شاخەوان برایم عەبدوڵلا
بە گوێرەی كاتی دیاریكراو بێت، هێشتا كاتی پێویست لەبەردەم هێزە سیاسییەكانی كوردستاندا ماوە بۆ ئەوەی لە پەیوەست بە پڕۆسەی هەڵبژاردنی ئەنجوومەنی پارێزگاكان خۆیان رێكبخه‌نەوە، بەدیاریكراویش پرسی بەشداریكردنی كورد لە هەڵبژاردنی ئەنجوومەنی پارێزگای كەركووكدا، كە ئەم كەیسە بە نیسبەت كوردەوە كەیسێكی یەكجار ئاڵۆزە و خودی بڕیاری ئەنجامدانی هەڵبژاردن لە كەركووك، لە بنەڕەتدا بڕیارێكی سیاسییە و بەو مەبەستە دراوە تا جارێكی دیكەش، پێگەی كورد لە كەركووك لاواز بكەن.
زۆرترین قسە و باسوخواس لەبارەی دۆخی سیاسی، ئەمنی و هەتا كۆمەڵایەتیی كەركووك و هەموو ئەو ناوچە كوردستانییانەی دەكەونە دەرەوەی ئیدارەی هەرێمی كوردستانەوە دەكرێن، بە جۆرێك ئەوەی لە دوای 16ی ئۆكتۆبەری 2017 روودەدات، هیچیان لە بەرژەوەندی كورددا نین و لە پڕۆسەیەكی سیاسی و ئەمنی و سەربازیدا كار بۆ تەعریبكردنی كەركووك و دەرپەڕاندنی كورد لەو ناوچانە دەكرێت، بۆ ئەمەش حكوومەتی عێراق لە سەرەوە قسەی باقوبریق دەكات و لە ژێریشەوە پڕۆسەی تەعریب و دژایەتیكردنی كورد، وەك خۆی بەڕێوەدەچێت.
هەڵبژاردنی ئەمجارەی ئەنجوومەنی پارێزگای كەركووك، زۆر هەستیارە، بەهۆی ئەوەی ناوچە كوردستانییەكان و بە تایبەتیش كەركووك، لەژێر هەژموونی حەشدی شەعبی و حكوومەتی عێراق دایە، دیارە حەشدی شەعبیش بە تەواوی لەژێر كاریگەریی ئێران و سیاسەتی تاران جێبەجێ دەكات، لەم دۆخەدا هەڵبژاردنەكە بۆ كورد زۆر مەترسیدارە، بەوەی هەر دۆڕاندنێكی هەڵبژاردن لە كەركووكدا، مەترسییەكەی یەكجار زۆرترە لەوەی بە سادەیی باسی بكرێت، بەڵكوو دۆڕاندنی كوردە لە كەركووك و چارەنووسی شارەكەش جارێكی تر هاوشێوەی 16ی ئۆكتۆبەر بە قەدەر دەسپێرێتەوە، بە تایبەتی ئەگەر هێزە عەرەبی و توركمانییەكان بتوانن لە رێگەی دەنگەوە پارێزگارێك بۆ كەركووك دابنێن، ئەوكات شەرعییەت بە هەر كردەیەكی تەعریب و بە توركمانیكردنی كەركووك دەدەن.
لەم دۆخەدا پێویستە كورد لە دوو رەهەندەوە خۆی بۆ پڕۆسەكە ئامادە بكات، رەهەندێكیان كە پێویستە پێداگری زۆری لەسەر بكات، ئەویش كاركردن بێت تا هەڵبژاردن لە كەركووكدا نەكرێت، رەهەندەكەی تریشیان ئەوەیە كاتێك كورد دڵنیا دەبێتەوە لەوەی حكوومەتی عێراق نایەتە ژێرباڵی داواكردنی رەتكردنەوەی هەڵبژاردن لە كەركووكدا، ئەگەرچی كورد دەبێت بە جدی داوای هەڵپەساردنی بڕیاری هەڵبژاردن لە كەركووك بكات، بەڵام كاتێك عێراق هەر سووردەبێت لەسەر ئەنجامدانی، ئیدی كورد پێویستە بەوپەڕی توانا و هۆشیاری و ماددی خۆی، ئینجا بە یەك لیست بێت، لیستێكی كوردییانە كە ناكۆكییە سیاسییە حزبییەكانی تێدا رەنگ نەداتەوە، یان هەرچی هێز و لایەنی سیاسیی كوردستانییە بایكۆتی هەڵبژاردن بكەن و داوای چارەسەری دۆخی كەركووك بكرێت، بۆیە گرنگە ئەو توانا مرۆیی و سیاسی و كەسێتییەی هەیە، بۆ كەركووك بەگەڕبخرێت و مەترسییەكانی هەڵبژاردن بە گەورەیی وەربگیرێن، لەپێناوی ئەوەی كورد بتوانێت بە یەكگرتوویی لەم قۆناغە هەستیارەی هەڵبژاردندا سەركەوتووبێت، ئەگەر هاتوو بەشداری تێدا كرد، ئەوكات دەكرێت هێزە كوردییەكانیش لەناو خۆیاندا لەسەر كەسێك بۆ پارێزگاری كەركووك رێكبكەون یان بە خول پارێزگار دابنێن و ئەمەش لەپێناو گەڕاندنەوەی كەركووكە بۆ ژێر هەژموونی هەولێر وەك پایتەختی كوردستان.
مادام بڕیاری ئەنجامدانی هەڵبژاردن لە كەركووك، بڕیارێكی سیاسییە و مەبەست لێی گوشارە بۆ سەر كورد و داگیركردنی شارەكەیە، لە رێگەی كورسییەكانی هەڵبژاردنەوە، بە جۆرێك دۆخەكە لە بەرژەوەندی لایەنی عەرەبی و توركمانی ئامادەسازی تەواوەتی بۆ كراوە، بۆیە پێناچێت بەغدا رازی بێت بە دواخستنی هەڵبژاردن لە كەركووكدا، لەبەر ئەوەش قۆناغەكە بۆ كورد هەستیارە و پێویستی بەوەیە لە ئێستاوە كار بۆ بردنەوەی هەڵبژاردنەكە بكات لە چوارچێوەی یەك لیستیی هاوپەیمانی لایەنە كوردییەكان، ئەگینا حكوومەتی عێراق زۆرترین هەوڵی سیاسی و ئابووری، شێوازی بەشداری خەڵك لە هەڵبژاردنەكە و رێگریكردن لە كورد دەدات تا هەڵبژاردنەكە بباتەوە، ئەوكات قەبارەی زیانەكان بۆ كورد، یەكجار لەوەی ئێستاش گەورەتر دەبن، لێرەدا كورد دەتوانێت بە یەكگوتاری و یەكلیستی و یەكئیرادەیی كوردانە، هەر هیچ نەبێت لەم قۆناغەدا رووبەڕووی ئەو هەڵبژاردنە ببێتەوە، ئاخر هەر شكستێك لە كەركووك، شكستی تەواوی هێزە سیاسییەكانی كوردستانە و دواجاریش ئەوەی زیانە گەورەكە دەكات، كوردە بە پلەی یەكەم و كەركووكییە كوردەكانیش بە دیاریكراوی ئازارەكانی ئەو زیانەیان بەردەكەوێت.
