار دەبێت.
دەرفەتیكی باش رەخساوە
بەڕێوەبەری گشتی كارەبای هەولێر زیات دەڵێت: ئەگەر سەرپێچیكارانی كارەبا لەماوەی ئەو مانگەدا سەردانمان بكەن، ئەوا رووبەڕووی سزا نابنەوە، ئەویش سەرپێچییەكان بریتین لە: بەبێ پێوەر كارەبای راكێشابێت، لەژێر پێوەر كارەبای راكێشابێت، دەستكاری پێوەری كردبێت، جامی پێوەری شكابێت، پێوەری كارەبای لێكرابێتەوە، لەسەر ئەوانە پیویستە پاكانەی قەرزەكانیان بكەنەوە بەڵام سزا نادرێت، هەروەها ئەو خانوو و پیكهاتانەی كە بەبێ مۆڵەت دروست كراون و سەرپیچیان كردووە، لەماوەی ئەم مانگەدا سەردانی فەرمانگاكانی كارەبا بكەن، بەفەرمی هاوبەشیان بۆ دەكرێتەوە و پێوەریان بۆ دەبەستریت، لە رێگەی پركردنەوەی بەڵێننامە و دەستەبەری دارایی كفیل، ئێمەش بۆ ئەوە ئەم كۆبوونەوەیەمان ئەنجامدا تا تەواو ئامادەبین بۆ ئەوەی لە ئەمڕۆوە لە ئامادەباشیدا بین بۆ رایی كردنی مامەلەی سەرپێچیكارانی كارەبا كە سەردانمان دەكەن.
هەڵمەتێكی گەورە دەست پێدەكەین
دواتر ئەندازیار حوسێن حەمەد قادر بەڕێوەبەری گشتی كارەبای هەولێر سەبارەت بە دوای تەواوبوونی ئەو وادەیەی بۆ سەرپێچیكاران داندراوە گوتی: ئەم بڕیارەی وەزراەتی كارەبا و پارێزگای هەولێر دەرفەتێكی باشە بۆ ئەو هاوڵاتیانەی سەرپێچیان كردووە، بەبێ سزادانیان، سەردانی شوێنی پێویست بكەن بۆ ئەوەی سەرپێچییەكانیان هەڵگیرێت، وە چەندی زووتر سەرپێچیكاران سەردانی بكەن بۆ ئەوان باشترە بۆ ئەوەی لەماوەی ئەو مانگەدا رێوشوێنەكەیان بۆ تەواو بكریت، هەروەها گوتی: ئێمە لەدوای تەواوبوونی ئەو وادەیە، لە 2ی كانوونی دووەم كە ئێستا میكانیزم و رێوشوێنی تایبەت دەگرینە بەر بۆ ئەوەی هەڵمەتیكی فراوان بۆ بڕینی سەرپێچی و سزادانای سەرپێچیكاران ئەنجام بدەین، بۆ ئەم هەڵمەتەش هەماهەنگی لەنیوان وەزارەتی ناوخۆ و وەزارەتی كارەبا و زێرەڤانی و پۆلیس لە ئارادایە بۆ ئەوەی هەڵمەتەكە بەسەركەوتوویی بەڕێوەبچێت.
