خه‌بات: ساسان دەروێش- هۆڵەندا:-
كۆمەڵەی كوردی موردایك لە شارۆچكەی زەیڤن بێرغن لە هۆڵەندا ، ساڵانە چەندین چالاكی هەمەچەشنە ئەڕەخسێنێ لە بواری جۆرا و جۆردا وەك ئامادەكردنی سیمینار بۆ قۆناغەكانی مناڵ لەلایەن كەسانی پسپۆڕەوە لەبواری تەندروستی وكێشە كۆمەڵایەتییەكان وهۆشیاركردنەوەی باری ڕۆشنبیری بەئامادەكردنی كۆڕی ئەدەبی و كردنەوەی پێشانگای هونەری وەك شێوەكاری و سیرامك و پەیكەرسازی ، ئەوەی جێگایی باسە لە چالاكییەكانی ئەم كۆمەڵەییە هەوڵدانە بۆ گرێدانی هونەرمەندان و ڕۆشنبیرانی هۆڵەندی و كوردی پێكەوە كاربكەن وقوڵتر لەیەك بگەن و كاری یەكترببینن و بەشداری چالاكییەكانی ئەم كۆمەڵەییە ببن ، وێڕای كۆمەك و هاوكاری كۆكردنەوە بۆ ئاوارەكانی نێو باشووری كوردستان لە پێداویستی جلوبەرگ ، لەسەر و ئەمانەش خەمی نیشتیمان و هاواری گەل ڕەنگدانەوەی هەیە لە نێو چالاكییەكانیدا بەتایبەتی ڕووداوەكانی ئەم دواییەیی ڕۆژئاوایی كوردستان.
گەڵاكانی پاییز لە سیهەمین پێشانگای شێوەكاری ڕەنگەكانی هونەرمەندانی تێكەڵكرد
لە نێو وەرزی چالاكییەكانی كۆمەڵەكەدا، بەئامادەبوونی بەشێكی بەرچاو لە كەسایەتی هۆڵەندی و كورد، لەژێر ناوی گەڵاكانی پاییزدا، نۆ هونەرمەندی شێوەكار لە كورد ئاشتی شێخانی و بژار حەمدی و سامان قادر و هونەرمەندانی ئیتالی و ڕووسی و پۆڵۆنی لەیەك هۆڵدا كۆكردەوە لە نیشاندانی تابلۆوكارە تایبەتیەكانیدا، كە ماوەی دوومانگ دەخایەنێ، ئەمەش ئەوەمان نیشان ئەدات كە مرۆڤەكان بێ جیاوازی نەتەوە دەتوانن پێكەوە كاری هاوبەش ئەنجام بدەن كە یەكێكە لە پەیامەكانی كۆمەڵەی موردایك.
شیعرەكان لە كزەی پاییزدا بوونە پەیام بۆ كوردانی ڕۆژئاوای كوردستان
هەر لە درێژەی كار و چالاكییەكانی كۆمەڵەی موردایك لەم وەرزەدا لەژێر ناوی كزە پاییزدا حەوت شاعیری كورد و هۆڵەندی كۆكردەوە لە وانە لەتیف عومەر، حەمە جەزا حسین بەرزنجی، عومەر عەبدوڵڵا، سامان مەوجود لەگەڵ سێ شاعیری بەناوبانگی هۆڵەندی ڤیم باوەر وكەیس فیسەر ویوس كنۆپ، شیعرەكان پڕبوون لە ڕەنگدانەوەی دەنگ و هاواری كوردانی ڕۆژئاوای كوردستان وەك پەیام بۆ كۆمەڵگەی هۆڵەندا كە بە هەردوو زمانی هۆڵەندی و كوردی شیعرەكان پێشكەش بەئامادەبوان كران لەگەڵ بژار حەمدی بەئامێری عود.
دواپەیامی بەرپرسی كۆمەڵەی كوردی موردایك لە هۆڵەندا
لەتیف عومەر وێڕای ئەوەی كە شاعیر و نووسەرێكی لێهاتوویی بواری ئەدەبی كوردییە و كەسایەتێكی نیشتیمانپەروەر و دڵسۆزیی كوردایەتیە بەرپرسی ئەم كۆمەڵەیەشی خستۆتە سەر شانی خۆیی و بۆ خەبات دواوگوتی: سوپاستان دەكەم، ئەمەوێ لە دواجاردا ئەوە بڵێم كە ئێستا سەرقاڵی دوا چالاكی ئەمساڵین لە ڕۆژی 28/12/2019 بۆ ئاهەنگی بەناوی باوەڕ بۆ ژیان ، ئەگەر لەمن دەپرسن بۆ چالاكییەكانمان لەم وەرزی پاییزەدا، تەواو دڵخۆشم بەم چالاكییانە، چونكە كاری من هەرئەوەنییە لێرە و لەوێ شیعرێ بڵێم یان بخوێنمەوە ، تێكەڵ بوون لەگەڵ هەر كۆمەڵگایەك مانای شارەزایی ئەبەخشێ لەهەمان كاتدا شارەزایی وەرئەگریت ، بۆیە دڵخۆشم كە ئەو ئەزمونە دەبینم لە ڕێگای كۆمەڵەكەمانەوە، تێ ئەگەن ئێمە كێیین وئەوانیش لەگەڵمانا كار دەكەن ، ئیتر لەبارەی ڕامیاری ، هونەر، ئەدەبی ، زانستی یان هەربوارێكی تربێت بە بڕوای من ئەگەر توانیت كاربكەیت هیچ كات درەنگ نییە دەبێت لێرەوە بەشداربین لە خەم و ژان و ئازار و هەموو دەردەسەرییەكانی نەتەوەكەمان و نیشتیمانی ژێرچەپۆك، هەروەك چۆن لە خۆشییەكانی بەشدارئەبین. بۆ كۆڕە شیعرییەكەش بەگوڵبژێرێك بەشداربووم لەبەرهەمەكانم ئەمەش پێشكەش بە ڕۆژنامەی خەبات بێت كە بۆ ئێش و ئازاری ڕۆژئاوای كوردستان گوتم لە دوا كۆپلەی شیعری ئاسمانی سوور.
دەست لە سنوورمان هەڵگرن، ئەم سنوورە نووری ، ڕۆشنایی چاومانە، هەرچی هێزی دونیا هەیە، چی زریان وتۆفان هەیە، چی ئاگری گولە باران، لە ئاسمانی خاكمان هەیە، لێكمان ناكا، بتانەوێ و نەتانەوێ، سنووری خاك نیشتیمانە، نیشتیمانمان كوردستانە.
