كاروان محەمەد سینۆ
بێگومان دۆناڵد ترامپ سەرۆكی ئەمەریكا، كەسێكی سەركەوتوو بووە لە بواری بازرگانی و دەوڵەمەندێكی بەناوبانگ بووە بەرلەوەی بێتە نێو كۆشكی سپیی حوكمڕانی ئەمەریكا. دەتوانین بڵێین عەقڵیەتی كەسایەتی ترامپ، عقڵیەتێكی بازرگانییە، پێموایە ئێستاش ترامپ بە عەقڵییەتی بازرگانییەوە لە ئەمەریكا دەڕانێ. بەشێوەیەكی گشتی، بەپێی وردبوونەوە و بەدواداچوونەكانم بۆ لێدوان و پرێس كۆنفڕانس و (تویت)ـەكانی دۆناڵد ترامپ، بەتایبەت بەم دواییە و لەمیانەی كشانەوەی لە رۆژئاڤای كوردستان، تێبینیم كردووە كە ترامپ نایشارێتەوە كە ئەو (ترامپ) چیدی ئامادە نییە لە سووریا و رۆژهەڵاتی ناوەراستدا پارە خەرج بكات بۆ چارەسەركردنی قەیرانی دەڤەرەكە یاخود پاراستنی ژیان و بوون و مانەوەی گەڵێك وەكو گەلی كورد. ئەم هەڵوێستەی دۆناڵد ترامپ تەنها بەرامبەر كورد وا نەبووە!، بەڵكو ترامپ هەمان هەڵوێستی هەبووە بەرامبەر وڵاتانی كەنداو و لە چەندین پەیمان و رێكەوتنی نێودەوڵەتیش كشاوەتەوە وەكو (پەیمانی نەتەوە یەكگرتووەكان بۆ چەك، رێكەوتنی بەرەنگاربوونەوەی گۆڕانی ژینگە، كشانەوە لە یۆنسكۆ، كشانەوە لە رێكەوتنی ئەتۆمی لەگەڵ ئیران، كشانەوە لە رێكخراوی مافەكانی مرۆڤ سەر بە نەتەوەیەكگرتووەكان، كشانەوە لەپەیمانی ڤێننا، كشانەوە لە پەیمانی دۆستایەتی ئەمەریكا و ئیران كە لە زەمانی شا واژووكرابوو، كشانەوە لە پەیمانی سنورداری چەكی ئەتۆمی كە ساڵی 1987 لەگەڵ روسیا ئیمزاكرابوو) ئەوەتا ئەمڕۆش بێ یەك و دوو لە رۆژئاڤا دەكشێتەوە. جا لێرە پرسیار ئەوەیە، ئاخۆ راستە ترامپ لە كۆشەنیگای بەرژەوەندی ئەمەریكا ئەم هەڵوێستەی هەیە؟!، یاخود لەپێناوی بەرژەوەنی خودی خۆی ئەم هەڵوێستەی هەیە؟. واتا بە مانایەكی دیكە، ئایا دۆناڵد ترامپ سیاسەتی بازرگانی و ئابووری لە دەڤەرەكەدا پەیرەو دەكات؟، یاخود بازرگانی بە سیاسەت و جەنگ و قەیران و خوێنی خەڵكی دەڤەرەكە دەكات؟. هەموومان لەبیرمانە.. هاتنی ترامپ (سوپای ئەمەریكا) بۆ عێراق و سووریا، بەپێی لێدوانەكانی دۆناڵد ترامپ بەر لە لێدوانی فەرمی كۆشكی سپی، لەبەر سێ هۆكاربووە: هۆكاری یەكەم: بۆ لەناوبردنی تیرۆرستانی (داعش) بوو. هۆكاری دووەم: بۆ دەركردنی هێز و لابردنی هەژموونی ئیران بوو لە سووریا. هوكاری سێهەم: لەپێناوی دۆزینەوەی چارەسەرێك بووە بۆ قەریرانی سیاسی و سەربازی سووریا، كە چەند ساڵێكە خوێنی لێ دەچۆڕێ و بە سەدان هەزار كەس بوونەتە قوربانی و ئاوارەی وڵاتانی جیهان بوونە. بەڵام كاتێك ئێمە (بەشێنەیی) ئاوڕێك لەم سێ هۆكارەی سەرەوە دەدەیینەوە، دەبینین كە هیچێك لەم هۆكارانە بە ئامانج نەگەیشتوونە، تیرورستانی (داعش) بەتەواوی لەناو نەچوونە، ئیران ئێستا لە سووریادایەوە و هەژموونی زیاتر بووە و بەكشانەوەی ئەمەریكا لە رۆژئاڤا زیاتر دەبێت، قەیرانی سووریا چارەسەر نەبووە و لەمەودا یەكلایەنە ئیدارە دەدرێت. بۆیە جێگای پرسیارە، ئەی باشە بۆچی دۆناڵد ترامپ ئاوا كتوپڕ لە رۆژای كوردستان كشایەوە؟!. لێرە بۆمان دەردەكەوێت كە دۆناڵد ترامپ لە بەرژەوەندی خودی خۆیدا بازرگانی بە سیاسەت و خوێن و قەیرانی دەڤەركە دەكات، هەر ئەمەشە بۆتە ئەگەری نیگەرانی كۆنگرێسی ئەمەریكا لە هەڵوێست و رەفتارەكانی دۆناڵد ترامپ.وەكو كەسێكی بازرگان دۆناڵد ترامپ بەرژەوەندی كەسی زۆر هەیە لەگەڵ توركیای ئۆردۆگان، بۆ نموونە ترامپ باڵەخانەی زەبەلاحی لە شیشلی- ئیستانبول هەیە كە هەریەكەیان 40 نهۆمە و ساڵانە داهاتێكی باش بۆ خودی ترامپ (نەك ئەمەریكا) دەستەبەر دەبێت. هەروەها ترامپ و خانەوادەكەی پەیوەندییەكی بەهێزیان لەگەڵ محەمەد عەلی یەڵسینداغ هەیە كە دەوڵەمەند و كەسی دەستڕۆیشتووی توركیایە و زاوای ئۆردۆگانە. بۆیە دەتوانین بڵێین كشانەوەی ترامپ لە رۆژئاڤا و كوشتن و ئاوارەبوونی كوردانی رۆژئاڤا بازرگانی كردنە بە كریز و قەیرانەكانی دەڤەرەكە لەلایەن دۆناڵد ترامەوە. بەم شێوەیە ترامپ كورسییەكەی سەرۆكایەتی ئەمەریكا لەبەرژەوەندی خودی خۆیدا بەكارهێناوە. بۆیە لێرەدا دەپرسین، ئایا كۆنگرێسی ئەمەریكا بەم هەڵوێست و رەفتارەی ترامپ رازی دەبێت؟!، ئەگەر رازی بوو، چی روودەدات؟!، ئەگەر رازی نەبوو چی دەكات؟!، ئەمانە چەند پرسیارێكن كە لێرەدا دەرفەتی تاوتۆكرنمان نییە، بەڵام لە چەند رۆژێكی نزیكدا وەڵامەكانیان گەڵاڵە دەبێت.
