نقشبەندی ئیبراهیم سرینی
وتەیەك هەیە دەڵێ ” گەر گەورەیەكت نەبوو، بچۆ گەورەیەك بۆخۆت بكڕە”. هەروەها لە وتەیەكی پێشیناندا دەڵێ ” تەگبیركارت بمێنێ پیشەكار دروست دەبێتەوە” ئەم دوو وتەیە ماناو واتای زۆر دەبەخشێ بەتایبەتی بۆ كۆمەڵگای كوردی كە بەدرێژایی مێژوو ستەمی لێكراوەو دابەش كراوە؟! وە بەردەوام دوژمنایەتی و رق و كینە لەنێوانیاندا چێندراوە، بۆیە دەبینین هەركاتێ میللەتی كورد هەنگاوێك بهاوێژێت بۆ پێشەوەو نزیك بووبێتەوە لە ئامانجە سەرەكییەكەی ئەوا بەشێوەیەكی دوور لە مافەكانی مرۆڤ و بێ ویژدانانە بەرنامەڕێژی كراوە بۆ ئەوەی لەم مافە دووربكەوێتەوە بێ ئەوەی میللەت درك بەوە بكات كە چ كارەساتێك بۆ نەوەی دوای خۆی جێ دەهێڵێت!؟
وەك چۆن دابەش بوون و قوڵ بوونەوەی كێشەكان و رق زیاتر بەناویاندا رۆ دەچێ كە بێ شك دەستی دەرەكی و فیتنە لە پشتەوەی ئەو كارەساتە گەورانەیە كە بەسەر نەتەوەی كورد داهاتووە و چەندین دەیەیە دەناڵێنێ بەدەستی دووبەرەكی و نا سیستەم بوون و دوواكەوتنی بەهۆی ئەوەی هیچ لەو شەنس و هەلانەی هاتنە پێشەوە كە وەكو هەلی ئەڵماسی و زێڕی بوون نەتوانرا سودیان لێوەربگیرێت یا هەڵبقۆزرێنەوە، ئەم مافە رەوایە ببێتە راستەقینە بەهۆی ململانێی نێو خۆیی و خیانەت! بێ گوێدانە ئەو هەموو كارەسات و ماڵوێرانیەی بەسەر ئەم گەلە داهاتووە و ئەم خوێنە بەهەدەر چووەی كە لەپێناویدا رشتراوە! رابردوو روونە ئەوەی بیەوێت لێكۆڵینەوە بكات و مێژووی راستی و زانستی بخوێنێتەوە.
لەم وتارەدا راشكاوانە باس لە مەرجەعی سیاسی گەورەی كورد سەرۆك مسعود بارزانی دەكەین سەبارەت بەم هەڵوێستانەی كە لە رابردووداو لە ئێستادا دەینوێنێ وەكو سەركردەو رابەری نەتەوەیەكی ستەمدیدە، كە ئاشكرا نیە بەرەو كوێ هەنگاوی پێدەهاوێژرێت لەلایەن ئەمەریكاو وڵاتانی دیكە مەبەست لە كوردانی رۆژئاواو رۆژهەڵات و باكورە وە ئەو بارودۆخە هەستیارەی ماوەی رابردوو و ئێستا پێی تێپەر دەبێ هەستیارو تا راددەیەكی زۆر ترسناكە بۆیە هەنگاوی جددی و حەكیمانە فریادرەس دەبێت و كەشـتی كوردستان بە سەلامەت لە شەپۆلە تاریكو ترسناكەكانی بەرەو ناوچەی رۆژهەڵاتی ناوەراست هاتووە دەربازی دەبێت و لەكەناری ئارامیدا ئۆقرە دەگرێت، بە پێچەوانەوە هەر كەموكوڕیێك یا هەوڵدانێك بۆ نغرۆ كردنی ئەم كەشتیە لەناوەوە ئەوە كەس بە سەلامەتی تیای دەرناچێ و هیچ تاقم و لایەنێك سەلامەت نامێنن؟!، دەبێتە نەفرەتێكی گەورە كە نەوەكانی داهاتوو لە ئێستای دەكەن و ئەوانیش بێ ناسنامەو وڵات بەنادیار دەسپێردرێن!!. لێرەدا بە كورتی چەند هەڵوێست و هەنگاوی حەكیمانەی سەرۆك بارزانی دەخەینە روو كە لە رابردوودا ناویەتی.
ئەوكاتەی توركیای سەردەمی عەسكەر هەڕەشەی دەستوەردان لەكاروباری ناوەخۆی كوردستان و هێرش كردنە سەر باشوری كوردستانی دەكرد لە ساڵی 1999 -2000 دا هەر ئەوكات سەرۆك مسعود بارزانی بەرەنگاری هەڕەشەكانیان بوویەوە و رایگەیاند كە ئەوانیش ئامادەن دەستوەردان لە توركیا لە دیاربەكرەوە دەست پێ بكەن و رووبەڕووی هەر هێرشێك دەبنەوە لەپێناو پاراستنی میللەتی كوردو خاكی كوردستان كە ئەمە هەڵوێستێكی مەردانەی نەتەوەیی و مێژووی بوو وە بە وڵاتانی دەوروبەری وت كوردستان هێلی سوورەو بۆ هیچ كەس نیە دەستوەربداتە خاكی كوردستان لەكاتێكدا كە كوردستان هیچ پشتگیریێكی وای نەبووە لە دنیادا بەهۆی ئەوەی خاوەنی ناسنامەو دەوڵەتی خۆی نەبووە!، كەواتە بۆ هەر كۆمەڵگایێك كە دابەش كرا بێت و بێ پاڵپشتی نێو دەوڵەتی بێت ئەوا پێویستی بە سەركردەیەكی كاریزمی و تێكۆشەرو چاونەترس هەیە كە بە هەر وڵاتێك بڵێت نا وە سنوری بۆ دابنێت!، تا دەگاتە سەر ڕێرەوی سروشتی خۆی و مافەكانی نەتەوە دەستەبەر دەكات. بەڵام خەمی هەرە قوڵ و برین سارێژ نەبووی گەڵی كورد خیانەتكارانی ناوەخۆیەتی كە بەدرێژایی مێژوو كوردیان بەش كردووەو نەیانهێڵاوە كورد بگات بەم مافە رەوایەی كە ببێتە خاوەن دەوڵەت! بۆیە جێی ئاماژە پێدانە كە سەرۆك بارزانی وەك رابەرو سەركردەیەكی خەمخۆر بەردەوام لەهەوڵی ئەوەدا بووە كە ئەم دابەش بوونەو كێشەی نێوان براكان نەهێڵێت وە جوهدێكی زۆری پێشكەش كرد تا كوردستان گەیشت بە كەناری دڵنیایی و ئارامی بۆیە بۆ پرسە نەتەوەیی و نیشتیمانیەكان هیچ كەس ناتوانێ لەم رۆڵەی مەرجەعی سیاسی گەورەی كورد كەم بكاتەوە تەنانەت بەخستنە مەترسی گیانی خۆی و بنەماڵەی رووبەڕووی چەندان مەترسی راستەقینە بۆتەوە تەنها تا پاشەكشە بكات لەو مافە رەوایەی كە سەدان ساڵە لەم نەتەوە ستەملێكراوە زەوت كراوەو وەك كاڵایەك سەیركراوە !؟ وڵاتانی وەك ئەمەریكا تەنها بۆ بەرژەوەندی و خزمەت كردنی ئەجێنداكانی خۆیان میللەتانیان بەكارهێناون بەو شێوەیەی كە ویستویانە بۆیە كاتێك سەرۆك بارزانی وەك سەركردەیەكی كاریزمایی دڵسۆزانەو چاونەترسانە رووبەڕووی ئەم ئەجێندایانە دەبێتەوە و دەڵێ نا بۆ هەر هێزێك لەدنیادا كە بیەوێت كورد لە مافی هاوڵاتی بوون و ناسنامە بێبەش بكات! ئەوە كارێكی ناوازەو مەزنە هەردەم بەبەرزی دەمێنێتەوە! دەگمەنن ئەو جۆرە سەركردانەی كە بتوانن بە دنیای سەرمایەداری سیاسی مافیایی جیهانی بڵێن نەخێر!! وە گیانی خۆی گیانفیدایانە بخاتە مەترسی لەپێناو بەدیهێنانی ئەم خەونەو مافە رەوایەی گەلێكی ستەمدیدە وە دروست كردنی شورەیەك بۆ نیشتیمان كە هیچ كام لە وڵاتانی داگیركار نەتوانن سنور ببەزێنن و هێرش بكەنە سەر خاك و نیشتیمان كە ئەمەش بەشێكی پەیوەندی بەوە هەیە كە پێشەوای كورد بارزانی باوك لەپێناو پاراستنی شەرەف و ناسنامەی گەلی كورد و سەربەرزكردنی ڕووبەڕووی گەورەترین نسكۆو مەترسی بۆتەوە، وە لەوكاتانەی كۆماری كوردستان دووای 8 مانگ لەلایەن ئیران و ئەمەریكا لەناو دەبرێت و پێشەوای كورد قازی محەمەد بەرەو پەتی سێدارەدان دەبرێت دەڵێت (ئاڵای كوردستان لە دەستێكی ئەمیندایە) كە مەبەست لێی مەلا مستەفا بارزانی بوو. هەر لەوكاتدا كاتێك ئەرتەشی ئیران داوای چەككردنی كورد لە پێشەواو سیمبولی كورد مستەفا بارزانی دەكات بەڵام تەسلیم نابێت و بە چەكێكی سادە ڕووبەڕووی ئەرتەشی سوپای ئیران دەبنەوەو بەدەم شەرەوە داستانێكی گەورەی نەبەردی و مەردانەی مێژوویی تۆمار دەكەن و چەندین شەهیدو قوربانی بەخت دەبن لەپێناو رزگاری و سەربەخۆیی و سەربەرزی كورد ئینجا پاشەكشە دەكەن بەرەو باشوری كوردستان، هەمان شێوەی شۆرشی لیبیای عومەر موختار دژ بە داگیركاری ئیتالیا لەپێناو گەلەكەی قارەمانیێكی نەبەردی و مێژووی تۆمار دەكات و دوواجار لیبیا ئازادو سەربەخۆ دەبێت.
لەچەند هەڵوێستێكیتری نیشتیمانی و مێژووی سەرۆك بارزانی دا جێی وەبیرهێنانەوەیە كە هەڵوێستێكی جوامێرانەی نیشتیمانی و خۆنەویستی ئەوكاتەی كە كۆنگرەی نەتەوەی كورد لە هەولێر لەسەر بڕیاری بارزانی دەستی پێ كردو سەركردایەتی كرد كە بۆ یەكەمین جار بوو لەمێژووی بزاڤی سیاسی كورد كۆنگرەیەكی لەم جۆرە بكرێت كە لایەنە سیاسی و كەسایەتیەكانی هەرچوار پارچەی كوردستان بەشداریان تێیدا كرد بۆ پرسی نەتەوەی كورد بەڵام بەداخەوە بەهۆی هەبوونی دەستی خیانەت و عوقدەی نەقس لەلایەن pkkــەو حیزبە نزیكو هاوبیرەكانی كە جگە لەجەهالەت و لوت بەرزی و زیانی ترسناك بۆ گەلی كورد و نۆكەرایەتی كردن بۆ وڵاتانی دیكە سودێكیان بۆ كورد نەبووە؟!! كۆنگرەكە هەڵوەشێندرایەوە كە لەسەرەتادا داوایان كرد لە كۆی 1200 ئەندام دەبێت 800ی هی ئەوان بن و پاشانیش حیزبێكی ناوەخۆیی دژە وڵات بەناو میدیا سەربەخۆكانیان هاندا تا رای گشتی و تاكی كورد چەواشە بكەن و بەلارێدا ببەن بەوەی كە بارزانی دەیەوێت قۆرخی دەسەڵات بكات؟، لەكاتێكدا تاكە داوای مەرجەعی سیاسی نەتەوەی كورد مسعود بارزانی ئەوە بووە كە تەنها پابەند بن بە بنەماو ئامانجەكانی ئەم كۆنگرەیەو هەڵنەوەشێندرێتەوە كێشە نیە هەر لایەنێك یا كەسێك دەیەوێت سەرپەرشتی بكات با بفەرموێت تەنها دەبێ هەنگاوەكان ووردبینانە بن و مەسەلەكە زۆر لەوە گەورەترە كە ئێوە داوای ئاغایەتی دەكەن بۆ خۆتان كەچی مەسەلەكە پرسێكی نەتەوەیی و نیشتیمانیەو بۆ نەوەكانی داهاتووە بەرپرسیاریەتیێكی گەورەی ئەخلاقی و نیشتیمانیەو لە ئەستۆی هەموو لایەكمانە! وە بەدیهێنانی خەونی گەلێكی ستەمدیدەی پارچە بووە پرسێكی نەتەوەییە چۆن دەبێ ئێوە كە خۆتان بەنوێنەری گەل دابنێن ئاوا بچوك بیر دەكەنەوەو لەم پرسە دەڕوانن؟! هەروەها لەكاتی داواكردنی ئاشتی و كۆتایی هێنان بە كێشەی كورد لە باكوردا لەگەڵ دەوڵەتی توركیا لەوانكاتاندا بارزانی گەورەترین ڕۆڵی مێژوویی بینی لەپێناو چەسپاندنی ئاشتی و بەرقەرار بوونی ئارامی چەندین جار تەئكیدی لەوە دەكردەوە كە پێویستە خەباتی چەكداری رابگیرێت و خەباتی مەدەنی دەست پێ بكرێت و بچنەوە ناو شارەكانی توركیا لەوێوە خەباتی سیاسی و دیبلۆماسی بۆ دابین كردنی مافەكانی كورد دەست پێ بكەن تا چیتر زیانی گەورە بەر كورد نەكەوێت و ماڵوێرانی بۆ میللەت بەدوادا نەهێت كەچی بڕیاری بیروشكانی سەرانی pkk ـــە مانەوە بوو لە دۆڵ و ناو ئەشكەوتو چیاكان تا ئەوەی بەتەواوەتی شارو شارۆچكەكانی كوردیان خستە بەر موشەك و هێرشی سەربازی و وێران كردن و دابەش بوون و پێدانی بەهانە بە سوپای توركیا تا رۆژئاواش بە مەترسی بۆ سەر خاكی خۆیان بزانن و ئەنجامەكەیشمان بینی! هەموو ئەوانە بەهۆی نەزانین لە سیاسەت و دوور نەبینی و بەشێكی زۆریش خۆفرۆشی و خاكفرۆشی و عەمالەت كردن و خزمەت كردن بە ئەجێندای دەرەكی بوو، بۆیەش بینیمان لەكاتی ریفراندۆم بۆ سەربەخۆیی كوردستان بەر لە ئاغاكانیان دژ بە سەربەخۆیی كوردستان وەستانەوە!! لەكاتێكدا سەرۆك و مەرجەعی سیاسی نەتەوەی كورد مسعود بارزانی لە هەڵوێستێكی جوامێرانەو مەردانەدا وەك رێبەری نەتەوەیی لەكاتی ریفراندۆم تەحەددای تەواوی وڵاتانی دنیای كرد تەنها لەپێناو راگەیاندنی دەوڵەتی كوردستان تا چیتر ئەم گەلە بێ شورەو پشتیوانی نەمێنێتەوە! بەدنیا راگەیەندرا كە گەلی كورد دەتوانێ خۆی بەڕێوە ببات و دەبێت خاوەنی ئاڵای خۆی بێت لەڕیزی تەواوی ئاڵای وڵاتانی دنیا وتی: هیچ حیسابێك بۆ رەئیا هیچ كەس یا وڵاتێك ناكرێت بیەوێت كورد بێ وڵات و هەمیشە بەژێردەستەیی بمێنێتەوەو بەكاربهێنرێت!. وە بۆ هەتاهەتایی كەركوكی وەكو هەر شارێكی دیكەی كوردستان هەولێرو سلێمانی و دهۆك و هەلەبجەو مهاباد و شنۆو سەقزو ساپلاغ و ئورمیەو ئامەدو قامیشلۆو عەفرین و كرمانشان بەخاكی كوردستانی ناساندو كردی بە تاپۆیێكی رەش و جێگیری كرد بەبێ گوێدانە هیچ فشارێكی ناوخۆیی و دەرەكی!! وە هیچ كەسێك یا حكومەتێك ناتوانێ ئەم ئەنجامەی ریفراندۆم هەڵبوەشێنێتەوە كە میللەتی كورد بڕیاری چارەنووسی خۆی داوەو لە رۆژهەڵات و رۆژئاواو باكوری كوردستان هاتنە سەر شەقامەكان و بەچاوی پڕ ئەسرین و ئومێدەوە ئاهەنگیان گێرا بۆ ریفراندۆم! كە ئەمە هەڵوێستێكی نەبەردانەو تێكۆشانی سەرۆك و مەرجەعی هەر چوار پارچەی كوردستان مسعود بارزانی بوو. بەڵام ئەم خۆشیەی گەلی كورد بە خیانەتێكی گەورەو رەش لە كوردو كوردستان لە 16ــی ئۆكتۆبەردا وەڵام درایەوە!!؟ نزیك بوو شەڕی ناوخۆیی و دوو ئیدارەیی لێبكەوێتەوە بەڵام بەهۆی پشودرێژی و هەنگاونانی حەكیمانەو لەسەر خۆی سیمبولی گەلی كورد بارزانی بۆ پاراستن و یەكڕیزی كوردو خوێن نەڕشتن بوو بەڕێگر لە پیلان و ئامانجی دوژمنان و خیانەتكاران! وە پیلانەكە خرایە مەزبەلەی مێژوو! بۆیە بەدڵنیاییەوە تەواوی ئەوانەی نەیانتوانی دەنگ بە بەڵێ بدەن یا كەمتەرخەم بوون تەواو هەست بە ئازاری ویژدان دەكەن بەرامبەر بە نیشتیمان و نەتەوەی كوردو نەوەی داهاتوو، وە گەر بێت و لە ئێستادا ڕاپرسیێك بكرێت یا دووبارە دەنگدان بكرێتەوە بۆ ریفراندۆم بێ شك تەواوی دەنگەكانی میللەتی كورد بە بەڵێ دەبێت جگە لەكەمینەیەكی زۆر كەمی نیشتیمان فرۆش كە پەروەردەی دەستی دوژمنانی كوردن و هەمیشە بە نۆكەریكردن بۆ بێگانە ئامادەن بە جاشایەتی ژیاون و بە سەرشۆری سەر دەنێنەوە!!. وە ئەنجامی ریفراندۆمیش لەهەر كات و ساتێكی لواودا ئامادەیەو نەتەوەی كورد دەگەیەنێتە ئامانج و مافی راستەقینەی سەدان ساڵەی!.
بۆیە زۆر گرینگە بۆ میللەتی ئێمە كە رۆڵەكانی لە ونبونی ناسنامەو مێژوویان و سیمبولە تێكۆشەرە نەتەوەییەكانیان و شۆڕشە مەزنەكانیان هەمیشە ئاگادار بكرێنەوەو وانەی خۆشەویستی نیشتمانیان فێربكەین تا نەبن بە نێچیرێكی گوناح و دەستەمۆ!. بۆیە ئەركی گشت تاك و لایەنێكە كەوا مێژووی پرشنگدارو وەرچەرخانی ئەم گەلە فەرامۆش نەكات و تاكێكی وشیارو نەبەرد پەروەردە بكرێت و پاراستنی خاك و نیشتیمان لە خوێن و مۆخیدا بچەسپێت.
