خەبات: هاوار مورتكەیی:-
ئەمڕۆ كێشەی كارەبا یەكێكە لەكێشە هەرە دیارەكانی هەرێمی كوردستان و ماوەیەكی زۆرە هاوڵاتیان بەدەست ئەم كێشەوە دەناڵێنن، ئێستاش لەگەڵ نزیك بوونەوەی زستان و وەرزی سەرماو سۆڵ، كێشەكە زیاتر رەق بۆتەوە و زۆر لەوەی چاوەڕوان دەكرا كارەبا كەم بۆتەوە بەشێوەیەك كە ماوەی پێدانی كارەبای موەلیدە ئەهلیەكان لەكارەبای نیشتمانی زیاتر بووە، بۆ ئەم مەبەستەش دوێنێ لە پارێزگای هەولێر كۆبوونەوەیەكی فراون بەڕێوەچوو، كە تیایدا چەندین بڕیار و رێنمایی لەم بوارەوە درا.
كۆبوونەوەیەكی بەپەلە
ئەو بارودۆخە خراپەی ئەمڕۆی كارەبا وای لە لایەنە پەیوەنداەركان كرد كە لە رۆژی پشوودا لەهەوڵی چارەسەر و كەمكردنەوەی كێشەكەدا بن، ئەوەبوو دوێنی د. فرسەت سۆفی پارێزگاری هەولێر بە ئامادەبوونی هەردوو جێگری پارێزگار و قایمقامی ناوەندی هەولێر و سەرۆكی شارەوانی و بەڕێوەبەری گشتی كارەبای هەولێر و هەروەها بەڕێوەبەرانی كارەبای سۆران و شەقلاوە و مەسیف و بەڕێوەبەری گشتی گواستنەوەی كارەبا، لە دیوانی پارێزگا سەرپەرشتی كۆبوونەوەیەكی فراوانی دەربارەی سێكتەری كارەبا لە هەولێر كرد.
پێویستە دۆخەكە باشتر بكرێت
لەدەستپیكی ئەو كۆبوونەوە فراوانەدا پارێزگاری هەولێر ئاماژەی بە كێشەی كارەبا كرد كە ناكرێت بەوشێوەیە بەردەوام بێت و داوایكرد كە چی پیویستە لەم كاتەدا بۆ كارەبا بكرێت بۆ ئەوەی مەینەتی هاوڵاتیان لەمبارەیەوە كەمتر بكرێتەوە، لەنێو 10 تەلەفۆن كە لەلایەن هاوڵاتیانەوە بۆم دیت، 5 تەلەفۆنیان تایبەتە بەكێشەی كارەباوە، واتە كێشەكە تەواو هاوڵاتیانی بێزاركردووە، بۆ ئەم مەبەستەش پارێزگاری هەولێر داوای كرد كە دیراسەیەكی دۆخەكە بكریت، بەتایبەتیش كە حكومەتی هەرێم بودجەیەكی گونجاوی بۆ سێكتەری كارەبا بەگشتی و بۆ هەلێر بەتایبەتی دابین كردووە، بۆیە پێویستە كێشە لەپێشینەكان و ئەو پرۆژانەی كەماون تەواونەكراون هەوڵ بدرێت سوود لەم بودجەیە وەرگیرێت و دۆخەكە باشتر بكرێت و ئەو بودجەیەش دەتوانین لەمڕۆوە خەرجی بكەین.
نەبوونی توانای دارایی
دواتر ئەندازیار حوسێن حەمەد قادر بەڕێوەبەری گشتی كارەبای هەولێر بەدرێژی باسی لەكێشەكان كرد و گوتی: ئەو كێشانەی كە ئەمڕۆكە لەئارادان، كێشەكەلەبووەكانی چەند ساڵ پێش ئێستایە، چونكە ئەو توانایە نەخراوەتە بەردەستمان بۆ ئەوەی چارەسەریان بكەین، دەبینین پپرۆژەبەردەوامەكان زۆری لەهەولێرن بەوپێیەی پایتەختی هەرێمی كوردستانە، بەڵام بەو پێوەرە مامەلە لەگەڵ هەولێر نەكراوە، ئەگەر بەنموونە باس بكەین، ئێمە 7وێستگەی 132 كەی ڤیمان هەیە، لەساڵی 2003ەوە ئێمەدەبوایە 7 وێستگەی دیكەمان هەبوایە، ئێستا ئێمە باری 14 وێستگە بە 7 وێستگە رادەپەڕینین و دابەشی دەكەین، دەبێ لەمەدا چی رووبدات، بێگومان كێشە لەسەر كێشە دێنە پێشەوە.
كڕینی محەویلە
هەروەها بەڕێوەبەری گشتی كارەبای هەولێر زیاتر گوتی: ئەوەی گرنگە لەم كاتەدا ئەو پارەیە بەخێرایی سەرف بكرێت بۆ ئەوەی بتوانین ژمارەیەك محەویلە بكڕین، چونكە كە محەویلەی گەڕەكێك دەسووتێ، ئەو هاوڵاتیانەی لەسەر ئەو محەویلەیەن بێ كارەبا دەبن تا ئەوكاتەی محەویلەكەیان بۆ چاك دەكرێتەوە، بەڵام ئەگەر محەویلەی یەدەگمان لەبەر دەست بێت ئەوا دەمودەست دەتوانین ئەو محەویلە یەدەگە لەشوێنی محەویلە سووتاوەكە دابنرێتەوە، هەروەها ئەو پرۆژانەی كەماون و بەنیوەچلی بەجێهێلراون پێویستە دەستیان پێبكرێتەوە و تەواو بكرێت، هەورەها كەموكوڕیمان لە فەرمانبەر هەیە و تا ئیستا داوامان كردووە ژمارەیەكیان بەگرێبەست بۆمان دابین بكەن بۆ ئەوەی وێستگەكان كە دادەمەزرێن لەسەر ی كاربكەن.
راپەراندنی كارەكان بەخێرایی
د. فرسەت سۆفی پاریزگاری هەولێر داوای لە بەڕێوەبەرانی كارەبا كرد كە ئەوەی زۆر پێویستە لەم كاتەدا كاری بۆ بكرێت، دەرخستەی بۆ بكرێت یان ئەوانەی دەرخستەیان بۆ كراوە بیگەیەننە دەستی و تا بەزووترین كات لەگەڵ ئەنجوومەنی وەزیران و وەزارەتی دارایی كاری لەسەر بكەن و پارەی پێویستیان بۆ سەرف بكریت، ئێمە كە ئێستا بودجەیەكمان بۆ تەرخان كراوە پێویستە پرۆژە لەپێشینەكان و ئەوانەی لەتوانای ئەو بودجەیەدا هەیە كاری لەسەربكەین و جێبەجییان بكەین.
دابینكردنی موەلیدەی بێدەنگ
تەوەرێكی دیكەی ئەو كۆبوونەوەیە پەیوەست بوو بە موەلیدە ئەهلییەكانەوە دیارە ئەویش كێشەی هەیە و هاوڵاتیان گلەییان لەسەری هەیە، بەتایبەتیش كە چەند موەلیدەیەك زۆرنزیكن لەناوماڵانەوە و دەنگەكەی هەراسانی كردووە، لەمبارەیەوە تاهیرعەبدوڵلا جێگری پێشووی پارێزگاری هەولێر رایگەیاند كە دان بەو راستییەدا دەنێین كە موەلیدە ئەمڕۆكە بۆتە ئەمری واقیع و لەم كاتەشدا ناتوانین دەستبەرداری بین، بەڵام دەتوانین كوالیتیان بەرزبكەینەوە و هەوڵ بدرێت موەلیدەی بێدەنگ كاتم لەئایندەدا بەكاربهێنرێت.
