خه‌بات: ‬هەندرێن شێرزاد:-
وەك عورفێكی‮ ‬سەربازی‮ ‬،‮ ‬هەمیشە ئەندامانی‮ ‬هێزە سەربازیە جۆراوجۆرەكانی‮ ‬ئەمەریكا لەسەر ئەوە راهێنراون كە دەست لە كاروباری‮ ‬سیاسی‮ ‬وڵات وەرنەدەن و ملكەچی‮ ‬ئەو بڕیار و فەرمانانە بن كە لە سەرووی‮ ‬خۆیانەوە بەدەستیان دەگات‮ . ‬ئەوان بە هیچ شێوەیەك گوێ بەوە نادەن سەرۆكایەتی‮ ‬و پلە باڵاكان لەدەستی‮ ‬ئەندامانی‮ ‬كامە پارت ولایەنی‮ ‬سیاسی‮ ‬وڵاتەكەیان دان‮ ‬،‮ ‬بۆیە لە مێژووی‮ ‬ئەمەریكا كەم وا هەبووە سەركردە باڵاكانی‮ ‬هێزی‮ ‬سەربازی‮ ‬لە سەرۆكی‮ ‬وڵات هەڵبگەڕێنەوە و رەخنەی‮ ‬توندی‮ ‬ئاراستە بكەن‮ ‬،‮ ‬بەڵام پێدەچێ ئێستا ئەم نەریتەش گۆڕانكاری‮ ‬بەسەردا هاتبێ‮ ‬،‮ ‬بە تایبەتی‮ ‬لەوەتەی‮ ‬دۆناڵد ترەمپ گەیشتۆتە كۆشكی‮ ‬سپی‮.‬

حەفتەیەكی‮ ‬جیاواز
ژەنەراڵ و ئادمیراڵە چوار ئەستێرەكانی‮ ‬ئەمەریكا زیاتر بەوە ناسراون كە كەم قسە دەكەن‮ ‬،‮ ‬ئەوان بەر لە قسەكردن بایەخ بە رێكخستنی‮ ‬وشە و رستەكانیان دەدەن و بە بیانووی‮ ‬نواندنی‮ ‬دڵسۆزی‮ ‬بۆ هێزی‮ ‬سەربازی‮ ‬و وڵات زیاتر بە بێدەنگی‮ ‬دەمێننەوە‮ ‬،‮ ‬بەڵام ئەم حەفتەیە مەسەلەكان بە شێوەیەكی‮ ‬جیاوازتر هاتە بەر چاو‮ ‬و تیایدا ژمارەیەك لە گەورە سەركردەكانی‮ ‬سوپای‮ ‬ئەمەریكا رەخنەی‮ ‬توندیان ئاراستەی‮ ‬دۆناڵد ترەمپ كرد‮ ‬،‮ ‬هاوكات بەشێك لە كەسایەتیە هەرە بەناوبانگەكانی‮ ‬نێو سەركردە سەربازیە خانەنشینكراوەكانی‮ ‬ئەم وڵاتە ناڕەزایی‮ ‬توندیان بەرامبەر بە بڕیار و هەڵسوكەوتەكانی‮ ‬سەرۆكی‮ ‬وڵات دەربڕی‮ . ‬لەو بارەوە رۆژنامەی‮ ‬گاردیانی‮ ‬بەریتانی‮ ‬دەڵێ‮ : ‬ناڕەزایی‮ ‬و رەخنەی‮ ‬ئەم سەركردانە شتێكی‮ ‬كەموێنەیە‮ ‬،‮ ‬ئینجا چ سەبارەت بەو ژمارە زۆرەی‮ ‬هێرشیان كردۆتە سەر سەرۆك‮ ‬یان ئەو زمانەی‮ ‬ئەوان لە هێرشەكانیان بەكاریان هێناوە‮ . ‬بەرچاوترین ئەو وشە توندانە لەلایەن ولیام ماكرڤینی‮ ‬سەركردەی‮ ‬پێشووی‮ ‬كردەوە تایبەتیەكانی‮ ‬ئەمەریكا بوون كە لە ساڵی‮ ‬2011 سەرپەرشتی‮ ‬هەڵمەتی‮ ‬كوشتنی‮ ‬ئوسامە بن لادنی‮ ‬سەرۆكی‮ ‬پێشووی‮ ‬رێكخراوی‮ ‬قاعیدەی‮ ‬كرد‮.‬

ئەمە بێ ئومێدی‮ ‬و سەرشۆڕیە
لە بابەتێكدا كە لە رۆژنامەی‮ ‬نیویۆرك تایمزی‮ ‬ئەمەریكی‮ ‬بڵاو كرایەوە‮ ‬،‮ ‬ماكرڤین سەرۆكی‮ ‬وڵات بە بڵاوكردنەوەی‮ ‬بێ ئومێدی‮ ‬و سەرشۆڕی‮ ‬و توڕەیی‮ ‬و ترس لەنێو هێزە چەكدارەكان تۆمەتبار دەكات‮ ‬،‮ ‬هاوكات پێی‮ ‬وایە ترەمپ پشتی‮ ‬دكتاتۆر و بەهێزەكان دەگرێ و پشت لە هاوپەیمانانی‮ ‬ئەمەریكا دەكات‮ . ‬ئادمیراڵ ماكرڤین لە بابەتەكەیدا داواشی‮ ‬لە ترەمپ كردووە كە هەوڵی‮ ‬باشتركردنی‮ ‬هەڵسوكەوتەكانی‮ ‬بكات‮ ‬یان كۆشكی‮ ‬سپی‮ ‬چۆڵ بكات‮ ‬،‮ ‬ئەو لەو بارەوە نووسیویەتی‮ : ‬ئەگەر ئەم سەرۆكە لە ئاستی‮ ‬ئەو سەرۆكایەتیەدا نەبێ كە ئەمەریكا لەسەر ئاستی‮ ‬ناوخۆ و دەرەوە پێویستی‮ ‬پێیەتی‮ ‬،‮ ‬كەواتە كاتی‮ ‬هاتووە كەسێكی‮ ‬تازە كۆماری‮ ‬بێ‮ ‬یان دیموكرات ژ روو بكاتە كۆشكی‮ ‬سپی‮ ‬،‮ ‬واش باشترە ئەمە بە پەلە جێبەجێ بكرێ‮ ‬،‮ ‬چونكە چارەنووسی‮ ‬كۆمارەكەمان پەیوەستە بە ئەوەوە‮.‬

ژەنەراڵەكانی‮ ‬من‮!‬
دەكرێ بوترێ ئاراستەكردنی‮ ‬ئەم رەخنە توندانە لەلایەن كۆمەڵێك سەركردە و كەسایەتی‮ ‬وا كە مایەی‮ ‬رێزی‮ ‬ئەمەریكیەكانن‮ ‬،‮ ‬بۆتە هۆی‮ ‬خولقاندنی‮ ‬دۆخێكی‮ ‬دەگمەن و كەموێنە‮ ‬،‮ ‬بەو پێیەی‮ ‬دۆناڵد ترامپ سێ ساڵ بەر لە ئەمڕۆ‮ ‬،‮ ‬واتە لەكاتی‮ ‬وەرگرتنی‮ ‬دەسەڵاتدا ئەم كەسایەتیانەی‮ ‬بە‮ ‬ژەنەراڵەكانی‮ ‬من‮ ‬وەسف كردن و لە ئیدارەكەیدا بۆ هەر‮ ‬یەكەیان پایە و پلەیەكی‮ ‬بەرزی‮ ‬تەرخان كرد‮ ‬،‮ ‬ئەوەبوو جیمس ماتیسی‮ ‬بۆ پۆستی‮ ‬وەزارەتی‮ ‬بەرگری‮ ‬و مایكل فلین و هێربرت مكماستەر بۆ پۆستی‮ ‬راوێژكاری‮ ‬ئاسایشی‮ ‬نەتەوەیی‮ ‬و جۆن كیلی‮ ‬بۆ پۆستی‮ ‬وەزیری‮ ‬ئاسایشی‮ ‬ناوخۆیی‮ ‬و دواتر بۆ پۆستی‮ ‬گەورە كارمەندی‮ ‬كۆشكی‮ ‬سپی‮ ‬دەستنیشان كرد‮ . ‬بەڵام ئێستا هەموو ئەو كەسایەتی‮ ‬و ژەنەراڵانە وازیان لە پۆستەكانیان هێناوە و تەنانەت هەندێكیان بە ئاشكرا دژایەتی‮ ‬ترەمپ دەكەن‮.‬

لە نێوان من و ترەمپدا
جیمس ماتیسی‮ ‬وەزیری‮ ‬بەرگری‮ ‬پێشووی‮ ‬ئەمەریكا كە لە مانگی‮ ‬كانونی‮ ‬یەكەمی‮ ‬رابردوو دەستی‮ ‬لەكار كێشایەوە‮ ‬،‮ ‬تا رادەیەكی‮ ‬زۆر بێدەنگی‮ ‬نواند‮ ‬،‮ ‬بەڵام دواتر ئەویش بێدەنگیەكەی‮ ‬شكاند و لە ئاهەنگێكی‮ ‬خێرخوازیدا لە ئێوارەی‮ ‬رۆژی‮ ‬17 ی‮ ‬تشرینی‮ ‬یەكەمی‮ ‬2019 لە رێگەی‮ ‬دەربڕینی‮ ‬چەند نوكتەیەكەوە رەخنەی‮ ‬توندی‮ ‬ئاراستەی‮ ‬ترەمپ كرد‮ . ‬ماتیس لە وتەكانیدا بە گاڵتەجاڕیەوە باسی‮ ‬لەو ماوە زۆرە كرد كە ترەمپ لە‮ ‬یاریگاكانی‮ ‬گۆلفدا بەسەری‮ ‬دەبات‮ ‬،‮ ‬هەروەها نەشیشاردەوە كە چۆن ترەمپ توانیویەتی‮ ‬خۆی‮ ‬لە خزمەتی‮ ‬سەربازی‮ ‬لە ڤێتنام دوور بخاتەوە‮ ‬،‮ ‬لەو بارەوە وتی‮ : ‬من لە گۆڕەپانی‮ ‬شەڕەوە پایەكەی‮ ‬خۆم پێ بڕاوە‮ ‬،‮ ‬بەڵام سەرچاوەی‮ ‬پێگەكەی‮ ‬ترەمپ لە رێگەی‮ ‬نامەی‮ ‬دكتۆرێكەوەیە كە تیایدا بڕیاری‮ ‬داوە ئەو لە خزمەتی‮ ‬سەربازیی‮ ‬ببورێ‮.‬

ئەوان لەبەرچی‮ ‬تووڕەن؟
ئەو ژەنەراڵ و كەسایەتیانە لەبەرچی‮ ‬لە ترەمپ توڕەن و بەم شێوەیە رەخنەی‮ ‬ئاراستە دەكەن ؟ ئەمە پرسیارێكە و زۆربەی‮ ‬وەڵامەكان بەو ئاراستەیەن كە هۆكاری‮ ‬ئەم تووڕەبوونە بڕیارە سەرسوڕهێنەرەكەی‮ ‬سەرۆكی‮ ‬ئەمەریكایە سەبارەت بە كشاندنەوەی‮ ‬هێزە سەربازیەكان لە باكووری‮ ‬سووریا‮ ‬،‮ ‬بۆ ئەوەی‮ ‬رووسیا ئەو بۆشاییە پڕ‮ ‬بكاتەوە‮.‬

هەڵەیەكی‮ ‬جیۆسیاسی
رۆژنامەی‮ ‬گاردیان دەڵێ‮: ‬زۆرێك لە ژەنەراڵ و ئادمیرالە ئەمەریكیەكان دڵتەنگی‮ ‬و ناڕەزایی‮ ‬خۆیان بەرامبەر بە بڕیارەكەی‮ ‬ترەمپ دەربڕیوە‮ ‬،‮ ‬ئادمیراڵ جیمس ستافریدیسی‮ ‬سەرۆكی‮ ‬سەركردایەتی‮ ‬باڵای‮ ‬پێشووی‮ ‬پەیمانی‮ ‬ناتۆ لە دیمانەیەكدا لەگەڵ كەناڵی‮ ‬MSNBC رایگەیاند‮ : ‬بڕیارەكەی‮ ‬ترەمپ هەڵەیەكی‮ ‬جیۆسیاسیە و مەترسیەكی‮ ‬زۆر گەورە بەدوای‮ ‬خۆیدا دێنێ و كاردانەوەی‮ ‬ئەم بڕیارە درێژخایەن دەبێ و گومان دەخاتە سەر متمانەكردن بە ئەمەریكا وەك هاوپەیمانێك‮ . ‬ئادمیراڵ ستافریدیس دەشڵێت‮ : ‬مرۆڤ چۆن بە خەیاڵیدا بێ‮ ‬یەك بڕیار ببێتە مایەی‮ ‬بەهێزكردنەوەی‮ ‬داعش و دووبارە سەرخستنەوەی‮ ‬ئێران و رێگەدان بە بەهێزتركردنی‮ ‬رۆڵی‮ ‬ڤلادیمێر پوتن و گێڕانەوەی‮ ‬بەشار ئەسەدی‮ ‬تۆمەتبار بە بەكارهێنانی‮ ‬چەكی‮ ‬كیمیاوی‮ ‬بۆ پایەی‮ ‬دەسەڵات‮.‬

ترەمپ كێشەیەكی‮ ‬دیكەی‮ ‬خولقاند
‮ ‬هەمان كەناڵی‮ ‬تەلەفزیۆنی‮ ‬دیمانەیەكی‮ ‬لەگەڵ باری‮ ‬ماكاڤری‮ ‬ژەنەرالێ خانەنشینی‮ ‬چوار ئەستێرە و سەركردەی‮ ‬گۆڕەپانی‮ ‬شەڕ‮ ‬لە جەنگی‮ ‬دووەمی‮ ‬كەنداو ئەنجام دا‮ ‬،‮ ‬ژەنەراڵ ماكاڤری‮ ‬لە دیمانەكەدا سەبارەت بە بڕیاری‮ ‬كشاندنەوەی‮ ‬هێزەكانی‮ ‬ئەمەریكا لە باكووری‮ ‬سووریا وتی‮ : ‬كشانەوە لە باكووری‮ ‬سووریا هیچ شرۆڤە و لێكدانەوەیەك هەڵناگرێ‮ ‬،‮ ‬پێدەچێ ترەمپ بە تەنیا بووبێتە مایەی‮ ‬بەرپابوونی‮ ‬تەنگژەیەكی‮ ‬نیشتمانی‮ ‬لە رۆژهەڵاتی‮ ‬ناوەڕاست‮ . ‬لە راستیدا سەرۆك هێزە چەكدارەكانی‮ ‬خستە بەردەم بارودۆخێكی‮ ‬زۆر نالەبار‮ .‬هاوكات هربرت مكماستەری‮ ‬راوێژكاری‮ ‬پێشووی‮ ‬ئاسایشی‮ ‬نەتەوەیی‮ ‬ترەمپ رایگەیاند كە بڕیارەكەی‮ ‬ترەمپ دەبێتە مایەی‮ ‬خولقاندنی‮ ‬ناسەقامگیری‮ ‬و‮ ‬گەرمتركردنی‮ ‬شەڕی‮ ‬ناوخۆ لە سووریا و ناوچەكە‮.
‬
سەركردە سەربازیە كۆنەكان بیر لە چی‮ ‬دەكەنەوە؟
ئاخۆ سەركردە سەربازیە كۆنەكانی‮ ‬ئەمەریكا دەربارەی‮ ‬سەرۆكایەتی‮ ‬ترەمپ بیر لە چی‮ ‬دەكەنەوە ؟ دەكرێ وەڵامی‮ ‬ئەم پرسیارەمان لە ناوەڕۆكی‮ ‬كۆبوونەوەكەی‮ ‬رۆژی‮ ‬16 ی‮ ‬تشرینی‮ ‬یەكەمی‮ ‬رابردووی‮ ‬كۆشكی‮ ‬سپی‮ ‬لە نێوان نانسی‮ ‬پیلۆسی‮ ‬سەرۆكی‮ ‬ئەنجومەنی‮ ‬نوێنەرانی‮ ‬ئەمەریكا لەگەڵ ترامپ دەست بكەوێ‮ . ‬لەو كۆبوونەوەیەدا پیلۆسی‮ ‬بینرا كاتێك پەنجەی‮ ‬لە ترامپ راوەشاند و ئەویش هاواری‮ ‬دەكرد‮ ‬،‮ ‬دواتر ترەمپ رایگەیاند كە خاتو پیلۆسی‮ ‬سیاسەتوانێكی‮ ‬پلە سێیە‮ ‬،‮ ‬هەر لەم كۆبوونەوەیەدا ژەنەرال مارك میلی‮ ‬سەرۆكی‮ ‬دەستەی‮ ‬ئەركانی‮ ‬هاوبەش ئامادە بوو‮ . ‬ئەگەرچیش نازانرێ لەو كاتانەدا ئەم ژەنەرالە بیری‮ ‬لەچی‮ ‬دەكردەوە بەڵام سیمای‮ ‬دەموچاو و جولەی‮ ‬جەستەی‮ ‬زۆر شتی‮ ‬دەربڕی‮ .‬