بەكر كەریم حەسەن
نوسەر و رۆژنامەنوسی میسری جەلال عامر دەلێ”كشتوكال برسییەتی ناهێلێ وپیشەسازی پێداویستییەكان دەستەبەردەكات، بەڵام فێركردن نیشتمانێك دەچێنێ و دروست دەكات ودێنێتە بوون “.بێگومان فێركردن بەردی بناغەی دروست كردن و بنیاتنانی كۆمەڵگەیە، بۆیە گرنگە بەوپەری بایەخەوە گرنگی بە فێركردن بدەین بۆ پێشكەوتن وگەشەسەندن وپەرەسەندنی نیشتمانەكەمان.
لەفێركردنیش ئەوەی سەرنجی راكێشاوم لەو دوو سێ ساڵەی دوایی رێگەپێدان ومۆڵەتدان و كردنەوەی ئەو هەموو خوێندنە ئەهلییەیە بە هەموو جۆرەكانیەوە پەیمانگا وئامادەیی و بنەڕەتی و باخچەی منداڵان دەپرسین هۆكار چییە؟ ئایا كادیری فێركردن لە قوتابخانە حكومییەكان وەكو پێویست رۆڵی خۆی نابینێت؟ یان ئایا دەرچوون و پەرینەوە و وەرگرتنی بڕوانامە لە قوتابخانە ئەهلییەكان زۆر ئاسان بەدەست دێت؟ یان ئایا ئەهلییەكان چییان بەدەستهێناوە و حكومییەكان نەیانتوانیوە؟ یانیش ئایا كردنەوە و زۆری ئەو هەموو قوتابخانە و پەیمانگا ئەهلییە هێما و ئاماژەن بۆ سەركەوتنی خوێندنی ئەهلی؟ یانیش دەپرسین ئایا قوتابخانە حكومییەكان لە ئاست داواكاری نین؟ بێگومان ئەو پرسیارانە و چەندەها پرسیاری تری جۆراوجۆر لای زۆربەمان دروست بووە، وەڵامەكان بۆ خوێنەر جێ دەهێلم. بەڵام ئەوەی گرنگە و زەروورە وەزارەتمان وەزارەتی پەروەردە بەدواداچوون و دیراسەت كردن و لێكۆلینەوە و لێپرسینەوەی وورد دەست پێ بكات لە كردنەوەی ئەو هەموو قوتابخانە و پەیمانگا ئەهلییانەی لەو دوو سێ ساڵەی دوایی كرانەوە؟ لێژنەكانی رێگەپێدانی كردنەوە و بەرێوەبەرایەتی خوێندنی ناحكومی و مەرجەكانی كردنەوەی قوتابخانە و پەیمانگاكان تا چەند لەگەڵ رێنمایی ویاساكانی خوێندنی ناحكومی و ئەو هەل ومەرجە دەگونجێن و لە هەمان كاتیشدا گرنگە بەراووردێك بكرێ رێژەی قوتابخانە ئەهلییەكان ساڵ بە ساڵ چەندە بە بەراوورد لەگەڵ قوتابخانە حكومییەكان و بە پێی شوێنی جوگرافی، هەروەها ژمارە و رێژەی قوتابیان بە بەراوورد لەگەڵ ژمارە و رێژەی قوتابیان لە قوتابخانە حكومییەكان لە زۆر رووەوە بەراوورد وهەڵسەنگاندنی پەروەردەیی بكرێت.
گرنگە وەزارەتی پەروەردە ئەوپەڕی بایەخ وگرنگی بە خوێندنی حكومی بدات لە هەموو قۆناغەكان لە پێناو خێزانە هەژاروكەم دەرامەتەكان، چونكە قوتابیانی هەژار خاوەن داهاتی دیاری كراو ناچارن لە قوتابخانە حكومییەكان بخوێنن، بۆیە پێویستە گرنگی زیاتر بە قوتابخانە حكومییەكان بدرێت و ژمارەی قوتابیان لە پۆلەكان كەم بكرێتەوە و مامۆستای زیرەك و بەتوانا و شارەزا لە قوتابخانە حكومییەكان دەوام بكەن و رێنمایی نوێ و بەدواداچوون زیاتر بۆ قوتابخانە حكومییەكان بكرێ بۆ پەرەپێدان و گەشەپێدانی زیاتر لە هەموو روویەكەوە لە هەمان كاتیشدا یاسا و رێنمایی یەكلاكەرەوە هەبێت بۆ خوێندنی ئەهلی و نەهێشتنی ئەو جیاوازییە.
❊ بەرێوەبەری گشتی چاڵاكی وەرزش و هونەر
