یەحیا فایەق جاف
هەنووكە لە هەرێمی كوردستان زۆربەمان، سیاسیین، ئابووریناسین، وەرزشوانین، نووسەرین، ڕەخنەگرین، ئەدیبین، ڕۆژنامەنووسین، پارێزەرین، درۆ نابێت ئەگەر بڵێین “چیت دەوێت ئێمە ئەوەین”!.
لەگەڵ شوفێری تەكسییەك لە گەڕەكی سەروەرانی شاری هەولێرەوە تا ناوەندی بازاڕ سەركەوە، بە قەرەباڵغی و ناڕێكیی لێخوڕین و وەستاندنی نایاسایی تڕۆمبێلەكانی ئەم بەرو و ئەو بەری ئەو شەقامانەی پێیدا بەرەو بازاڕ تێپەڕ دەبیت، تا دەگەیتە ناوەندی شار، ماوەی گەیشتنتەكەت، بیست چركەیەك كەمتر یاخود تۆزێك زیاتر دەبێت.
من لە ماوەی ئەم بیست چركەیەدا لەگەڵ شۆفێری تەكسییەكەم، بە ڕێككەوت تۆزقاڵێك لەسەر باروودۆخی ئێستای كوردستان و پێشهاتەكان كەوتمە قسەكردن، كاتێك هەستم كرد شوفێرەكە زۆر شتی پێیە و حەزی لێیەتی بیانڵێت، هەر زوو خۆم كردە گوێگر و باسەكەم بۆ ئەو جێهێشت، سەرەڕای هەموو گرفتەكانی كاركردنی ڕۆژانەی خۆی و تەكسییەكەی و كوالێتی بەنزین و بێكەڵكی ڕۆنی تڕۆمبێل و گرفتی ڕۆژانەی پێش سەرجەم تاكسییەكانی دیكەی هاوڕێی، هەمووی تێكەڵ بە سیاسەت كرد و یەكسەر هاتە سەر باسی باروودۆخی ئێستای سیاسیی و ئابووری و كۆمەڵایەتی هەرێمی كوردستان و.. هتد.
خۆشی گێڕانەوەی ئەم باسە لەوەدایە، ئەوەی لەگەڵت دەدوێت شۆفێرێكی سادەی تاكسییەكی هەرێمی كوردستانە، دەرچووی كۆلیژی یاسا و سیاسەت، یاخود سیاسییەكی دیاری ئەم كوردستانە نییە، بەڵام لە بەشێكی زۆری سیاسییەكانمان زیاتر بۆ پێشكەوتنی نیشتمانەكەی دڵسۆزانە تر دەستنیشانی كەمووكوڕییە ئیدارییەكانی دەكرد، دەیزانی لە كوێدا هەڵەمان كردووە و چۆن و بە چ ئیرادەیەك ئەو هەڵە و كەمووكوڕیانە چارەسەر دەكرێن و چۆن لە كۆتاییدا هەموومان لە چارەسەركردنیان سوودمەند دەبین.
بەڵێ شۆفێری تەكسییەكە بۆ كێشەكانی ڕۆژ و هەنگاوە چاكسازییەكانی حكوومەتەكەی جەنابی كاك مەسروور مەسعود بارزانی، خاوەن بیرۆكەی جوان بوو، زۆربەی ئەو كێشانەی ئەو باسی لێوە دەكردن، قاڵبووی ژیانی هاووڵاتییەكی دڵسۆز و سادەی كوردستان بوو، واتا دووربوون لە گەوجاندن و موزایەدەی بەرتەسكی حزبیانە و چەواشەكاری، هەر خودی شۆفێرەكە جار بە جارە وەڵامی خۆیشی دەدایەوە و دەیگووت: “با خاوەن بیرۆكەی جوان و چارەسەریش بم، جا منی سایەق تەكسی بەستەزمان كێ ئامادەیە گوێم لێ بگرێت”؟!.
شك لەوەدانییە شۆفێری ئەو تەكسییە تاكە كەس نییە، كە ئومێدی تەواوی بە حكوومەتەكەی جەنابی كاك مەسروور مەسعود بارزانی هەیە و چاوەڕوانی خزمەت و هەنگاوی جددی لەم كابینە دەكات، هەمووان زۆر باش ئەوە دەزانین جەنابی كاك مەسروور ئەو كاتەی ڕاوێژكاری ئەنجوومەنی ئاسایشی هەرێمی كوردستان بوو، زۆر سەركەوتووانە ئەرك و كارەكانی خۆی ئەنجام دەدا، ئەمەش وایكردووە هاووڵاتیانمان ئومێدی زۆریان پێی هەبێت و چاوەڕوانی هەنگاوی جددی و یەكلاكەرەوەی لێ بكەن، بەتایبەتی دژ بە گەندەڵكاران و ئەوانەی هیچ دڵسۆزییەكیان بۆ كارەكانیان نییە، سەرەڕای ئەوەی لە كوردستان هەندێ جار بابەتەكان بە حزبی كراوەن و لەوانەیە ئەمە هەندێك تەگەرە بۆ هەنگاوەكانی چاكسازی جەنابیان لە بەشێكی هەرێمی كوردستان دروست بكات.
بەشی زۆری هاووڵاتییانمان پێشبینی ئەوە دەكەن، كە حكوومەتەكەی جەنابی كاك مەسروور مەسعود بارزانی گۆڕانكاری جددی و بنەڕەتی لە شێوەی كاركردنی حكوومەتدا دەكات و زاڵ دەبێت بەسەر هەژموونی حزبایەتی لە نێو حكوومەتدا، لەگەڵ هەموو ئەمانەشدا، هەمووان چاوەڕوانی ئەوە لە جەنابیان دەكەن، ئیدی ڕێگا بە بەرپرسە نابەرپرسەكان نەدات بە ئارەزووی خۆیان تەراتێن بە سەروەت و سامانی میللەتەكەمانەوە بكەن!. بێگومان هەر هەنگاوێك بەم ئاراستەیە لەلایەن جەنابیانەوە، خۆشەویستی بەشی هەرە زۆری هاووڵاتییانی هەرێمی كوردستانی لێ دەكەوێتەوە و ئەمەش بۆ جەنابیان دەبێتە گەورەترین پاڵ پشت و سەرمایە بۆ هەنگاوەكانی داهاتووی.
لە دوكانی لەفە فرۆشێكەوە بگرە و دەست پێ بكە، تا دەگاتە سووپەر ماركێتك، چایخانەیەك، قاوەخانەیەك، هۆتێلێك، سەیرانگایەك، دوكانی فیتەرێك. نەخۆشخانەیەك، فەرمانگەیەكی حكوومەت، یاریگایەكی تۆپی پێ، زانكۆیەك، قوتابخانەیەك، ئێستا باس هەر باسی سیاسەت و حكوومەتەكەی كاك مەسروور مەسعود بارزانی یە.
لەوانەیە وەكو هەنگاوی یەكەم، ئەوەندە بەس بێت جەنابیان لێپرسینەوە لەگەڵ چەند گەندەڵكارێك بكات، بۆ ئەوەی ئەو خۆشەویستییە ببێتە واقیع، بێشك لێپێچینەوەی ئەوانەی هۆكاری گەندەڵی و ناعەدالەتین لە نێو كۆمەڵگەكەمان، هەموو گەندەڵكارانی دیكە بە ئاگادێنێتەوە و عەقڵ وەبەرخۆیان دێننەوە و لەوە زیاتر چڕنووك لە جەستەی ماندووی میللەتەكەمان نادەن و ئیدی زاتی ئەوە ناكەن یاریی بە سەروەت و سامانی میللەتەكەمانەوە بكەن!. بەداخەوە هەندێك لە بەرپرسە نابەرپرسەكان وا ڕاهاتوون، تا ترس نەگاتە سەر سامان و بەرپرسیاریەتییەكەیان و ڕێكاری جددی و هەنگاو و كەسی جددیتر بەرانبەریان نەبیننەوە، بە ئاگا نایەنەوە و لە بەهەدەردانی سەروەت و سامانی میللەتەكەمان بەردەوام دەبن!.
شۆفێری تەكسییەكە تاكە كەس و كاسبكاری نیشتمانەكەمان نییە، كە باسی سیاسەت و ئەدەب و هونەر و وەرزش و ئابووری و كێشەكانی ڕۆژ دەكات.
لەوانەیە ئەم شۆفێرە بە هۆی كارەكەیەوە، ماڵی زۆربەی هەرە زۆری بەرپرس و بەرپرسەكانی حكوومەتی بینیبێت، ئەو بزانێت كە ئەوان چۆن لە سەردەمی برسێتی و نەداری و نەهامەتییەكانی گەلەكەمان ژیانی ڕۆژانەی خۆیان و بنەماڵەكانیان پاشا ئاسا بە ڕێخستووە!. بۆیە لە ناخیدا خەمێكی وا گەورە پەنگی خواردووەتەوە، ئەو خەمە وای لێكردووە وەكو زۆرێكی دیكە، ئەویش لە ئێستادا هەموو ئومێدێكی حكوومەتەكەی جەنابی كاك مەسروور مەسعود بارزانی بێت و خۆزگە دەخوازێت بە زووترین كات ئەو بەرپرسە نابەرپرسانە باجی هەڵەكانیان بدەن كە لە ڕابردوودا ئەنجامیان داوە.
حكوومەتەكەی جەنابی كاك مەسروور مەسعود بارزانی، لە ئێستادا جێگای ئومێدی زۆربەی هەرە زۆری هاونیشتمانیانمانە، نابێت هاونیشتمانیانمان نائومێد بكرێن!. بەو پێیەی جەنابیان كەسێكی جددی و دڵسۆزە لە كارەكانیاندا و لە ڕابردووش هەروا كاری كردووە و واش ناسراو بووە، دەستنیشانكردنی جەنابیان بۆ سەرۆكایەتیكرنی حكوومەتی هەرێم، ئومێدێكی زۆری لەنێو دڵی هاووڵاتییانی هەرێمەكەمان دروستكردووە، بەشی زۆری هاونیشتمانیان وا پێشبینی دەكەن، لە داهاتوودا جەنابیان دژ بەو گەندەڵكارانە دەوەستێتەوە و ناهێڵێت چیدیكە یاری بە ئایندەی گەلەكەمانەوە بكەن.
بێشك بۆ سنوورداركردنی ئەم پەتا كوشندەیە، پێویستمان بەكاری وردتر و لێكۆڵینەوەی دروستترو جددیەتی زیاتر هەیە، پێویستە دادگاكانی هەرێمی كوردستان و لیژنەی دەستپاكی هەرێمی كوردستان لە ئاست بەرپرسیارێتی سەرشانی خۆیاندا بن و پاڵپشتی تەواوی حكوومەت بكەن و بەڵگەی ڕاست و دروست و دوور لە تەشهیركردن لەسەر هەموو ئەو بەرپرسانە كۆ بكەنەوە كە ماڵی میللەت بە فیڕۆ دەدەن.
دەبێت هەمووان بە دوای ڕاستییەكانەوە بین و هۆكاری تەشەنەكردنی گەندەڵی بدۆزینەوە و بزانین لە كوێدا حكوومەت كەمتەرخەم بووە و لە كوێدا دەتوانرێت كاری زیاتر بكرێت و كەمتەرخەمییەكان نەهێڵدرێت، پێویستە لایەنە پەیوەندارەكانی نێو حكوومەت هاوكاربن بۆ دۆزینەوەی چارەسەری گونجاو بۆ ئەم پەتا كوشندەیە!.
وەكو هەنگاوی یەكەم گرنگە لە ڕێگای یاسایەكەوە دەست بەسەر سەروەت و سامانی كۆمەڵە بەرپرسێكدا بگیرێت، بەتایبەتی ئەوانەی گومان لە خێرا دەوڵەمەندبوونیان دەكرێت!. هەرچەندە زۆرێك لە چاودێران ئەم ئەگەرە بە دوور نابینن و پێشبینی ئەوە دەكەن ئەم ڕێكارە یەكێك بێت لە هەنگاوە گرنگەكانی داهاتووی كابینەكەی جەنابی كاك مەسروور بارزانی، ئەگەر ئەمە ڕوویدا و پڕۆفیشناڵانە ئەم كارە بە ئەنجام گەیەندرا، ئەنجامەكەی بۆ داهاتووی كوردستان و شێوەی بەرپرسیارێتی زۆر ئیجابی دەبێت.
بێگومان لە هەرێمی كوردستان پێویستمان بە یاسای نوێ و تۆكمەتر و كاریگەرتر هەیە بۆ ڕووبەڕووبوونەوەی گەندەڵی و ئەو كەسانەی گومانی بە فیڕۆدانی سەروەت و سامانی میللەتیان لێ دەكرێت، دەبێت سزاكان قورس و كاریكەربن، بە جۆرێك بێت كەس زاتی ئەوە نەكات دەست بۆ ماڵی میللەت بەرێت و گەندەڵی ئەنجام بدات، ئەگەر ئەمانەمان كرد و ڕوویدا، من دڵنیام ئەوكات زۆر لە ئێستا زیاتر، باس هەر باسی حكوومەتەكەی كاك مەسروور مەسعود بارزانی دەبێت.
