شێرزاد نایف
دەربارەی مژارا سەرۆكاتیا هەرێما كوردستانێ و پیرۆزباهیكرنا پۆستێ سەرۆكێ هەرێمێ یێ نوو هەلبژارتی ژ لایێ پەرلەمانی ڤە، چەندین پەیامێن پیرۆزباهیكرنێ هاتنە ئاراستەكرن بۆ سەرۆك نێچیرڤان بارزانی و هەر ئێكێ ب ستایلێ خوە ئەو كۆمنت كریە، نها دێ پتریا وان نەمایشكەین و ئەم ژی دێ كۆمێنتا خوە ل سەر كۆمێنتێن وان دارێژین.
كۆچكا سپی یا ویلایەتێن ئێكگرتی یێن ئەمریكی دبێژیت: هوون هەڤپەیمانەكێ ب هێزن بۆ مە.
ب بەراوردی ل گەل سەقایێ دەڤەرێ و نیازێن ئەمریكا ل دەڤەرێ? ژ بلی گەفلێكرنا ئیرانێ یا بەری دەمەكێ نەیێ دوور، و ململانێن وێ ل گەل رۆسیا و چینێ? یاریەكا سیاسیی یا سەركەفتیانەیە. ئەم كورد وەكو بێلایەنی دهێینە پێش ئەو ژی سیاسەتا زانابوون دیپلوماسیەتا سەروك مسعود بارزانی بوویە و هەروەسا حوكمڕانییا نێچیرڤان بارزانی بوویە، كو نەهێلان چو هەڤال بەندییا لایەنەك ب سەر یێ بكەڤیت بۆ هەڤركیێ ل سەر یێ بەرامبەر، ل ڤێرە تشتەكی دئینتە بیرا مە، ئەو ژی هەر ئەو سەمتە و وێراتكاری یە یا مەلا موستەفا بارزانی یا بكارئینایی ل سەردەمێ ل ئێكەتیا سۆڤێتی كو نە هێلای چو لایەن بزانن سەر ب كیژان ئاراستەڤەیە، ژبەر كۆمنالیتسا رۆسیا و موسلمانیا وی و ئەو گرۆپا زەلامێن ل گەل، رۆسیا پێڤە مەحتل بوو بۆ وان سالێن ل وێرێ؟ نەزانین بۆچی تاگیریا شیۆعیەتێ نەكری و هەروەسا چو هشكباوەریێن نە مەزهەبی و وەكو دی ل دەف هەنە. ئەڤرۆ ژی هەمان پراگماتیەكە یا دهێتە دوبارەكرن، لەورا چو جۆرێن موزایدەكرنێ نینن، هەر كەس دخوازیت بۆ لایێ خوە هەرێمێ ڤەكێشیت ژبەر بەرژەوەندیێن خوە یێن تایبەت، ب دیتنا من سیاسەت و دیپلوماسییەتا ستراتیجیەتا سەرۆك مسعود بارزانی و هێژاییا نێچیرڤان بارزانی هوكار و ئەگەر بوون كو نوكە كوردستان یا ئازادە ل د سەربوور و حكومڕانییا خودا، ئیرادەیا گەل و رێبەراتیا سەرۆك بارزانی، كوردستانێ جارەكا دی و باشتر ژ عافیەتا جاران ڤەگەراندەڤە و بوو ژمارەیەك د هەڤسەنگیا نیڤدەولی دا، ل بەرامبەر ژی ئەڤرۆ كۆمێنتا رۆسیا هاتیە دپیرۆزباهیكرنێ دا كو “هوون بەریگریكارێن سەرەكینە ل پێناڤی خورتكرنا پەیوەندیێن دۆستاتیێ د ناڤبەرا مە دا”، نامەیەكە بۆ هەمی لایەنان و هەروەسا كارتەكا مفادارە بۆ مە هەرێمێ كو ئەم ب هەڤال و پشتین و چو لایەنێن مەزن، نەشێن خوە ب خرابی نێزیكی مە بكەن.
یا گرنگتر كو بالا من ڤەكێشای، برتیانیایا گەورەیە، كو ئەڤا هاتیە سەرێ كوردان ب درێژیا دیرۆكێ هەر ژ پەیمانا سیڤەر بگرە و پارچەبوونا مە، دزڤریتە ڤە بۆ ئەوێ بریارا ئەنگلیزی دا، لەورا ئەڤرۆ ژی كۆمێنتا وێ ئەڤەبوو: “دێ پشتەڤانیا وەكەین و ل گەل هەوە دهاریكاربین و دێ گەهێن پەیوەندیان د ناڤبەرا خوە دا بهێزئێخین”. ئها ئەڤێ گرنگیا خوە هەیە چونكو بریتانیا ئێدی ئەو ژی ل مەزنی و سەرخوەیا خوە دنێریت نەمازە خوە ژ ئێكەتیا ئەورۆپی جوداكریە، هەروەكو خوە ژی وەكو جەمسەرەكێ مەزن دبینیت، لەورا ئەڤە بیت كۆمنتا وێ بۆ سەرۆكێ هەرێما كوردستانێ یێ نوو و گەنج و زانا بیت، ئەڤە ژی مینا دبێژن ـ دوعایا دایبابانە!!.
دمینیت كۆمێنتا ئیرانێ و عیراقێ من خواست هەردویان بێخمە ب رەخ ئێك ڤە، چونكو شوونتبلێن ئیرانێ د عیراقێ دا ددیار و پێشچاڤن وەكو ئەڤ دونیایە هەمی ڤێ ئێكێ دزانن،ئیران دبێژیت: “داخوازا زێدەتر ژ پێشڤەچوونێ د پەیوەندیێن خوە دا دكەین”.
هەروەسا ژی بەغدا ژی گوت: “قووناغەكا نوو دێ دەسپێكەین و ناكۆكییان چارەسەركەین”.
د سیاسەتێ دا ئەڤە هەیە، كو دوهی ئەم هێرشبەر بووین و ئەڤرۆ دۆستین!!. ئەڤە ژی نیڤشكێ ئاریشەیا مەیە، كو ئاریشە چارەسەربن، واتە جێبەجێكرنا ماددێ 140، دێ هەمی رێ ل بەر عیراقێ هێنە گرتن هەكە هات و بەغدا خوە بادا، هەكە نە، نامەیا پێشنیازێن نێچیرڤان بارازانی پێش هەلبژارتنا وی ژ لایێ پەرلەمانێ كوردستانێ ڤە، بۆ یۆنامی كوبهێتە ببیتە دادوەر ل سەر كێشەیێن مە ل گەل عیراقێ? دێ هەتكا عیراقێ و مایێ سیاسەتا لەنگ دیاربیت!!، لەورا عێراقژی دێ هزرا خوكەت، مادەم كو هەر دێ مادێ 140 كەڤیتە جهێ وارێ جهئینانانێ? نەخێر بلا ئەو تەماكاری ژ دەستبچن، بلا هەتك نەچیت!!. و ئەو حنێر بلا بۆ یۆنامی نەبیت، بۆ ناڤەندا عیراقێ بیت، هەكە نە دێ یا چوویی ژی ژ دفنا دوەركەڤیت،چ ب قەرەبۆكرن یان، ژ دەستدانا گەلەكێ نەدوورە حەشدا شەعبی ژی بكەڤیت!.
ژلایەكێ گرنگترە ڤە ژی توركیایە كو دپیرۆزباهیكرنێ دا دبێژیت: “دێ پشتەڤانیا خوە بەردەوام كەین”. مەرەم ژێ كو مە چو دابرین د پشتەڤانیكرنێ دا نەكریە، و خوە ب سەر چو پیلانان را نەبریە، نەمازە ئەردۆگان ژبلی كێشەیا پەكەكێ فۆكسا خوە یا مەزهەبگەریی ژی دئێخیتە سەر هەرێمێ و نێزیكبوون ژ كێشەیا نەینەوا و توركمانان، كو بەردەوام ببیت ل سەر وان پەیوەندیێن خورت!!.
نەتەوێن ئێكگرتی ژی دەربارەی هەلبژارتنا نێچیرڤان بارزانی، هاتیە خەت و ب ڤی رەنگی پیرۆزباهی لێ كریە: “بەختەوەرین ب هەلبژارتنا وە و هەموو دەزگەهێن مە دێ ل گەل هەوە كاركەن”. ئەڤە ژی لۆتكەیا خۆشحالیێ یە، وات گەلەك كار یێ ل پێش و دلێ خەلكێ كوردستانێ خۆش بیت، ئێدی چو كارەساتێن دی ب سەردا ناهێن، بەرەڤانیكرنەكا رەوا و نێزیك دێ هەبیت. ل دووماهیێ ژی ئێكەتیا ئەورۆپی پیرۆزباهیێ دكەت و دبێژیت: “هەلبژارتنا هەوە یا گرنگە بۆ بەرقەراربوونا هەرێما كوردستانێ و عیراقێ”. ب دیتنا من نامەیەكا شیرەتكرنێ یە ل عیراقێ كو بزانیت رۆلێ هەرێمێ چەندە ل دەف ئێكەتیا ئەورۆپی و رەوشتێ ئەورۆپی و بایەخدانا ب پرەنسیپێن مافێ مرۆڤی و مرۆڤاتیێ دڤێت بهێتە پێشچاڤ، كوردان هند تراژیدیێن خوە گەهاندینە ئەورپا ئێدی ئەو پتر شارازابوویە ل وێ سەردەریا عیراق ل گەل كوردان دكەت و كرییە ب دێژیا دیرۆكی!. ئەڤ هەمی پشتەڤانی و پەسنینە جهێ باوەریێ یە كو دێ پاشەرۆژا كوردان باشتر بیت و ب رێیێن نەرم نیان و زانابوون گەشتر بیت.
