سەربەست خالد كۆچەر
قوتابی دەولەمەندترین چینا جڤاك و دەولەتێ یە. هەڤدەم د هشیاری و پێشكەفتن و دەستڤەئینانا ئایندەكێ سەركەفتی دا، قوتابی پێشرەو پێشەنگێ هەمی بزاڤەكێ یە. ئەو وەڵاتێن بەرەڤ پێش و پێشكەفتی هێزا خوە ل سەر بیر و زانستێ قوتابی بنیات دانایە، قوتابی رۆلەكێ دیار هەیە د تێكۆشین و شورەشێن گەلان دا و كاریگەری ل سەر وان نەتەوە و جڤاكێن پێشكەفتی هەیە، یێن ئەڤرۆ د گوپیتكا ب هێزبوونێ دا.
مرۆڤایەتی ئەڤرۆ ل سەر بنیاتێ نەتەوایەتیێ دابەش بوویە د سەر چەند دەولەتا دا ل دویڤ بریارا نەتەوەیێت ئێكگرتی، هەر مللەتەكێ مەرجێت نەتەوایەتی هەبت ئەو ماف هەیە بریارا چارەنڤێسێ خوە ئەو بخوە بدەت، نەخاسمە ئەگەر ببتە دەولەت.
ب درێژایا دیرۆكێ كێشا رەوایا كوردان ل هەر چوار پارچێن كوردستانێ بوویە مەترسی ل سەر دوژمنان. ژبۆ چارەسەركرنا ڤێ كێشێ چ رژێمەك نەشیاییە رێكە چارەیەكا دروست بینت، بتنێ زمانێ چەكی ب كارهاتیە ل دژی مافێن گەلێ مە. ب هەموو شێواز و ئامرازان دوژمنی خوە نەدایە پاش ژ گوهۆرینا پێكهاتا (نەتەوە، كەلتور، جڤاكی و جوگرافیا دەڤەرێ). هەلبەت تشتەكێ ئاشكەرایە كو هەردەم سیاسەتا رژێمێن گوربەگور ئەو بوویە بۆ نەهێلانا گەلێ مە.
ژبەرهندێ ب وی گیانێ ئێكگرتن و بەرخودانێ كاربكەین ژبۆ پەرەپێدان و چاندنا هزرا (نەتەوەی و نیشتمانی) د شیان و بیردانكا قوتابی دا، كو ئەركێ سەرەكیێ هەر سازیەكێ یە. چونكی ب هێزكرن و بنیاتدانانا بنچینەیی بیردانكا بیروباوەرێن نەتەوەیی، نیشتمانیی و فەرهەنگا كەلتۆرێ وەلات پارێزیێ، ئاسۆیەكێ پرشنگدار و گەشە بۆ گەل و وەلاتی.
ئێكەم پێنگاڤا پێشڤەبرنا بەرپرساتیا مەزنا هزرا (نیشتمان پەروەریی، نەتەوە پەرستی و دەستنیشانكرنا خالێن ژیانێ). ئەركێ رەوشەنبیرانە، پرۆسەكا گرنگە تایبەت د رێیا دیمۆكراسیەتێ دا، داكو وەڵاتەك ساخلەم ل سەر بنەمایەك موكوم بهێتە ئاڤاكرن ئەڤە ژی دچیتە د خانەیا نیشتمان پەروەریێ دا.
ئەرك و رۆلێ هەری مەزن، ئەڤرۆ ژبۆ قوتابیان ڤەدگەریت د بەرەڤانیكرن و بەردەوامی دان ب رەسەناتیا نەتەوەبوون و خەباتا بێ راوەستیانا بزاڤا رزگاریخوازیا گەلێ مە، كو باشترین گولەیە ژبۆ دوژمنان. داكو شەرمزار نەبین بەرامبەر مللەت و دیرۆكا خوە چونكی مێژوویێ دوو دەرگەه هەنە:
دەرگەهێ سەرفەرازیێ و دەرگەهێ روورەشیێ و زبلدانێ.
پاراستنا دەستكەفتان و دەستنیشانكرنا رۆژێن سەخت و بریقەدار یێن شۆرەشێن گەلێ مە یێن ئێك ل دووڤ ئێك، ئەرك و هەلسەنگاندنەكا دیرۆكی یە، ژبۆ هشیاركرنا نڤشێ نوو، و لڤاندنا هەستا نەتەوەیی و تەناكرنا وژدانا مرۆڤی.
پێدڤیە ئاماژێ پێ بكەم كو قوتابی هێڤێنێ هەبوونا هەر مللەتەكێ یە، لەورا فەرە نەخشە و پلانێن زانستی و ئەكادیمی بێنە دارشتن و ئامادەكرن. هەمی شیان بێنە تەرخانكرن ژبۆ بلندكرن و ب هێزكرنا ژێرخانا ئاستێ رەوشەنبیریا (نیشتمان ، نەتەوە ، زمان ، ئالا ، كەلتۆر و بیروباوەرێن كوردینیێ) ل دەڤ قوتابی. كو دیرۆكێ ئەو یەك سەلماندییە، سیاسەتا توندوتیژی و قركرن دژی كوردان بێ مفایە، داگیركەر نەشێن گیانێ بەرخودانێ ل دەڤ مللەتێ مە بمرینن.
ل ڤێرێ دشێم بێژم ب ئەمانەت وەكو قوتابیەك چەند خالان دانمە سەر چەند پەیڤان ژبۆ دیرۆكێ (دوهی، ئەڤرۆ، ئایندەی) كو ژبیرنەكەین قوتابیان تنێ ئێكگرتن، ئێكرێزیامە سمبۆلە ژ بۆ پاراستنا دەستكەفتێن ئەڤرۆ و شەرمزاركرنا دوژمنان ل هەر پارچەكێ. كو رۆژا گەشا ئازادی و سەربەستیێ ل ئا سمانێ وەڵاتێ مە دێ هەلدەت، گری و هەوار و ئیرادا دایكێن شەهیدا و خورتێن چەلەنگێن وەلاتی، دێ بنە سرودێن نیشتمانی و سترانێن شادیا رزگاربوونێ. بژیت یەكگرتنا كوردان.
