خەبات: ساسان دەروێش – هۆڵه‌ندا:-
خواكوڕك، داستانی پڕ لە شكۆ و قارەمانێتی پێشمەرگەكانی پارتی دیموكراتی كوردستانە، بە سەرپەرشتی سەرۆك بارزانی و بە گیانفیدایی و خوێنی ئاڵی رۆڵەكانی گەلەكەمان تۆماركرا و لە مێژووی سەروەرییەكانی كورددا بەزیندویی دەمێنێتەوە، ئەوەندە هەڵدەگرێت چەندان ڕۆمانی لەسەر بنووسرێت و باشترین فیلمی سینەمایی لەبارەوە دروستبكرێت.
داستانی خواكوڕك لە 9ی تەممووزی ساڵی 1988 دەستیپێكرد و لە 5ی ئەیلوولی هەمان ساڵدا بە سەركەوتنی پێشمەرگە كۆتایی هات، كە 46 رۆژی بەردەوامی خایاند، كە رژێمی بەعس لە دوای كۆتاییهاتنی لە شەڕی هەشت ساڵەیدا لەگەڵ ئێران بەنیاز بوو بە هەموو هێز و توانای خۆیەوە لانەی هەڵۆیان لە چیاكان و چریكەیان كپبكات و سەنگەری بەرگریان پێ چۆڵبكات و دەنگ و رەنگی پێشمەرگە و ناوی كورد بسڕێتەوە و بڵێ هیچ پرس و كێشەیەك بەناوی كوردەوە بوونی نەماوە.
ئەم نەبەردییەی خواكوڕك، بەهیمەتی سەرۆك بارزانی كە راستەوخۆ ئامادە و سەرپەرشتی داستانەكەی كرد و ئەمەش لە بەرەكانی جەنگدا بووە هۆی ئەوەی وزەیەكی زۆر ببەخشێتە پیشمەرگەكان، بۆ بەرگرییەكی كەم وێنەی مێژوویی كە ئەمڕۆی لەسەر بنیات نرا و دەستكەوتەكانی بۆ داهاتووش هەر دەمێننەوە، چونكە حكوومەتی ئەوكاتی بەعس دەیویست كورد بسڕێتەوە، بەڵام داستانی خواكوڕك خەونی رژێمی بەعسی لە گۆڕنا.
بۆ یادەوەری و باسكردن لە داستانی خواكوڕك و هەڵدانەی لاپەڕەیەكی دیكەی گەشی داستانەكە، ئەمجارە دەچینە لای پێشمەرگەیەكی دیكەی قارەمانیی بەشدار لە داستانی خواكوڕك و لەسەر زاری ئەو پێشمەرگەیەوە، هەمدیس گەورەیی و گرنگی داستانەكە دەگێڕینەوە. خالید كوڕی شەهید ئەحمەد، پێشمەرگەی دێرین، كە ئەوكاتە پێشمەرگەی لیژنەی ناوچەی چوارتای سەر بە لقی4ی پارتی بوو، ئێستا بە پلەی عەمید، بەرپرسی هۆبەی حەرەكاتە لە ئاسایشی سلێمانی، ئەو پێشمەرگە دێرینە بەمجۆرە تیشكی خستە سەر داستانی خواكوڕك:
خالید كوڕی شەهید ئەحمەد، پێشمەرگەی دێرین لەبارەی داستانەكەوە بۆ خەبات، گوتی: فەرمانی بەشداریكردنمان لەلایەن سەرۆك بارزانییەوە بۆ هات و ئیتر ئێمەش وەك پێشمەرگەكانی سەر بە لیژنەی ناوچەكانی لقی4ی پارتیمان لە رۆژی 13/08/1988 بەرەو سێگۆشەی سنووری هەر سێ دەوڵەتی ئێران و عێراق و توركیا بەڕێكەوتین، بەر لەوەی بچینە بەرەكانی پێشەوەی جەنگ، بە دیداری سەرۆك بارزانی شادبووین كە خۆی لەوێ سەرپەرشتی بەرەكانی جەنگی دەكرد. سەرۆك بارزانی لەو رۆژەدا رێنمایی زۆری كردین و من ئێستاش وتەكانی ئەو رۆژەم لەبیر ماوە، كە فەرمووی: من گومانم لە قارەمانیەتی و ئازایەتی ئێوە نییە و لە ناوچەكانی سلێمانی و شارەزوور و قەرەداخ و شارباژێر سەلماندوتانە كە ڕۆڵەی گیانبازی ئەم میللەتەن، بەڵام دەبێ ئەوە بزانن ئێوە شارەزای جوگرافیای ئەم ناوچەیە نین و تا شارەزای دەبن، دەبێت زۆر وریا بن.
ئەو پێشمەرگە بەشداربووەی داستانی خواكوڕك، سەبارەت بە كاریگەری رۆڵی سەرۆك بارزانی لەسەر ورەی پێشكەرگە، گوتی: ئەو دیدارەمان لەگەڵ جەنابی سەرۆك بارزانی، ئەوەندەی تر ورەی پێشمەرگەكانی بەرز كردەوە و بە حەماسەتێكی گەورەوە ڕوومان كردە بەرەكانی پێشەوەی جەنگ و بۆ ڕۆژی دواتریش هێزەكەی ئێمە جەبهەی شەڕەكەی وەرگرت، ئەو هێزەی منی لەگەڵ بووم 27 پێشمەرگە بووین، كەوتینە پشتی گوندەكانی غەزنە و شێخان، هەر پاش چەند كاتژمێك دوژمن هێرشێكی زۆر گەورە و بەرفراوانی بۆ كردین، بەڵام هێزەكەی ئێمە بە جۆرێك بەرپەرچی ئەو هێرشەمان دایەوە كە دوژمن زۆر خراپ تێكشكا و دەیان لاشەی كوژراویان لەو مەیدانە لێ بەجێما، كە شەویش داهات دیسان لەشكری بەعس بە تۆپبارانی خەست ناوچەكانی ئێمەی كوتا، ئێمەش دەمانزانی دوای تۆپباران هێرشی دوژمن دەستپێدەكات، بۆیە هەموومان لە سەنگەرەكانمان خۆمان ئامادە كردبوو بۆ هێرشەكەی ئەوان، هێرش دەستیپێكرد، لەو شەڕەشدا دیسان دوژمن تێكشكا و بە سەرشۆڕی لە مەیدانی شەڕەكە هەڵات، بەڵام زۆر جێی داخ بوو بۆ ئێمە كە هەڤاڵێكی قارەمانمان بە ناوی شێخ بابە رەسووڵ لەو شەڕەدا شەهیدبوو، لە تۆڵەی شەهید بابە رەسووڵ رۆژی دواتر 22/08/1988 هێزەكانی پێشمەرگە قارەمانەكانی لقی4ی پارتیمان هێرشێكی بەور ئاسامان و توانیمان لەو هێرشەدا لیوای 602ی پیادەی عێراق بە تەواوی لەناوبەرین و سەدان لاشەی كوژراویان لێ بخەین، بێجگە لە 22 دیلی دوژمن لە ئەفسەر و سەرباز كەوتنە دەستی پێشمەرگە.
بۆ خەبات گوتیشی: پێویستە لێرەدا ئاماژە بەوە بكەم لەبەر سەختی شەڕەكان و نزیكی زۆری ئێمە لە سەنگەرەكانی دوژمن، زۆر بەسەختی خواردن و فیشەكمان پێدەگەیشت، بەڵام ئەوە ورەی پۆڵایینی پێشمەرگە بوو كە گەورەترین چەكی ئێمە بوو، نەمانهێشت دوژمن بستێك ببێتە پێش و لە هەموو شەڕ و هێرشەكانیان بە سەختی تێك دەشكاند، دیلەكانی دوژمنیش كە كەوتنە دەستمان، شایەتی ئەوەیان دەدا و گوتیان ئێمە پێمان وابوو لەگەڵ پۆڵا و ئاسن ڕووبەڕوو بووینەتەوە نەك لەگەڵ خوێن و گۆشت، هەروەها دەیانگوت بەڕاستی ئێستا تێدەگەین وشەی پێشمەرگە مانای چییە!
هەر سەبارەت بە داستانەكە، ئەو پێشمەرگەیە دەڵێت: جەنگی عێراق و ئێران راوەستابوو، دوژمن هێزێكی بێشوماری هێنابووە مەیدانی شەڕەكە و هەموو تەركیزی خۆی خستبووە سەر هێزەكانی ئێمە لە سێگۆشەی سنووری سێ دەوڵەتەوە، بەرەیەكی تری شەڕەكانی پێشمەرگە كە كاك رەئووف بناویلەیی و كاك ئەنوەری حاجی عوسمان سەرپەرشتیان دەكرد، هێرشێكی زۆری لەسەر بوو، لەوێشدا دوژمن تێكشكا و مەیدانی جەنگەكە بە لاشەی دوژمن پڕ ببوو، بەڵام بەداخەوە لەوێدا 2 پێشمەرگەی ترمان بە ناوەكانی: مام والی حاجی عارف، رەحمان وەڕازی شەهیدبوون، بەڵام دوژمن لە جوڵە كەوت و ورەیان ڕووخابوو.
خالید شەهید ئەحمەد، سەبارەت بە دواڕۆژەكانی شەڕەكە، زیاتر گوتی: لە دوا ڕۆژەكانی شەڕەكە دوژمن جارێكیتر و لە رۆژی 05/09/1988 بە هێزێكی زۆر گەورەوە هێرشێكی تری كرد كە چەندینجار لە هێزەكانی پێشمەرگە زیاتر بوو، بەڵام ئەمجارەشیان خراپتر لە جارەكانی تر تێكشكان و سەدان لاشەی سەربازەكانیان لە مەیدانەكە بەجێمان، كە لەناویاندا هێزەكانی قوات خاسە و مغاویر دەبینران و چەندین پلەدار و ئەفسەریشیان تێدابوو، دوژمن ئەمجارەیان بەرەو سیدەكان هەڵات، ئەم نەبەردییەش بە خوێنی 3 پێشمەرگەی ئازا و گیانفیدای لقی 4 تۆماركرا كە ئەوانیش: شەهید عارف حارس و شەهید فەرەیدون عەبدوڵڵا كە پێشمەرگەی لیژنەی ناوچەی چوارتا بوون، هەروەها شەهید حەمە خان هەورامی كە پێشمەرگەی لیژنەی ناوچەی شارەزوور بوو.
لە كۆتاییدا دەمەوێت بڵێم، وەك پێشمەرگەیەكی شۆڕشی گوڵان گەورەترین شانازی بوو كە بەشداریم لەو داستانەدا كرد، سوپاسی تۆی كوڕە شەهیدیش دەكەم كە هەمیشە بەدوای هەنگاوەكانی باوكی شەهید و رێبازەكەتی بۆ خزمەتكردن.
