سەباح بەیتوڵڵا
مللەتێ كورد گەلەك نەخۆشی و پیلان دیتینە و گەلەك پێكول هاتینە كرن ژ بوی ناڤبرنا ڤی مللەتێ ژاروپەریشان و بێ پشتەڤان. لێ مللەتێ كورد وەكو چیایەكێ خورستی مایەڤە و یێ ئامادە بوو بۆ هەر قوربانیەكێ بۆ ئازادیێ و سەرفیرازیا خۆ.
مللەتێ كورد ژی چەندین رێبەر و سەركردێت قەهرەمان هەبووینە و هەمی ژیانا خۆ تەرخان كری یە بۆ خزمەتا گەل و وەلاتێ خۆ ، مەبەست لڤێ بابەتی دا بیرهاتنا (6/10/1958 و 6/10/1993) یا ئێكێ ڤەگەریانا بارزانیێ نەمر و هەڤالێت خۆ ل سالا 1958 ێ و یا دوویێ 6/10/1993 زڤراندنا تەرمێن نەمرا بوو بۆ كوردستانێ ..
گەلەك سەركردا ل دونیایێ رێپیڤان كرینە بەلێ زوربەیا وان دناڤ ئاخاواندا بوویە وەكو رێبەرێ چینێ ماوتسی تونگی .. بەلێ رێپیڤانا بارزانیێ نەمر و هەڤالێن وی دناڤ جەرگێ سێ دەولەتێن داگیركەرێن كوردستانێ بوویە .. گەلەك جاران دیرۆك سەركردە و رێبەرا دروست دكەتن ، بەلێ ب شانازیڤە دبێژین بارزانیێ نەمر دیرۆك دروست كر .. چونكی مللەتێ خۆ ل بێ هیڤی وبێ ئومێدیێ رزگار كر .. تەسلیمی ئیرادا دوژمن و داگیركەران نەبوو….ومللەتێ خۆ ل نەمانێ رزگار كر .. لەوا گەلەك دسەربلندین كو بارزانی مستەفا رێبەر و سەركردە و سومبول و ناسناما گەلێ كوردستانێ یە .. بارزانیێ نەمر (60)سالێن تەمەنێ خۆ تەرخان كرن بۆ رزگاریا كورد وكوردستانێ .. مللەتێ خۆ ل مللەتێن دیتر كێمتر نەدزانی و كەسایەتیا مللەتێ خۆ بلند و بلند ڕاگرت و دەست ژ بوهستەكا ئاخا كوردستانێ بەرنەدا ، لبەر ڤێ چەندێ گەلێ كورد بناڤێ پیرۆزێ بارزانی هاتە ناساندن.
بارزانیێ نەمر و هەڤالێن خۆ (11)ساڵان ل ئێكەتیا سوڤیەتا بەرێ مانەڤە و هەمی دەرگەه لێدان و گازیا مللەتێ خۆ گەهاندە هەمی دونیایێ كو مللەتەكێ هەیی بناڤێ كورد و ئاخەك ب ناڤێ كوردستان و یێن دهێنە جینوساید كرن و كاڤلكرن و وژدانا هەوە بلڤیت بۆ پشتەڤانی كرنێ ل مللەتێ كورد ..
پروفیسور میخائیل لازاریف دبێژیت : ئێك ل بەرچاڤ ترین دەسكەفتێن خەباتا بارزانی بۆ كورد و كوردستانێ ئەوە : كێشا مللەتێ كورد ل كێشەیا ناوچەیی بكەتە كێشەكا نێڤ دەولەتی ، بارزانی شیا وان هەمی بەربەست و ئاستەنگا بشكێنیت و دەنگێ كوردا بگەهینیتە هەمی دونیایێ…
ل دەمێ ڤەگەریانا بارزانیێ نەمر بۆ عیراقێ ل 6/10/1958 خەلكێ عیراقێ ب كورد و عەرەب و توركمان و مەسیحی و نەتەوێن دیتر و ب كەرنەڤالەكا مەزنڤە هەمی چوونە پێشوازیێ و ئاهەنگ و دیلان گێران چونكی هەمیا بارزانی ب سەرۆكێ خۆ دزانی .. هەمی ئازادیخواز و ئاشتیخوازا ب سەرۆكێ خۆ دزانی .. خۆشی كەفتە عیراقێ ب ڤەگەریانا بارزانیێ نەمر و ئاسویەكێ نوی ڤەبوو وهەمی كەسەكێ هەست دكر كۆ خودان كەسایەتی یە و ئێدی زولم و زوری لێ ناهێتە كرن ، بەلێ مێژوویەكا مەزن بوو، سەروەری یەكا مەزن بوو ، نیشانا مەزناهی و كەسایەتیا ب هێزا بارزانی بوو.
ل 6/10/1993 ێ ل دەمێ ڤەگەریانا تەرمێ نەمرا و هەر ل باشماغ و حەتا بارزان لەندا شێرا .. كەژاوەیا تەرمێ نەمرا چەند رۆژا ب رێڤە بوو .. خەلك ل هەمی گوند و باژێرا قولپینە سەر جادا و ب روندك و گوڵ دەست ل سەرسینگی پێشوازی لێكر .. ئەڤەیە دیرووكا ڤان رێبەرو سەروەران .. خەبات و بەرخودان و فیداكاری و دلسوزیا وان بوو ، خوشەویستیا خەلكی بوو بۆ وێ مێژوویا پڕ سەروەری و دونیا حێبەتی ببوو .. ئەڤە چ وەفایەكە .. ئەڤە چ خوشڤیانە ، ئەڤە چ رێزگرتنە .. بەلێ بەرسڤەكا ل جهێ خۆ بوو كو شایانی ڤان سەروەران بیت …
بارزانیێ نەمر دژیانێ دا هێمایێ ئێك رێزیێ و تەبایێ و برایەتیێ بوو .. ل دەمێ مالئاڤاهیێ ژی دیسان مێژوویێ خۆ دووبارە كرەڤە كۆ هێمایێ تەبایێ و برایەتیێ و ئێككرێزیا مالا كوردی یە .. هەوە هەمی ژیانا خۆ تەرخان كر بۆ ئازادی و سەرفیرازیا گەلێ خۆ .. كە بیرهاتنا ڤان یادا دكەینەڤە :
بیرهاتنا مێژوویەكا پڕ سەروەری دكەینەڤە
بیرهاتنا چەندین ئەزمون و سەربورا دكەینەڤە
بیرهاتنا خەباتەكا دویرو درێژ دكەینەڤە
بیرهاتنا هەمی شۆرش و رێبەر و سەركردێن كوردا دكەینەڤە
بەلێ لڤان هەردوو بیرهاتناندا هەمی دل ئێك بوون و هەمی بیروباوەر نێزیكی ئێك بوون ، هەمی رەنگ نێزیكی ئێك بوون .. هەمیا پێكڤە هەوار دكر ل هەمی باژێرو باژێركێن كوردستانێ ل سەر سنوری و حەتا بارزان لەندا بەرخودانێ هەوار دكرو دگۆت : نەیبەنەوە بۆ بارزان .. دەخەینە سەر چاوان.
