سەربەست بامەڕنی
یەكێك لە پێناسەكانی سەروەریی ئەوەیە: دەوڵەت دەسەڵاتی باڵا بێت، ئەوەی دەسەڵاتی تەواوی بەسەر هەرێمی خۆیدا هەیەو هیچ لایەنێكیش بەشداریی لە مافەكانی سەروەریی ناكات، لە دیاریكردن و رێكخستنی پەیوەندییەكانی لەگەڵ چواردەوری دەرەوەیدا.
ئەگەر بگەڕێینەوە سەر رەوشی ئێستای عێراق، كە پاڵی بە ملیۆنەها عێراقییەوە ناوە، لەدژی بوونی ئێران و لەپێناوی ئازادی و ژیانێكی خۆش راپەڕن، هەر قسەكردنێك لەسەر سەروەریی راستەقینەو تەواو بۆ دەوڵەتی عێراق و سیستمی سیاسیی، قسەی پڕوپووچەو هیچی تر نا، چونكە زۆرینەی پارتەكانی سیاسیی دەسەڵاتدار، لەوەتەی رژێمی دیكتاتۆری كەوتووە و میلیشیاكانی سەر بەوان، لە جغزی ئەو سنوورە دەخوولێنەوە، كە لەلایەن ئێرانی دراوسێیان كێشراوە، هەتا ئەگەر شتەكە بە دامەزراندنی فەرمانبەرێكی سادەش لە فەرمانگەیەكەوە پەیوەست بێت، گرەوكردن لەسەر ئابووری عێراق، پەیوەندییەكانی دەرەكی، رەوشی دارایی، مەسەلەكانی نەشونما، گەشەپێدان و ژێرخانی بنەڕەتیش بە هەموو لایەنەكانی، لەو سنوورە ناچنە دەرەوە، هەر لەبەر خودی ئەو هۆیەش، شەقامی عێراق راپەڕی و هەژموونی بیانی رەت كردەوە، بۆیە پێشتر و ئێستاش دیارترین دروشمەكانی راپەڕین ئەوەیە (بەغدا ئازادە ئازادە. ئێران بۆ دەرەوە بۆ دەرەوە)، لەكەس نهێنی نییە، شەقامی عێراق بە تەوسەوە دەڵێت، سەرۆك كۆماری راستەقینەی عێراق، بەڕێز جەنەراڵ قاسم سلێمانییە، سەرۆكی حكومەتیش، جەنابی باڵیۆزی ئێران، ئیریج مەسجدییە.
لەوەی سەرەوە بۆمان دەردەكەوێت، لە باشترین رەوشدا، سەروەریی عێراق، بەلایەنی كەمەوە، سەروەرییەكی نەقوستانە، نەوەكو تەواو بێت، ئەو راستییەش، هاووڵاتی عێراقی راپەڕیو و هەموو بایەخدەران بە كاروباری عێراق دەیزانن، لەگەڵ ئەوەشدا، ژمارەیەك لە ستەمكارانی رەگەزپەرستی شكستخواردوو و دەست بەخوێن سووری ئاڵی كوردستانیان (پاڵەوانی خورماتوو بە نموونە)، سەردانەكەی بەڕێز، مایك پێنس، جێگری سەرۆكی ئەمریكایان بۆ هەرێمی كوردستان و كۆبوونەوەی لەگەڵ نێچیرڤان بارزانی، سەرۆكی هەرێمی كوردستان و بەڕێز، مەسرور بارزانی، سەرۆكی حكومەتی هەرێمیان قۆستەوە، كە بە بەغدا دا رەتنەبوو و چاویشی بە هیچ بەرپرسێكی ئەوێ نەكەوت (بەهۆی بارودۆخی ئاسایش، وەكو لایەنی ئەمریكی رایگەیاند)، بۆ ئەوەی رای گشتی عێراق، لەدژی گەلی كوردستان و حكومەتەكەی هان بدەن، لە میانی زیادكردنی سووك و لێدوانی منداڵەكارەدا، كە كەمترین لایەنی ئەقڵانییەت و بابەتیانەی تێدا نییەو، سەردانەكەی جێگری سەرۆكی ئەمریكاش، سووكایەتیكردنە بە سەروەریی عێراق!، وەكو ئەوەی هەولێری پایتەخت، شارێكی عێراقی نەبێت، گەلی كوردستان، دووەم نەتەوەی سەرەكیی لە وڵات نەبێت و هەرێمیش بەشێك لە دەستووری عێراقی فیدراڵ نەبێت، رۆڵی بەرچاوی كوردستانیان لە بەرگریكردن لە عێراق، لەدژی تیرۆری جیهانی لەبیركردووە و نكۆڵیش لەو ئاسایش، ئاشتی و سەقامگیرییە دەكەن، كە لە هەولێری پایتەختدا هەیە، لەو كاتەی ئەوان، لەبەر تووڕەیی گەلی عێراق، لەوە دەترسن لە ماڵەكانی خۆشیان بخەون.
عێراق، كە بەو تاقمە رەگەزپەرست و تایەفییە دواكەوتووە، تووشی بەڵا بووە، بەهۆی پاشكۆیەتی تەواویشی، لەمێژە سەروەریی خۆی لەدەستداوەو كەمترین تواناشی نییە، بڕیارێكی گونجاو لە هەموو لایەنەكانی سیاسی، ئابووری و هەتا كۆمەڵایەتیش دەربكات، بە دڵنیاییەوە كارگێڕی ئەمریكا و بەڕێز جێگری سەرۆكی ئەمریكاش، راستییەكانی سەرەوە بە هەموو وردەكارییەكان دەزانن و هیچ ئاسایشێك لە بەغدا نابین، وەكو لایەنی ئەمریكی باسی كردووە. سەردانەكەی جێگری سەرۆكی ئەمریكا بۆ هەرێمی كوردستان، زیاتر لە پەیامێكی بۆ لایەنە پەیوەندارەكان بە رەوشی عێراق، كوردستان بەشێوەیەكی تایبەتی، بارودۆخی ناوچەكە بە گشتی و ئەوانەی شتەكەیان بەلاوە گرنگە هەڵگرتبوو، بۆ ئەوەی بەباشی، چاو بەلێكدانەوەكانی خۆیان بخشێننەوە، لە جیاتی ئەوەی خنخنۆكی رووداوەكان با بدەن، ساختەی بكەن و لە بابەتی سەروەریی بیئاخنن، كە هەر لە بنەڕەتەوە نقوستانە، یان داوای بانگكردنی باڵیۆزی ئەمریكا و ئەو شتە قۆڕانە بكەن، ئەگەر ئەوان بەڕاستی بایەخ بە سەروەریی عێراق دەدەن، دەبێت بەدەنگی داواكارییە رەواكانی شەقامی عێراقییەوە بچن، بۆ ئەوەی ئەو سەروەرییە بەدی بێت، بەر لەوەی شەپۆڵەكە لەگەڵ خۆی راپێچیان بكات.
و: رەمزی میرەكانی
