كاروان محەمەد سینو
شاراوەنییە كە پاش رووداوەكانی 16ی ئۆكتۆبەری 2017، كیانی سیاسی هەرێمی كوردستان وەكو هەرێمێكی عێراقی فیدڕاڵ، دووچاری گەمارۆری سیاسی و ئابووری و دیپلۆماسی بووەوە لەلایەن وڵاتانی دراوسێ و هەندێك وڵاتی دیكە و كوردستان لە رووی دیپڵوماسییەوە دووچاری گۆشەگیری كرابوو.
لەبیرمانە كە ئەوكات نێچرڤان بارزانی سەرۆك وەزیرانی هەرێمی كوردستان بوو، بە هەماهەنگی وڵاتی فڕەنسا و خودی بەرێز ئیمانۆیل ماكرۆن، لە 1ی كانووی دووم 2017، نێچیرڤان بارزانی تۆقی گەمارۆی سیاسی و دیپلۆماسی شكاند و لە وڵاتی فڕەنساوە هەرێمی كوردستان دەرگای دیپڵوماسییەتی كردەوە، لەگەڵ ئەوەشدا هەرێمی كوردستان وەكو كیانێكی سیاسی لە عێراقی فیدڕاڵدا لەلایەن وڵاتانی دراوسێیەوە لە ئاستێكی دیاركراودا هامشۆی لەگەڵدا دەكرا.
ئینجا دوابەدوای پێكهاتنی حكوومەتی هەرێمی كوردستان كابینەیە نۆیەم لە 10ی تەموزی 2019 بە سەرۆكایەتی مەسرور بارزانی، ئەركەكانی مەسرور بارزانی قورس و هەمەلایەن بوون، لەبەر ئەوەی بارودۆخی سیاسی ناوخۆ و دەرەكی و دیپلۆماسی و ئابووری و بژێوی ژیانی خەڵك ناهەموار و نالەبار بوو. بەڵام هەر لە دەستپێكی دەستبەكاربوونی، مەسرور بارزانی لە 7 تەوەری زۆرگرنگدا كارنامەی حكوومەتی هەرێمی كوردستانی داڕشت لە سەر ئاستی
1- چاكسازی، 2- خزمەتگوزارییەكان، 3- پەیوەندیی نێوان حكومەتی هەرێمی كوردستان و حكومەتی عێراقی فیدراڵ، 4- ئازادی و دیموكراسی و پێكەوە ژیان، 5- پەیوەندییەكانی هەرێم لە سەر ئاستی هەرێمی و نێودەوڵەتی، 6- ئابووری و دارایی، 7- بواری كارگێری.
پاش 140 رۆژ لە دەستبەكاربوونی مەسرور بارزانی وەكو سەرۆكی ئەنجوومەنی وەزیرانی كوردستان، ئەمڕۆ دەبین كە مەسرور بارزانی لە هەر حەوت تەوەری كارنامەی حكوومەتی كوردستاندا هەنگاوی بەرچاوی ناوە و لە هەر تەوەرێكدا قۆناغی ئامادەكاری و دەستپێكردنی بڕیوە و ئێستاكە لە قۆناغی جێبەجێ كردندایە.
یەكێك لەو حەوت تەوەرە گرنگانەی كارنامەی حكوومەتی هەرێمی كوردستان كابینەیە نۆیەم، بریتییە لە پەرەپێدانی پەیوەندییەكانی هەرێمی كوردستان لە سەر ئاستی هەرێمی و نێودەوڵەتیدا لە رووی جەختكردن لەسەر پەیوەندییەكی باش لەگەل وڵاتانی دراوسێ، بە جۆرێك كە ڕەچاوی بەرژەوەندیی هاوبەشەی دوولانە بكرێ و ڕێز لە بوون و كیانی دوولایەن بگیرێ و پەرە بە ئاستی پەیوەندییەكان بدرێ لە گشت بوارەكاندا. هەروەها حكوومەتی مەسرور بارزانی لە كارنامەی خۆیدا ئەوەی خستۆتەروو، كەپشتگیری لە چارەسەریی ئاشتیانەی گشت كێشەكانی ناوچەكە دەكات و پێگەی هەرێمی كوردستان بە ئاراستەیەك بەكار دەهێنێت، كە بەشێك بێت لە ڕەوتی چارەسەری گرفت و ئاڵوزییەكان. بەم شێوەیە ئەمڕۆ دەبینین كە سەردانی مەسرور بارزانی بۆ توركیا، هەنگاوی یەكەمە لە جێبەجێ كردنی تەوەرێكی دیكەی كارنامەی حكوومەتی هەرێمی كوردستان كابینەی نۆیەم، هەروەك مەسرور بارزانی بەڵێنی دابوو.
بەداخەوە.. جێگای گومانە كە هەندێك میدیا و لایەن و كەسی كاڵفام و نابەلەد، بۆ چەواشەكردنی رایگشتی خەڵكی كوردستان، سەردانی مەسرور بارزانی بۆ توركیا دوور لەراستی و بەپێی مەزندەی نەخۆشی خۆیان وێنا دەكەن. لەكاتێكدا سەردانی مەسرور بارزانی لەو پەڕی خەمخۆری و بەرپرسێتی بووە بەرامبەر دۆزی گەلی كورد بەگشتی و ئامانجەكانی هەرێمی كوردستان. بێگومان بەپێی لێدوانەكانی مەسرور بارزانی لە ئەنقەرە، كەباس لە پەیوەندی و كێشە و مژار و رۆژەڤی كوردستان و توركیا كراوە لە رووی: مێژوویی و ستراتیژی و گۆڕانكارییەكانی ناوچەكە و ئاشتی و سەقامگیریی لە بەرژەوەندیی خەڵكی ناوچەكە و پەرەپێدانی پەیوەندییەكانی دیپلۆماسی و بازرگانی و گفتوگۆی نێوان كوردستان و عێراق و بەرەنگار بوونەوەی هەرجۆرە تیرۆرێك و هاوكاری لە دۆزینەوەی چارەسەر بۆ كێشەكان و هەماهەنگی توركیا لەگەڵ نەتەوەیەكگرتووەكان بۆ گەڕاندنەوەی ئارەزوومەندانەی ئاوارەكان بەپێی خواستی خۆیان دوورلە زۆرەملێ و …هتد. هەڵبەت ئەمانە هەموو ئەمانە رەفتاری بەرپرسانەن لە چوارچێوەی كیانی سیاسی كوردستان كە دانپێنراوە لە سەر ئاستی نێودەوڵەتی و ئەقلیمی و خودی عێراقی فیدڕاڵ. بۆیە جێگای گومانە كە هەندێك میدیا و لایەن و كەسی كاڵفام و نابەلەد ، رایگشتی خەڵكی كوردستان چەواشەدەكەن؟!!.
هەموومان دەزانین بەپێی یاسا و دەستوور و عورفی نێودەوڵەتی، هەرێمی كوردستان وەك هەرێمێكی دانپێنراوی نێو دەستووری عێراق، هەروەك چۆن مافی هەیە، لەبەرامبەریشدا ئەرك و بەرپرسێتی دەبێت لە چوارچێوەی دەوڵەتی عێراقی فیدڕاڵ و وڵاتانی دراوسێی خۆی. هەرێمی كوردستان كە سنوورێكی دوور و درێژی هەیە لەگەڵ وڵاتی توركیا هەروەها ئیران و تاڕادەیەك سوریا، هەڵبەت وەكو كیانێكی سیاسی و بەپێی یاسا و عورفی نێودەوڵەتی پێویستە ئەرك و بەرپرسیارەتی خۆی لە رووی دیپلۆماسی و پەیوەندییەكانی دراوسێیەتی بەجێبگەیێنێت، ئەگینا وەكو كیانێكی سیاسی زیندوو بوونی نابێت.
بۆیە چوونی مەسروور بارزانی بۆ توركیا و هەوڵی پەرەپێدانی پەیوەندییەكان و تاوتۆكردنی مژار و رۆژەڤی ئەمڕۆی دەڤەرەكە و هەوڵی چارەسەر كردنی ئاشتیانەی كێشە و گرفتەكانی نێوان توركیا و كورد، هەڵوێستێكی حەكیمانەیە بۆ گەڕاندوەی روحی زیندوبوونەوە بەبەر كیانی هەرێمی كوردستان كەپاش رووداوەكانی 16ی ئۆكتۆبەر دووچاری ئابلووقە و بەستەڵەك ببوو، هەروەها هەوڵێكی دیكەی ئاشتیانەی حكوومەتی هەرێمی كوردستانە بۆ چارەسەركردنی كێشەكانی نێوان گەلی كورد و توركیا.
