ڕاپۆرت- سەید فاتیح بەرزنجی
لیژنەی پشكنین و چاودێری بازاڕ سەردانی هەموو شوێنە گشتییەكان و خواردنگە و چێشتخانە و كۆگاكانی خۆراك دەكەن بە هاوكاری پۆلیسی شارەوانی و پۆلیسی ڕێككاری و ڤێتەرنەری چاودێری تەندروستی، بە قسەی خۆیان لەكاتی بینینی هەر سەرپێچیەك چاوپۆشی لە هیچ كەسێك ناكات و هەموو ئەو كەسانە سزا دەدرێن كە سەرپێچی یاسا دەكەن.
بەگوتەی نەبەز عەبدولحەمید قایمقامی قەزای ناوەندی هەولێر: لەكاتی بینینی هەرسەرپێچیەك چاوپۆشی لە كەس ناكرێت و لیژنەكانیش كارەكانیان چڕتر كردۆتەوە بۆ ئەوەی هیچ كەسێك سەرپێچی نەكات و لیژنەكان شەوو ڕۆژیان نییەو هەمیشە لەكاردان.
دەربارەی كارو چالاكیەكانیانیش گوتی: جگەلەو سەردانانەی كە لیژنەكان ئەنجامی دەدەن ئێمە بەدواداچوون بۆ سكاڵای هاووڵاتیانیش دەكەین لەماوەی دوو مانگی ڕابردوودا لیژنەكان توانیویانە چەندین كارو چالاكی ئەنجام بدەن.
بەسەركردنەوەی چێشتخانەو خواردنگەو كۆگاكانی خۆراك
لیژنەكان لە هەموو بوارەكان بەدواداچوونی خۆیان دەكەن وەك بەدواداچوون بۆ چێشتخانەو خواردنگەكان و پشكنینی تەواو بۆ خۆراك و كەلوپەلەكان دەكەن و لەكاتی بینینی هەر سەرپێچیەك ئەوا سەرپێچیكار سزادەدرێت و دوایین كارو چالاكی ئەو لیژنەیە بریتی بوو لە: داخستنی سێ شوێن بەهۆی پابەند نەبوون بە رێنماییەكان ولەلایەن لیژنەی پشكنین و هەشت شوێنی جیا جیا بەدواداچوونیان بۆ كرا و سێ شوێن داخران لەبەر نەبوونی مۆڵەت و پێنج شوێنیش هۆشداریان پێدرا، مەبەستیش لەو پشكنینە لەپێناو بەرژەوەندی گشتی هاووڵاتیانە و هەر شوێنێكیش پابەندی مەرج و ڕێنماییەكان نەبێت ئەوا ڕێككاری یاسایی بەرانبەری دەگیرێتەبەر و دواتر هەر لەلایەن لیژنەی سەر بە قایمقامیەتی هەولێرەوە بەدواداچوون بۆ دوو كارگەی دروستكردنی ماست و قەیماغ كراو لە ئەنجامدا هەردوو كارگەكە داخران، دواتر هەر لەلایەن لیژنەی پشكنین و چاودێری بازاڕەوە پشكنین و بەدواداچوون بۆ پێنج كۆگاو كۆمپانیای خۆراك كرا، كە بریتی بوو لە كۆگای خۆراك و كاڵاو شتومەكی خواردن، لەبەر پابەند نەبوون بە مەرج و ڕێنماییەكان و ڕێككاری یاسایش بەرانبەر خاوەنەكەی دەگیرێتە بەر، هەر لە درێژەی كارو چالاكیەكانی لیژنەكانی سەربە قایمقامیەتی هەولێر 13 تەن نۆكی ماوە بەسەرچوو دەستی بەسەرداگیرا لە بازاڕی شێخەڵڵای هەولێر، ئەویش دوای پشكنین و بەدواداچوونی لیژنەی پشكنین و چاودێری بازاڕو بۆیان دەكەوت كە بەكەڵكی خواردن نایەت و بڕیاردرا بە گواستنەوەی بۆ زبڵخانەی كانی قرژاڵەو بەشێوەیەكی زانستی و رەچاوكردنی ژینگە لەناو بردرا.
دواتر قایمقامی هەولێر هەر لەدرێژەی لێدوانەكەیدا ئاگاداری هاووڵاتیانی كردەوە كە خۆیان بەدوور گرن لەكڕینی ئەو جۆرە كاڵایانە و گوتی: وەك تێبینی كراوە لە زۆربەی كۆگاو سوپەر ماركێتەكان و گۆشتفرۆش و پیشەوەرانی هەولێر بەروبوومە شیرەمەنییەكان و گۆشت و بەروبووومی پەلەوەر و ئاژەڵ و خواردنەوە گازییەكان و شەربەت و كاڵا لەبەردەم تیشكی خۆردا دادەنێن، كە ئەوەیش سەرپێچی و زێدەڕۆییە، كاریگەری خراپی دەبێت لەسەر پێكهاتەی ئەو كاڵایەو ژەهراوی دەبێت.
دواتر دەربارەی بەدواداچوونی كاری لیژنەكان نەبەز عەبدولحەمید قایمقامی قەزای ناوەندی هەولێر گوتی: كارەكانی لیژنەكە ڕۆژانە بەردەوامی هەیەو لیژنەكان بەبێ جیاوازی سەردانی هەموو شوێنەكان دەكەن و لەكاتی بینینی هەر سەرپێچیەك كەسی سەرپێچیكار بەپێی یاسا سزا دەدرێت ئەوەتا لەلایەن لیژنەكەوە 10 ماركێت بەدواداچوونیان بۆ كراو لە ئەنجامدا سێ ماركێت بەهۆی پابەند نەبوونیان بە ڕێنماییەكان داخران، جگە لەوەش هەر لەلایەن لیژنەكەوە لەسنووری شارەوانی شەش بەدواداچوون بۆ 15 كۆگا كرا، كە بریتی بوو لە كۆگای خۆراك و خواردن و بەروبوومی پەلەوەڕ و ئاژەڵی و بەهۆی پابەند نەبوون بە ڕێنماییەكان حەوت كۆگا داخران و هەشتەكەی دیكەیش هۆشداریان پێدراو هەرلەلایەن لیژنەكەوە دوای بەدواداچوون بۆ 10 كۆگای دیكەی خۆراك و دوای بەدواداچوون بۆ ئەو كۆگایانە سێ كۆگا داخران و 7 كۆگاكەی دیكە هۆشداریان پێدراو هەر لە سنووری شارەوانی شەش بەدواداچوون بۆ 12 شوێن و كۆگای خۆراك و خواردن و چوار كۆگایان داخراو ئەوانی دیكەیش هۆشداریان پێدرا، هەر لەلایەن لیژنەی پشكنین و بەدواداچوونی بازاڕ بەدواداچوون بۆ 22 شوێنی وەك گۆشتفرۆش و چێشتخانەو خواردنگەو میوە فرۆش و دوو خواردنگە داخران لەبەر پابەند نەبوون بە ڕێنماییەكان 20 شوێنەكەی دیكە هۆشداریان پێدراو لەگەڕەكی فەرمانبەرانی هەولێر دەست بەسەر 7 تەن جگەری مریشك داگیرا و پەڕاوی لێكۆڵینەوەش بۆ چوار كەس كرایەوەو بەپێی یاسا مامەڵەیان لەگەڵدا دەكرێت.
بەدواداچوون بۆ دەرمانیش دەكرێت
دواتر قایمقامی قەزای ناوەندی هەولێر سەبارەت بە كەیسی دەرمانیش گوتی: لیژنەكانی سەر بەقایمقامیەتی هەولێر توانیویەتی بە شێوەیەكی بەرچاون بەدواداچوون بۆ كەیسی دەرمان بكات و چەندین دەرمانخانە و شوێنیان داخستووە وەك داخستنی 27 شوێنی دەرمانی قڕكەری كشتوكاڵی و نەهێشتنی دەرمانی قاچاغ، ئەویش بە هاوكاری پۆلیسی شارەوانی و نەهێشتنی تاوانی ڕێكخراو و بەڕێوەبەرایەتی گشتی كشتوكاڵی هەولێر.
نەبەز عەبدولحەمید گوتیشی: لە هەڵمەتێكدا پشكنین بۆ 27 شوێنی وەك دوكان و كۆگای فرۆشتنی دەرمانی قڕكەر لەسەر ڕێگای هەولێر ژ گوێڕو هۆشداریان پێدراو هەرلەلایەن لیژنەكەوە دەست بەسەر بڕێكی زۆری دەرمانی ساختەدا گیرا ئەویش لەلایەن لیژنەی باڵای بەدواداچوونی دەرمان و بەڕێوەبەرایەتی كۆنتڕۆڵی جۆری دەرمان و نەهێشتنی تاوانی ڕێكخراوی سەر بەئاژانسی پاراستن و ئاسایشی هەولێر و لەڕێگای هێزی تایبەتی یەك و پۆلیسی شارەوانی لە هەڵمەتێكدا لەیەكێك لە خانووەكانی گەڕەكی نازناز بەپێی زانیاری پێشوەختە، توانرا دەست بگیرێت بەسەر بڕێكی زۆری دەرمانی ساختە، دیارە ئەو جۆرە دەرمانانە ڕێگە پێ نەدراوەو پەڕاوی لێكۆڵینەوە بۆ خاوەنەكەی كرایەوە و ڕەوانەی بەردەمی دادگا كرا. شایانی باسە لیژنەی باڵای دەرمان لەماوەی ساڵانی ڕابردووشدا بەدواداچونی بۆ دەرمان و كۆگانی دەرمان كرددوە و دوو شوێنی دیكەی بەناوی كۆمپانیا داخران ئەویش دوای كۆكردنەوەی زانیاری و چاودێری كردنی پێشوەختە لەلایەن بەڕێوەبەرایەتی نەهێشتنی تاوانی ڕێكخراوی سەربە ئاژانسی پاراستن و پۆلیسی ڕێككاری لە گوندی ئیتاڵی 1و 2 هاوشێوەی ئەو دوو كۆمپانیایەی دەستی بەسەرداگیرا كە یاری قوماری تیا دەكرا، بەناوی كۆمپانیا داخران و لە گەڕەكی گەنجان سیتیش كۆمپانیایەك داخرا كە بەناوی كۆمپانیای بۆرسە كاری دەكرد و لەلایەن قایمقامیەتی هەولێر چەندین شوێنی قومار كردن داخران.
لەكۆتاییشدا قایمقامی قەزای ناوەندی هەولێر گوتی: ئەوەی كە زۆر گرنگە باسی لێوەبكەم كارەكانی لیژنەكان لە پێناو بەرژەوەندی هاووڵاتیان كاردەكات و هەموو سكاڵاكانی هاووڵاتیانیش وەردەگرین و بەدواداچوونی لەسەر دەكەین و هەر كەسێكیش كە پابەندی مەرج و ڕێنماییەكان نەبێت ئەوا لەلایەن لیژنەكانەوە سزادەدرێت لەكاتێكدا ئەگەر هاتوو سەرپێچیەكان دووبارە بكاتەوە.
