شەنگە هاوار كاكەیی
دیمەنی چیچەك كچە شەڕڤانی رۆژئاوا كە بە برینداری لە ئامێزی جەندرمەی تاریكستان، بۆ ئەندێشەی تاكی كوردی ئاخۆ چ واتایەكی بەخۆیەوە گرتووە و چ پەیامێكی گەیاندووە؟ مەگەر تەنها ئەو راستییە نەبێ كەوا گڤەبای رق و كینەو تۆڵەسەندنەوەی لە دڵ و دەروونی مرۆڤگەلێك كڕنۆش دراوە، تا لە شێوەی جانەوەر و دەعبا خۆیان نیشان بدەن و كوردیش لە داڕمانێكی مەعنەوی گوزەر بكات.
ئەوان تەنها بۆ تۆقاندن و بەرپابوونی كابووس و نائارامیی دەروونی بێركابەرن، ئەگینا لە هیچ عورفێكدا نەهاتووە مامەڵەی یەخسیر بەو شێوە دڕندانەیە بێت، كە پێی دەڵێن چۆن سەری ببڕین، ئامادەیە بۆ سەربڕین؟ بێ ئاگا لەو راستییەی كەوا ئەوەی سەری دەبڕن شەرەف و كەرامەتی كوردانە لە هەر چوار پارچەی كوردستان، ئەوەی دەیچەوسێننەوە هێمای بەرخودانە.. ئەم راستییانە وا دەكات تاكی كوردی بیر لە بەرەنگاربوونەوە بكاتەوە، ئەوەی جێگای تێڕامانە مەرامی پڕ لە رق و كینەیە كە لە ناخیان كەڵەكە بووە و بووە بە بەستەڵەكێكی نەتوێندراو، ئەوە پاشخانی كینەی سیاسەتی تۆرانیەت و سیراعی ئیمبراتۆریەتی عوسمانییە لەناوچەكەدا هەڵگیرساوە، سەرووی پێنج سەد ساڵ ئیمبراتۆریەت پاشان حوكمی كۆماری، بۆیە شتێكی تازە نییە ئەم هەڵوێست نواندنەیان بەردەقاشەی گۆڕەپانی توركی لەبەرپابوونی ئەفكاری توندڕەویدا لەم پارچە ژێردەستەدا.
هەڵبەتە پرسیار ئەوەیە، پاش ئەم پشتگیری و هاوهەڵوێستی كورد لە هەر چوار پارچەكە و پاش ئەم خۆپیشاندانانەی لۆبی كوردی بە گوشارخستنە سەر وێستگەكانی بڕیاردان و ئەم هەموو پاشخانانە، لەسەرمانە چیتر بكەین؟ ئێمەی هاونیشتمانیانی دۆزی رەوای نەتەوایەتی چۆن هەنگاوە ئەرێنییەكانمان سەتوەتی دابكوتین لە میحرابی رەسەنایەتی و كوردبوون دا، لە ساتەوەختێكی واهەستیار كە خوێنی كورد حەڵاڵكراوە بە قەتلوعام كردن و ئیبادەی جەمعی! ئاخۆ ئەرێنی بوونمان چۆن كوردانە هەڵیبسەنگێنین لەم ساتە پڕ تەم و مژاویانەدا.
ئەوەی مەبەستە بگوترێ كاتێك چیچەكی كوردان كەوتە قەفەسی یەخسیری هەمیشە بۆ زیندووبوونەوە و ریفرێشبوونی هەڵوێستە كردارییەكانی نەستی، بەشێك لە هاونیشتمانی ئەم پارچەیە بوو، كە لێی نیشتەجێن، هەوای ئازادی بە سەرۆكایەتیی سەرۆك بارزانی هەڵئەمژین. ئەو نەستانەی كە بە تەپوتۆزی گەندەڵی ناخیان سواق درابوو، تۆز و غوباری ئەو میحنەتەی لەسەر نیشتبوو. ئەوە چیچەكـە بە رابوون و هۆشیارییەكی نەتەوەییەوە توانی ئەم هەموو تەپ و تۆزە وەلانێ و بە ئاگامان بێنێتەوە كە هەموومان لە یەك كەشتی داین و یەك ئاسمان و یەك چارەنووس لە كەلەندەری رۆژگارماندا نووسراوە، بە مەغبوونیەت و زوڵم و زۆرداری. ئەوە چیچەكـە لە قاڵبی مەینەتی خۆی دەرچوو و شانبەشانی برا پێشمەرگەكانی هەستی كوردبوون و مەردبوونی جوڵا، بۆیە نیگەرانیی بووە میوانی خامەی نووسەر، كاتێك رێكخراوەكانی ئافرەتان داوای ئازادیان بۆ چیچەك دەخواست، چونكە كارێزمای ئەم كچە شەڕڤانە بوعد و تەكامولی ئینسانی تەواو پێگەییوە و پێویستی بە پاڵپشتییەكی مرۆییە، چونكە خاوەن قەزیەی كوردییە، ئەو گوزارشتەی ئافرەت بوون و مێینەبوون و ژنبوونی بەزاندووە و تێپەڕیوە بەسەر ئەم داشەبەردانەدا. بۆیە پاش ئەم زیندووبوونەوە و ئەم دەرفەتە، گونجاوترین ئان و ساتە بۆ سازاندنی ئاهەنگێكی نیشتمانی كە تیایدا كوڕان و كچانی نیشتمان بۆ یەكترناسینی كوردانە خۆیان ئامادە بكەن، ئەوانەشی زویر بووبوون لە واقیعی گەندەڵی پێیان دەڵێین ئێستا دەرفەتێكی گونجاوە بۆ ئاشتبوونەوەی نیشتمانی، چونكە پەیامی چیچەكمان پەیامێكی كوردانەیە و روانینێكی ئاشتیانەیە بۆ كۆمەڵگەی مرۆڤایەتی كە تیایدا غوبنی چل ملیۆن كورد دەخوێنیتەوە لە سۆنگەی بەرپرسیارەتی نەتەوەیی، دەڵێین فەرموون بانگهێشت بن بۆ پرسی نیشتمان.. هەمیشە بژی كورد بژی كوردستان.
ماستەر لە یاسای گشتی/زانكۆی حیكمە بەیروت
