ڕاپۆرت ــ سەید فاتیح بەرزنجی:
وەزارەتی كارەبای هەرێم هەمیشە لەخەمی زیادكردنی كارەبای نیشتیمانییە بۆ هاووڵاتییان و هەموو كاتێكیش ئاگاداری هاووڵاتییانی كردۆتەوە كە دەست بەكارەباوە بگرن و كارەبا زیاد لە پێویست بەكار نەهێنن بۆ ئەوەی بتوانن كارەبای زیاتر بە هاووڵاتییان بدەن، ئەگەرچی رۆژ لە دوای رۆژ خواست لەسەر كارەبا زیاد دەكات، دەربارەی چۆنیەتی پێدانی كارەبا وەك رءژنامەی خەبات ئەو راپۆرتەمان ئامادەكرد
هاووڵاتییان: ئەمساڵ بڕی پێدانی كارەبا زیادی كردووە
كارزان عەلی لە گەڕەكی زانیاری گوتی: لەماوەی ساڵانی رابردوو بڕی پێدانی كارەبای نیشتیمانی كەم بوو، بەڵام ئەمساڵ بە هەوڵ و كۆششی وەزارەتی كارەبای حكومەتی هەرێم، كارەبای نیشتیمانی زیادی كردووە ئەگەرچی ئێستا وەرزی گەرما تینی زۆرە و ئەگەر كارەبا نەبێت خەڵكی بێزار دەبێت
كەمال سلێمان گوتی: ماوەی چەند مانگێكە كارەبای نیشتیمانی زیادی كردووە و هاووڵاتییان بەو زیادبوونە زۆر بەختەوەرن و هیوادارین كارەبای نیشتیمانی كەم نەبێتەوە
زرار كەریم گوتی: بەو گەرمایە ئەگەر كارەبای نیشتیمانی نەبێت خەڵكی چۆن دەتوانن بەو گەرمایە بژین، شوكر بۆ خوا لەڵایەن وەزارەتی كارەباوە هەوڵ بۆ زیاد كارەبا دراوە و هەموو خەڵكی بەو زیادكردنە دڵخۆشن.
ئەمساڵ كارەبای نیشتیمانی زیادی كردووە
ئەندازیار ئومێد محەمەد بەڕێوەبەری كۆنتڕۆڵی كارەبای هەرێم گوتی: رۆژ لەدوای رۆژ خواست لەسەر كارەبای نیشتیمانی زیاد دەبێت، پێویستە هاوبەشانی كارەباش دەست بە كارەباوە بگرن بە دڵنیایەوە كاتەكانی پێدانی كارەبا زیاتر دەبێت. ئێمە چەندین كۆبوونەوەمان لەسەر بارودۆخی كارەبا ئەنجامداوە تا بتوانیان زۆرترین كارەبا بە هاووڵاتییان بدەین، ئەگەرچی كۆنتڕۆڵی كارەبای هەرێم هەموو كاتێك بە پێی خشتەیەكی تۆكمە و داڕێژراو كارەبای بە هاووڵاتییانداوە و داواشمان كردووە و هەموو هەوڵێك دەدەین بۆ دابینكردنی گازوایل و سووتەمەنی بۆ وێستگەكان و ئەنجامدانی كارەكانی چاكسازی بۆ پێدانی كارەبای زیاتر بە هاووڵاتییان و دڵنیایی بە هاووڵاتییان دەدەین كە لە هاوینی ئەمساڵدا خشتەی پێدانی كارەبا لە چاو هاوینی ساڵی رابردوو باشتر دەبێت هەرچەندە پلەكانی گەرما بەرز دەبێتەوە ئەگەر توانای زیادكردنی بەرهەمەكە هەبێت لە بەرامبەر خواستی هاووڵاتییان ئەوا كاتەكانی پێدانی كارەبا وەك خۆی دەمێنێتەوە و بۆ مانگی شەش باسی 18 كاتژمێر كارەبامان كردووە، بەڵام كارەبای زیاتر بەخەڵكی دراوە.
دواتر ئەندازیار حەمە ئەمین هەورامی گوتەبێژی وەزارەتی كارەبا گوتی: وەزارەتی كارەبا بە شێوەیەكی پیشەییانە توانیویەتی بەشە كارەبای شارەكانی كوردستان دابەش بكات، ئەویش لە رێگەی بەدواداچوون و پێشنیازی تیمێكی راوێژكاری و شارەزا بە رەزامەندی بەڕێوەبەرایەتی گشتی كارەبای پارێزگاكان بوو، لێرەوە هەموو ئەو دەنگۆیانە رەت دەكەینەوە، كە باس لە خراپی دابەشكردنی كارەبای شارەكان دەكەن و ماوەیەك بوو هەندی كەناڵی راگەیاندن و كەسانی نابەرپرس دەنگۆی ئەوەیان بڵاو دەكرەوە كە دابەشكردنی كارەبا لە نێو شارەكاندا بە شێوەیەكی دادپەروەرانە نییە هەربۆیە وەزارەتی كارەبا بە پێویستی دەزانێت نا دروستی ئەو هەواڵانە رەت بكاتەوەو هەموو كاتێك وەزارەتی كارەبا بەشێوەیەكی پیشەییانەو بەو پەڕی دادپەروەرانە كارەبای بە هاووڵاتییان داوەو بەو شێوەیەش كارەبا بەسەر شارەكان دابەشكردووە:
پارێزگای هەولێر 1129 مێگاوات كارەبا، لە كاتێكدا خواست لەسەر كارەبا 1800 مێگاوات بووە
پارێزگای سلێمانی 753 مێگاوات و گەرمیان 138مێگا وات و چەمچەماڵ 50 مێگا وات و كارگەكانی سلێمانی 200 مێگاوات و كۆی گشتی ئەو كارەبایەی بە شاری سلێمانی دراوە 1141 مێگاوات بووە، لە كاتێكدا خواست لەسەر كارەبا 1200 بووە.
پارێزگای دهۆك 559 مێگاوات، لە كاتێكدا خواست لەسەر كارەبا 900 مێگا وات بووە دیارە سەركەوتوویی ئەو بەرنامەیەش لە كاتی جێبەجێ كردن و وەرگرتنی داتاو ژمارەكان دەردەكەوێت بەوەی كە لەو مانگەدا بەپێی داتاكانی بەڕێوەبەرایەتی كۆنتڕۆڵی ناوەندی هەرێم بەو شێوەیە كارەبای نیشتیمانی بە هاووڵاتییان دراوە هەولێر بە تێكڕا 18 كاتژمێر كارەبا و شاری سلێمانی بە تێكڕا 19.46 كاتژمێر و گەرمیان 21 كاتژمێر و شاری دهۆكیش 14 كاتژمێر كارەبا بە هاووڵاتییان دراوە.
دواتریش ئەندازیار حوسێن حەمەد قادر بەڕێوەبەری گشتی كارەبای هەولێر گوتی: دیارە ئەو بەشە كارەبایەی كە دەدرێتە هەولێر هەزار و 900 مێگاواتە لەبەر بەرزی پلەكانی گەرما خواست لەسەر كارەبای نیشتیمانی زیاترە، هەر بۆیە بە گوێرەی خشتەیەك ئەو كارەبایەی هەیە بەسەر هاووڵاتییان دابەش دەكرێت بە هەماهەنگی لەگەڵ لیژنەی بەدواداچوونی موەلیدە ئەهلییەكان كارەبا دابەش دەكرێت و هەر كاتێكیش كارەبای نیشتیمانی ببڕدرێت ئەوا موەلیدە ئەهلییەكان كارەبا دەدەن بە هاووڵاتییان لەهەر كاتێكی شەویشدا بێت، هەر هاووڵاتییەكیش كێشەی هەبێت ئەوا دەتوانێ پەیوەندی بە لیژنەی بەدواداچوون بكات.
